សង្គមអន្តរជាតិ
អន្តរជាតិ
×![]()
ដោយ: តន ចាន់រិទ្ធារ៉ា
កូរ៉េខាងត្បូង បានប្រកាសនៅថ្ងៃទី២៤ ខែកញ្ញាថាកូរ៉េខាងជើង បានបាញ់សម្លាប់ រួចដុតសាកសពមន្ត្រីកូរ៉េខាងត្បូងម្នាក់។ មន្ត្រីកូរ៉េខាងត្បូងរូបនេះ បានបាត់ខ្លួននៅដើមសប្ដាហ៍នេះ។ មិនទាន់មានមូលហេតុជាក់លាក់នៃការបាញ់នេះទេ ដូចគ្នានឹងការបាត់ខ្លួនផងដែរ តែប្រព័ន្ធផ្សព្វផ្សាយកូរ៉េខាងត្បូងរាយការណ៍ថា មន្ត្រីនេះ ព្យាយាមរត់ទៅកូរ៉េខាងជើង។ 
បើតាមការប្រកាសរបស់យោធាកូរ៉េខាងត្បូង មន្ត្រីកូរ៉េខាងត្បូងរូបនេះ បាត់ខ្លួនពីទូកល្បាតមួយនៅក្បែរកោះ Yeonpyeong នៅក្បែរព្រំដែនទឹកខណ្ឌចែកឧបទ្វីបកូរ៉េ នៅមុនពេលរសៀលថ្ងៃទី២១ ខែកញ្ញា។ ទីភ្នាក់ងារព័ត៌មានកូរ៉េខាងត្បូង Yonhap ផ្សាយថា មន្ត្រីវ័យ៤៧ឆ្នាំរូបនេះ ធ្វើការនៅក្រសួងសមុទ្រ និងនេសាទ។
«កូរ៉េខាងជើង រកឃើញបុរសរូបនេះក្នុងដែនទឹករបស់ខ្លួន ហើយធ្វើសកម្មភាពឃោរឃៅដោយបានបាញ់សម្លាប់ រួចដុតសាកសពថែមទៀត។ នេះបើតាមរបាយការណ៍ចារកម្មយោធា។» ក្រសួងការពារជាតិកូរ៉េខាងត្បូងបញ្ជាក់បែបនេះនៅថ្ងៃទី២៤ ខែកញ្ញា ដែលបន្តថា យោធាកូរ៉េខាងត្បូងថ្កោលទោសទង្វើបែបនេះ ហើយទាមទារឲ្យកូរ៉េខាងជើងផ្ដល់ការពន្យល់ និងរកមុខអ្នកទទួលខុសត្រូវ។
នេះជាលើកដំបូងតាំងពីឆ្នាំ២០០៨មក ដែលជនជាតិកូរ៉េខាងត្បូងត្រូវបានបាញ់ដោយកូរ៉េខាងជើង។
មូលហេតុនៃការបាញ់នេះ មិនទាន់ដឹងច្បាស់ឡើយ។ ប៉ុន្តែកាលពីខែកក្កដាកន្លងទៅ មេបញ្ជាការកងទ័ពអាមេរិកប្រចាំកូរ៉េខាងត្បូង និយាយថា កូរ៉េខាងជើង បានចេញបញ្ជាឲ្យកងទ័ពរបស់ខ្លួនបាញ់សម្លាប់អ្នកណាដែលឆ្លងដែន សំដៅទប់ស្កាត់ការរាលដាលជំងឺ COVID-19 ។ នេះអាចជាមូលហេតុនៃការបាញ់មន្ត្រីស៊ីវិលកូរ៉េខាងត្បូងខាងលើដែរ។
លើសពីនេះ គេក៏មិនទាន់ដឹងថា ហេតុអ្វីបានជាមន្ត្រីរូបនេះ រសាត់ដល់ទឹកដីកូរ៉េខាងជើងដែរ។ Yonhap បានស្រង់ប្រភពមន្ត្រីកូរ៉េខាងត្បូងថា បុរសរូបនេះទំនងជាចង់ភៀសខ្លួនទៅកូរ៉េខាងជើង៕
Tag:
កូរ៉េខាងត្បូង
កូរ៉េខាងជើង
© រក្សាសិទ្ធិដោយ thmeythmey.com
