ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) ចាត់ទុកសម្តីអសុរោះរបស់មន្ត្រីគណបក្សសម្ព័ន្ធដើម្បីប្រជាធិបតេយ្យ (LDP) ដែលរិះគន់មកលើស្ថាប័នខ្លួន ជាទង្វើរធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូរជាតិ។ គ.ជ.ប អះអាងបែបនេះ ក្រោយពី LDP ចេញវីដេអូបកស្រាយថា មន្ត្រីបោះឆ្នោត និងអាជ្ញាធរមូលដ្ឋាន រារាំងការចុះឈ្មោះភ្នាក់ងារសង្កេតការណ៍គណបក្សសម្ព័ន្ធដើម្បីប្រជាធិបតេយ្យ ដោយបំពានច្បាប់ ។
គ.ជ.ប ច្រានចោលការចោទប្រកាន់ និងការប្រើប្រាស់សម្តីអសីលធម៌របស់តំណាងគណបក្សសម្ព័ន្ធដើម្បីប្រជាធិបតេយ្យ នាកិច្ចប្រជុំជាមួយភាគីពាក់ព័ន្ធ កាលពីថ្ងៃទី២៩ កញ្ញា រួមទាំងការបកស្រាយតាមរយៈវីដេអូ ប្រមាណ៣ម៉ោង ដែលបានបង្ហោះលើហ្វេសប៊ុក កាលពីថ្ងៃទី៣០ កញ្ញា។ គ.ជ.ប ចាត់ទុកការចោទប្រកាន់ និងបកស្រាយរបស់ LDP នេះ ជាការធ្វើបុរេវិនិច្ឆ័យដោយគ្មានមូលដ្ឋានច្បាស់លាស់ មកលើមន្ត្រីលេខាធិការដ្ឋានរាជធានី ខេត្ត រៀបចំការបោះឆ្នោត ក្រុមប្រឹក្សាឃុំ សង្កាត់។
សេចក្តីបំភ្លឺរបស់ គ.ជ.ប កាលពីថ្ងៃទី៣០ កញ្ញា បានសរសេរដូច្នេះថា៖«ការនិយាយសម្តីអសុរោះរបស់តំណាងគណបក្ស LDP ប៉ះពាល់ធ្ងន់ធ្ងរដល់កិត្តិយស និងសេចក្តីថ្លៃថ្នូររបស់ជាតិ និងគ.ជ.ប ដែលជាស្ថាប័នមានចែងក្នុងរដ្ឋធម្មនុញ្ញនិងដែលនាំឱ្យមានការភាន់ច្រឡំ បាត់ទំនុកចិត្តលើការបោះឆ្នោត ដូចមានចែងក្នុងមាត្រា១៤២ នៃច្បាប់ស្ដីពីការបោះឆ្នោតជ្រើសតាំងតំណាងរាស្ត្រ»។
តាមរយៈវីដេអូ៣ម៉ោង របស់LDP កាលពីថ្ងៃទី៣០ កញ្ញា បានចេញបកស្រាយថា មន្ត្រីបោះឆ្នោត និងអាជ្ញាធរមូលដ្ឋាន រារាំងការចុះឈ្មោះភ្នាក់ងារសង្កេតការណ៍គណបក្សសម្ព័ន្ធដើម្បីប្រជាធិបតេយ្យ ដោយបំពានច្បាប់ ។ ក្នុងវីដេអូនោះ លោក អ៊ី សាំងឡេង មន្ត្រីLDP បានបកស្រាយថា គណបក្សខ្លួន បានជួបការលំបាកក្នុងការចុះឈ្មោះភ្នាក់ងារអង្កេតការណ៍បោះឆ្នោត ដោយមន្ត្រីក្រុមប្រឹក្សា ឃុំ និង គ.ជ.ប មិនយកចិត្តទុកដាក់បំពេញការងារ និងមិនអើពើលើការចុះឈ្មោះរបស់ LDP ។ មិនតែប៉ុណ្ណោះលោក អ៊ី សាំងឡេង ក៏បានអះអាងទៀតថា ក្រុមប្រឹក្សាឃុំខ្លះ បែរជាលេងល្បែង និងផឹកស៊ី នៅសាលាឃុំ ក្នុងម៉ោងបំពេញការងារទៀតផង។
