ក្របខណ្ឌ Premier League រដូវកាល ២០២០-២១ មានការប្រកួតប្រជែងគ្នាខ្លាំង ដោយមានកីឡាករក្នុងក្រុមនីមួយៗមមាញឹកប្រឹងប្រែងក្នុងការរកគ្រាប់បាល់ដើម្បីជួយក្រុម និងដាក់គោលដៅក្នុងការដណ្តើមយកស្បែកជើងមាស (Golden Boot) ផង។ គិតត្រឹមការប្រកួតសប្តាហ៍ទី៣ ក្រុមទាំង២០មានការស៊ុតបញ្ចូលទីគ្នាដល់ទៅ៩៦គ្រាប់ និងបញ្ជូនឲ្យដៃគូសម្រេចទី (assist) ចំនួន៦០លើកផងដែរ។
Dominic Calvert-Lewin ខ្សែប្រយុទ្ធក្រុម Everton និង Jamie Vardy របស់ Leicester City ដែលជាអតីតម្ចាស់ Golden Boot រដូវកាលមុន កំពុងនាំមុខគេលើការរកគ្រាប់បាល់ក្នុងចំនួន ៥ គ្រាប់ក្នុងការបង្ហាញខ្លួន៣លើកដូចគ្នា។
ខ្សែប្រយុទ្ធសញ្ជាតិកូរ៉េខាងត្បូង Heung-min Son រកបាន ៤ គ្រាប់ក្នុងមួយប្រកួតសម្រាប់ក្រុម Tottenham Hotspur ដែលមិត្តរួមក្រុម Harry Kane ជាអ្នកបញ្ជូនបាល់ឲ្យដល់ទៅ៤លើកដែរនោះ។ ក្នុងនោះដែរ ខ្សែប្រយុទ្ធ Patrick Bamford របស់ Leeds United និង Neal Maupay ខ្សែប្រយុទ្ធ Brighton & Hove Albion ក៏រកបានម្នាក់៤គ្រាប់ផងដែរ។
សម្រាប់កីឡាករដែលរកបាន៣គ្រាប់មាន Mohamed Salah, Danny Ings និង Wilfried Zaha។ ឯ២គ្រាប់មានដូចជា Mateusz Klich, Hélder Costa, Alexandre Lacazette, Aleksandar Mitrović, Sadio Mané, Callum Wilson, Callum Robinson, Jarrod Bowen និង Raul Jimenez។ ហើយអ្នកដែលរកបានម្នាក់មួយគ្រាប់មានច្រើននាក់ទៀត។
យ៉ាងណាក៏ដោយ ក្នុងចំណោម២០ក្រុមនៅលីគកំពូអង់គ្លេស មានតែ Sheffield United ប៉ុណ្ណោះដែលមិនទាន់អាចរកគ្រាប់បាល់បាននៅឡើយទេ។ សរុបគ្រាប់បាល់ស៊ុតបញ្ចូលទីទាំងអស់ត្រឹមសប្តាហ៍ទី៣ ដោយគិតទាំងក្រុមដែលទើបលេងបាន២ប្រកួត មានចំនួន៩៦គ្រាប់ ក្នុងចំណោមអ្នកស៊ុតចំនួន៦៣នាក់។
ដោយឡែក សម្រាប់អ្នក assist ច្រើនជាងគេវិញ មាន Harry Kane ៤លើក ខណៈអ្នកបញ្ជូនបាល់ច្រើនជាងគេរដូវកាលមុន Kevin De Bruyne មិនទាន់បាន១លើកឡើយ។ Andros Townsend, Richarlison, Timothy Castagne, Matheus Pereira, Willian និង Daniel Podence សុទ្ធតែ assist ២លើកដូចគ្នា។ ក្នុងចំណោមកីឡាករដែលបានបញ្ជូនបាល់ឲ្យដៃគូសម្រេចទីមាន៤៨រូប ស្មើនឹង៥៨លើក៕