COVID-19
អន្តរជាតិ
ជប៉ុន ពិចារណាឲ្យនិស្សិតនិងបុគ្គលិកពេទ្យចូលប្រទេសឡើងវិញ តែទេសចរបន្តហាមឃាត់
×![]()
ដោយ៖កង ម៉េងហុង
ជប៉ុន កំពុងពិចារណាក្នុងការអនុញ្ញាតឲ្យអ្នកដែលស្នាក់នៅរយៈពេលវែងឲ្យចូលមកក្នុងប្រទេសឡើងវិញ។ នេះបើតាមការផ្សាយរបស់កាសែតក្នុងស្រុកជប៉ុន។ ប៉ុន្តែចំពោះភ្ញៀវទេសចរ នៅមិនទាន់អនុញ្ញាតនោះទេ។
សារព័ត៌មានក្នុងស្រុករបស់ជប៉ុន Asahi Shimbun បានរាយការណ៍នៅថ្ងៃពុធទី ២៣ ខែកញ្ញានេះថាប្រទេសជប៉ុនកំពុងគិតគូរបន្ធូរបន្ថយការរឹតត្បិតលើការធ្វើដំណើររបស់ជនបរទេស ខណៈស្ថានភាពជំងឺ COVID-19 នៅប្រទេសហាក់ធូរស្រាល។ ការអនុញ្ញាតនេះ អាចចាប់ផ្ដើមនៅដើមខែក្រោយ។
ដូចដឹងស្រាប់ហើយ ក្នុងកិច្ចប្រឹងប្រែងដើម្បីទប់ស្កាត់ការរីករាលដាលជំងឺ COVID-19 ជប៉ុនបានអនុវត្តការរឹតត្បិតការធ្វើដំណើរដ៏តឹងរ៉ឹងបំផុតនៅលើពិភពលោក។ មិនត្រឹមជនបរទេសដែលមានលិខិតអនុញ្ញាតរយៈពេលវែងឡើយ សូម្បីតែអ្នករស់នៅជាអចិន្ត្រៃយ៍ ក៏មិនអាចត្រឡប់មកក្នុងប្រទេសនេះឡើងវិញផងដែរ ប្រសិនបើគ្មានការអនុញ្ញាតជាមុននោះទេ។
កាលពីចុងខែកក្កដា រដ្ឋាភិបាលតូក្យូ បានបន្ធូរបន្ថយការរឹតត្បិតមួយចំនួនលើនិស្សិត និងអ្នកជំនួញមកពី៧ប្រទេស ដោយបើកផ្លូវឲ្យពួកគេធ្វើដំណើរចូលជប៉ុនវិញបាន។ ដោយដកស្រង់ប្រភពព័ត៌មានពីរដ្ឋាភិបាលជាច្រើន កាសែត Asahi បានផ្សាយថា ជប៉ុននឹងអនុញ្ញាតឲ្យអ្នកស្នាក់នៅរយៈពេលយូរជាង ៣ ខែមាននិស្សិត និងបុគ្គលិកពេទ្យបណ្តាប្រទេសផ្សេងៗ អាចចូលទឹកដីជប៉ុនបានផងដែរ។
សម្រាប់ផែនការថ្មី រដ្ឋាភិបាលជប៉ុន ក៏បានកំណត់ថា មានតែមនុស្ស ១០០០ នាក់ប៉ុណ្ណោះដែលអនុញ្ញាតអោយចូលក្នុងប្រទេសសម្រាប់មួយថ្ងៃ។
រហូតមកដល់ពេលនេះ ជប៉ុន បានរក្សាការឆ្លង និងការស្លាប់របស់ខ្លួនក្នុងកម្រិតទាបបើប្រៀបធៀបជាមួយបណ្តាប្រទេសដែលរងគ្រោះខ្លាំង។ ជប៉ុនមានករណីឆ្លងសរុប ៧៩,៩០០នាក់និងស្លាប់ ១,៥១៩ នាក់បានស្លាប់៕
© រក្សាសិទ្ធិដោយ thmeythmey.com