មន្ត្រីគណបក្សសម្ព័ន្ធដើម្បីប្រជាធិបតេយ្យរូបនេះ បាននិយាយដូច្នេះថា៖«តាំងពីដើមរហូតដល់ថ្ងៃនេះ គឺពួកយើងព្យាយាមតស៊ូ ដើម្បីចុះឈ្មោះភ្នាក់ងារគណបក្សរបស់យើងដោយសន្តិវិធី ដោយត្រឹមត្រូវ។ យើងព្យាយាមនិយាយដោះស្រាយយ៉ាងស្រួលបួលបំផុត ប៉ុន្តែមន្ត្រីបោះឆ្នោតមិនអើពើ។ (LDP) កាន់នីតិវិធីពន្យល់ មើលជាមួយគ្នា(មន្ត្រីគ.ជ.ប)ហើយ និយាយនៅតែមិនស្ដាប់គ្នាបានទៀត។ អ៊ីចឹង គឺយើងមើលឃើញថា នេះមិនមែនជារឿងចៃដន្យទេ វាជាផែនការរបស់គេហើយ»។
តបការលើកឡើងរបស់មន្ត្រី LDP នេះ លោក ហង្ស ពុទ្ធា អ្នកនាំពាក្យ គ.ជ.ប បានអះអាងថា គ.ជ.ប មិនបានរារាំងគណបក្សនយោបាយណា ដែលចុះឈ្មោះអង្កេតការណ៍បោះឆ្នោតនោះឡើយ។ លោក ហង្សពុទ្ធា បានបន្ថែមថា LDP ទៅវិញទេ ដែលមានការយល់ច្រឡំខ្លួនឯង ទាំងពេលវេលាចុះឈ្មោះ រួមទាំងការកែទម្រង់នីតិវិធីចុះឈ្មោះអ្នកអង្កេតការណ៍បោះឆ្នោត ដែលផ្ទុយពីលក្ខខណ្ឌរបស់ គ.ជ.ប ផងដែរ ពោលគឺ LDP ចង់ឱ្យ គ.ជ.ប ធ្វើតាមលក្ខខណ្ឌខ្លួនទៅវិញ។ តែយ៉ាងណាលោក ពុទ្ធា មិនអាចបញ្ជាក់ថា លក្ខខណ្ឌអ្វីខ្លះ ដែលLDP កែទម្រង់ដើម នៃ គ.ជ.ប នោះទេ ។
អ្នកនាំពាក្យរូបនេះ បាននិយាយដូច្នេះថា៖« (LDP) គាត់អត់ព្រមប្រើទម្រង់គណៈកម្មាធិការជាតិរៀបចំការបោះឆ្នោត ហើយគាត់បានបង្កើតទម្រង់ខ្លួនឯង ដែលមានព័ត៌មានមិនគ្រប់គ្រាន់ អ៊ីចឹងការទទួលចុះបញ្ជីភ្នាក់ងារគណបក្សហ្នឹង គឺមិនអាចទៅរួច ពីព្រោះនៅស្ថាប័នណាក៏ដោយ កាលណារៀបចំទម្រង់ដាក់ជូនទៅហើយ ទម្រង់នោះត្រូវតែបំពេញត្រឡប់មកវិញឱ្យបានគ្រប់ជ្រុងជ្រោយ ហើយ(គណបក្ស)មិនអាចបង្កើតទម្រង់ខ្លួនឯង ហើយធ្វើឱ្យបាត់អ្វីដែល គ.ជ.ប បានកំណត់និងធ្វើការកត់ត្រានោះទេ»។
លោក ចិន ថុន អគ្គលេខាធិការបក្ស LDP មិនទាន់ចង់ឆ្លើយតបអ្វីទៅនឹងប្រតិកម្មរបស់គណៈកម្មាការធិការជាតិរៀបចំការបោះឆ្នោតឡើយ។ មន្ត្រីជាន់ខ្ពស់ LDP រូបនេះ បានថ្លែងប្រាប់សារព័ត៌មានថ្មីៗយ៉ាងខ្លីថា៖«យើងកំពុងគិតគ្នាថា ត្រូវឆ្លើយតបបែបម៉េច! អត់ទាន់មានយោបល់អីទេ!»។
តែយ៉ាងណាគ.ជ.ប ក៏បានចាត់វិធានការសមស្រប និងណែនាំដល់មន្ត្រីលេខាធិការដ្ឋានរាជធានី ខេត្ត រៀបចំការបោះឆ្នោត ក្រុមប្រឹក្សាឃុំ សង្កាត់រួចហើយ ចំពោះការងារពាក់ព័ន្ធ ដើម្បីពង្រឹងការងារស្របតាមបទបញ្ជា និងនីតិវិធី សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំ។
ការចុះឈ្មោះអ្នកអង្កេតការណ៍បោះឆ្នោតរបស់គណបក្សនយោបាយ ប្រព្រឹត្តទៅចាប់ពីថ្ងៃទី២៤ កញ្ញា ដល់ថ្ងៃទី២១ ធ្នូ ឆ្នាំ២០២០។ នេះបើតាមលោក ហង្ស ពុទ្ធា អ្នកនាំពាក្យ គ.ជ.ប៕