COVID-19
អន្តរជាតិ
ដោយសារ COVID-19 កិច្ចប្រជុំ G20 នៅអារ៉ាប៊ីសាអូឌីត នឹងធ្វើឡើងតាមប្រព័ន្ធវីដេអូ
កិច្ចប្រជុំក្រុមប្រទេសមានសេដ្ឋកិច្ចរីកចម្រើនទាំង២០ (G20) តាមប្រព័ន្ធវីដេអូ នៅខែមីនា ឆ្នាំ២០២០។ រូបភាព៖ AFP
×![]()
ដោយ: ធៀន ភារិន្ទ
កិច្ចប្រជុំកំពូលក្រុមប្រទេសមានសេដ្ឋកិច្ចរីកចម្រើនទាំង២០ (G20) ដែលគ្រោងប្រារព្ធនៅទីក្រុងរីយ៉ាដ ប្រទេសអារ៉ាប៊ីសាអូឌីត នឹងផ្លាស់ប្តូរទៅធ្វើតាមប្រព័ន្ធវីដេអូវិញ ដោយសារតែ COVID-19។ នេះបើតាមសេចក្តីថ្លែងការណ៍ដែលបានបង្ហោះលើវេបសាយ G20 នៅថ្ងៃទី២៨ ខែកញ្ញា។ កិច្ចប្រជុំនេះ នឹងធ្វើឡើងនៅថ្ងៃទី២១ និង២២ ខែវិច្ឆិកាខាងមុខ។ 
ក្នុងសេចក្តីថ្លែងការណ៍របស់អារ៉ាប៊ីសាអូឌីត ដែលជាប្រធានផ្លាស់វេននៃកិច្ចប្រជុំក្រុមប្រទេសមានសេដ្ឋកិច្ចរីកចម្រើនទាំង២០ របៀបវារៈក្នុងកិច្ចប្រជុំខែវិច្ឆិកាខាងមុខ នឹងផ្តោតលើការការពារជីវិតប្រជាជន និងស្តារសេដ្ឋកិច្ច បញ្ហារងគ្រោះដោយសារCOVID-19 និងការដាក់ចេញផែនការមូលដ្ឋានអនាគតមួយចំនួន។
ការផ្លាស់ប្តូរកិច្ចប្រជុំពីទីក្រុងរីយ៉ាដ អារ៉ាប៊ីសាអូឌីត មកធ្វើតាមប្រព័ន្ធវីដេអូបែបនេះ ធ្វើឡើងដោយសារតែ COVID-19 នៅតែបន្តរាតត្បាតលើពិភពលោក។ កន្លងមក មិនត្រឹមតែកិច្ចប្រជុំ G20 ទេ ដែលត្រូវធ្វើឡើងតាមប្រព័ន្ធវីដេអូ សូម្បីតែមហាសន្និបាតអង្គការសហប្រជាជាតិលើកទី៧៥ ក៏កំពុងធ្វើឡើងតាមប្រព័ន្ធវីដេអូដែរ។
តាមរយៈកិច្ចប្រជុំវិសាមញ្ញកាលពីខែមីនាកន្លងទៅ មេដឹកនាំក្រុមប្រទេសមានសេដ្ឋកិច្ចរីកចម្រើនទាំង២០ បានសន្យាផ្តល់ថវិកាជាច្រើនពាន់លានដុល្លារ។ បើតាមសេចក្តីថ្លែងការណ៍ខាងលើ ក្រុមប្រទេសG20 បានផ្តល់ទឹកប្រាក់ច្រើនជាង ១១ទ្រីលានដុល្លារ ដើម្បីការពារសេដ្ឋកិច្ចសកល និង២១ពាន់លានដុល្លារ ដើម្បីគាំទ្រការអភិវឌ្ឍវ៉ាក់សាំង និងផ្នែកវេជ្ជសាស្ត្រផ្សេងទៀត។
បន្ថែមពីលើនេះ ក្រុមប្រទេសមានសេដ្ឋកិច្ចរីកចម្រើនទាំង២០ នេះ ក៏បានចាប់ផ្តើមគម្រោងផ្អាកយកបំណុលពីក្រុមប្រទេសមានការអភិវឌ្ឍតិចតួចផងដែរ ដែលអនុញ្ញាតឲ្យពន្យារពេលសងបំណុសប្រមាណ ១៤ពាន់លានដុល្លារនៅក្នុងឆ្នាំនេះ។
សូមបញ្ជាក់ថា អារ៉ាប់ប៊ីសាអូឌីត នឹងបញ្ចប់ជាប្រធានផ្លាស់វេនG20 នៅខែវិច្ឆិកាខាងមុខផងដែរ។ ប្រទេសបន្ទាប់ ដែលត្រូវធ្វើជាប្រធានផ្លាស់វេន គឺអ៊ីតាលីសម្រាប់ឆ្នាំ២០២១៕
Tag:
G20
© រក្សាសិទ្ធិដោយ thmeythmey.com
