កីឡាជាតិ
ជាតិ
លោក Mitsumaru អាច ក្លាយជាគ្រូបង្វឹកអ្នកចាំទីក្រុមជម្រើសជាតិ បើមានសមត្ថភាពខ្លាំង
លោក Toshihiro Mitsumaru ធ្លាប់មានបទពិសោធន៍បង្វឹកនៅជប៉ុន និងនេប៉ាល់។ រូបថត FFC
×![]()
សហព័ន្ធកីឡាបាល់ទាត់កម្ពុជាបានតែងតាំងលោក Toshihiro Mitsumaru ឲ្យធ្វើជាគ្រូបង្វឹកអ្នកចាំទីរបស់សាលាបាល់ទាត់ជាតិបាទី និងក្រុមជម្រើសជាតិអាយុក្រោម១៩ឆ្នាំ។ គ្រូបង្វឹកវ័យ២៧ឆ្នាំរូបនេះ មានបទពិសោធធ្លាប់បង្វឹកយុវជនអ្នកចាំទីនៅប្រទេសកំណើត(ជប៉ុន) និងក្រុមជម្រើសជាតិនេប៉ាល់។ 
បើតាមលោក កែវ សារ៉េត អគ្គលេខាធិការនៃសហព័ន្ធកីឡាបាល់ទាត់កម្ពុជា ការតែងតាំងលោក Toshihiro Mitsumaru មិនមែនមានន័យថា គ្រូបង្វឹកអ្នកចាំទីចាស់គឺលោក អ៊ុក ចំរ៉ុង លាឈប់ ឬត្រូវបានសហព័ន្ធបញ្ចប់កិច្ចសន្យានោះទេ ពោលគឺដើម្បីជួយពង្រឹងសមត្ថភាពយុវជនអ្នកចាំទីកម្ពុជាឲ្យកាន់តែប្រសើរ។ បុរសជនជាតិជប៉ុនរូបនេះ មានសញ្ញាបត្រគ្រូបង្វឹកកម្រិត C (នៅប្រទេសជប៉ុន) ដែលអាចមានសក្តានុពលខ្ពស់ក្នុងការបង្វឹក និងរៀបចំវគ្គបណ្តុះបណ្តាលដល់គ្រូបង្វឹកអ្នកចាំទីកម្ពុជា។
អគ្គលេខាធិការរូបនេះបានបន្ថែមថា សហព័ន្ធ អាចនឹងពិចារណាក្នុងការដំឡើងតួនាទីគ្រូបង្វឹកវ័យ២៧រូបនេះ ឲ្យធ្វើជាគ្រូបង្វឹកអ្នកចាំទីរបស់ក្រុមជម្រើសជាតិឈុតធំ បើ លោក អាចបង្វឹកយុវជនអ្នកចាំទីរបស់សាលាបាល់ទាត់ជាតិបាទី និងក្រុមជ្រើសជាតិអាយុក្រោម១៩មានការរីកចម្រើន និងទទួលបានលទ្ធផលល្អ។
ផ្ទុយទៅវិញ លោក អាចនឹងត្រូវបានសហព័ន្ធបញ្ចប់កិច្ចសន្យាមុនពេលវេលាកំណត់ ប្រសិនបើការបង្វឹករបស់លោកពុំសូវទទួលបានលទ្ធផលល្អ ដ្បិតការចូលរួមរបស់លោកគ្រាន់តែជាការសាកល្បងតែប៉ុណ្ណោះ។ នេះបើតាមការលើកឡើងរបស់លោក កែវ សារ៉េត ដែលបានបន្ថែមថា លោក អ៊ុក ចំរ៉ុង ដែលជាគ្រូបង្វឹកអ្នកចាំទីចាស់ នឹងធ្វើជាជំនួយការរបស់លោក Toshihiro Mitsumaru ដើម្បីសិក្សាពីបទពិសោធន៍ថ្មីៗ សម្រាប់អភិវឌ្ឍន៍សមត្ថភាពបន្ថែម។
សហព័ន្ធកីឡាបាល់ទាត់កម្ពុជានៅថ្ងៃទី២៩ ខែកញ្ញា ឆ្នាំ២០២០ នេះ បានសរសេរនៅលើទំព័រហ្វេសប៊ុកផ្លូវការរបស់ខ្លួន ដើម្បីប្រកាសពីការតែងតាំងគ្រូបង្វឹកអ្នកចាំទីជនជាតិជប៉ុនលោក Toshihiro Mitsumaru ជាគ្រូបង្វឹកអ្នកចាំទីប្រចាំសាលាបាល់ទាត់ជាតិបាទី និងក្រុមជម្រើសជាតិអាយុក្រោម១៩ឆ្នាំ។
ស្ថិតក្នុងវ័យ២៧ឆ្នាំលោក Toshihiro Mitsumaru ហាក់ជោគជាំជាមួយការបង្វឹកក្រុមយុវជន ដោយលោកធ្លាប់បង្វឹកយុវជនអ្នកចាំទីនៅប្រទេសជប៉ុន និងបានរួមចំណែកជួយក្នុងក្រុមជម្រើសជាតិនេប៉ាល់ មុនផ្ទេរមកកម្ពុជា។ លោក កែវ សារ៉េត រំពឹងថា គ្រូបង្វឹករូបនេះ នឹងអាចជួយបង្វឹកយុវជន និងបណ្តុះបណ្តាលគ្រូបង្វឹកអ្នកចាំទីកម្ពុជាឲ្យមានសមត្ថភាពកាន់តែរីកចម្រើន៕
Tag:
បាល់ទាត់
Toshihiro Mitsumaru
© រក្សាសិទ្ធិដោយ thmeythmey.com
