អន្តរជាតិ
សម្តេចប៉ាប បដិសេធជំនួបជាមួយលោក ប៉ុមប៉េអូ ព្រោះព្យាយាមអូសវ៉ាទីកង់ឲ្យចូលជម្លោះជាមួយចិន
សម្តេចប៉ាបហ្វ្រង់ស៊ីស ប្រមុខបុរីវ៉ាទីកង់។ រូបភាព៖ AFP
×![]()
បុរីវ៉ាទីកង់ នៅថ្ងៃទី៣០ ខែកញ្ញាបានប្រកាសបដិសេធសំណើរបស់រដ្ឋមន្ត្រីការបរទេសអាមេរិកម៉ៃ ប៉ុមប៉េអូ ដើម្បីចូលគាល់សម្ដេចប៉ាបហ្វ្រង់ស៊ីស បុរីរដ្ឋមួយនេះអះអាងថា ប្រមុខការបរទេសអាមេរិក ព្យាយាមទាញវិហារគ្រឹស្តសាសនាឲ្យជាប់ពាក់ព័ន្ធជាមួយនឹងការបោះឆ្នោតនៅអាមេរិក និងជម្លោះជាមួយចិន។
បុរីវ៉ាទីកង់ ដែលជាតំណាងនៃវិហារសាសនានិកាយកាតូលិកទូទាំងពិភពលោក នៅថ្ងៃទី៣០ខែកញ្ញា បានបដិសេធជំនួបជាមួយរដ្ឋមន្ត្រីការបរទេសអាមេរិក ដោយមិនចង់ពាក់ព័ន្ធនឹងនយោបាយអាមេរិក និងក្រោយប្រមុខការទូតអាមេរិក រិះគន់កិច្ចព្រមព្រៀងរវាងបុរីវ៉ាទីកង់ និងចិន។ នេះយោងតាមទីភ្នាក់ងារព័ត៌មាន Reuters ។
លោក ប៉ុមប៉េអូ ទៅដល់ទីក្រុងរ៉ូមនៅថ្ងៃទី៣០ ខែកញ្ញា ហើយគ្រោងមានជំនួបជាមួយមន្ត្រីបុរីវ៉ាទីកង់នៅថ្ងៃទី១ ខែតុលា។ ប៉ុន្តែលោក នឹងមិនបានជួបសម្ដេចប៉ាបហ្វ្រង់ស៊ីសឡើយ។ មន្ត្រីជាន់ខ្ពស់បុរីវ៉ាទីកង់ពីររូប បានអះអាងថាសម្តេចសង្ឃប៉ាបហ្វ្រង់ស៊ីស បដិសេធជំនួបជាមួយអ្នកនយោបាយ មុនពេលបោះឆ្នោតអាមេរិក។
«សម្តេចសង្ឃមានបន្ទូលច្បាស់ថា នឹងមិនទទួលជំនួបជាមួយអ្នកនយោបាយឡើយ អំឡុងពេលបោះឆ្នោត»។ រដ្ឋមន្ត្រីទទួលបន្ទុកការិយាធិបតេយ្យ កិច្ចការនយោបាយ និងការបរទេសបុរីវ៉ាទីកង់ Pietro Parolin បញ្ជាក់បែបនេះ។
នាពេលកន្លងមក លោក ប៉ុមប៉េអូ បានរិះគន់សេរីភាពសាសនានៅចិន និងទំនាក់ទំនងរវាងចិន និងបុរីវ៉ាទីកង់ ក្នុងសំណេរអត្ថបទ និងនៅលើបណ្តាញសង្គម Twitter របស់លោក។ លោកអះអាងថា បុរីវ៉ាទីកង់ នឹងធ្វើឲ្យអន្តរាយដល់អំណាចសីលធម៌របស់ខ្លួន ដោយបន្តកិច្ចព្រមព្រៀងជាមួយចិន ក្នុងការតែងតាំងមន្ត្រីគ្រឹស្តសាសនានិកាយកាតូលិកនៅចិន។
បុរីវ៉ាទីកង់ និងចិនមានកិច្ចព្រមព្រៀងរយៈពេល២ឆ្នាំ ដែលផ្តល់អំណាចមួយចំនួនឲ្យសម្តេចប៉ាប ក្នុងការតែងតាំងមន្ត្រីគ្រិស្តសាសនាកាតូលិកដឹកនាំវិហារចិន។ កិច្ចព្រមព្រៀងខាងលើនេះ នឹងត្រូវបញ្ចប់នៅខែក្រោយ តែត្រូវបានរំពឹងថានឹងបន្តសុពលភាពជាថ្មី។ សម្រាប់បុរីវ៉ាទីកង់ កិច្ចព្រមព្រៀងនេះមិនល្អឥតខ្ចោះនោះទេ តែយ៉ាងហោចណាស់វាប្រសើរជាងមុន ដ្បិតអីគ្រឹស្តសាសនិកនៅចិនដែលរងការគាបសង្កត់ដោយចិននោះ លែងត្រូវបិទបាំងពីជំនឿរបស់ខ្លួនដូចដែលធ្លាប់ធ្វើរាប់សិបឆ្នាំមុន។
លោក Parolin និងរដ្ឋមន្ត្រីការបរទេសបុរីវ៉ាទីកង់ Paul Gallagher លើកឡើងថា ការរិះគន់ទៅលើកិច្ចព្រមព្រៀងដោយប្រមុខការបរទេសអាមេរិក គឺជារឿងគួរឲ្យភ្ញាក់ផ្អើល ជាពិសេសមុនជំនួបជាមួយមន្ត្រីសង្ឃវ៉ាទីកង់។ លោកParolin បន្ថែមថាកិច្ចព្រមព្រៀងខាងលើពុំមានទាក់ទងអ្វីជាមួយនយោបាយអាមេរិកឡើយ ដោយនេះជាកិច្ចការរបស់វិហារកាតូលិក នឹងមិនត្រូវយកមកបម្រើប្រយោជន៍នយោបាយឡើយ។
បុរីវ៉ាទីកង់ មិនមានទំនាក់ទំនងការទូតជាមួយចិនឡើយ ដោយនៅបន្តទទួលស្គាល់កោះតៃវ៉ាន់។ ប៉ុន្តែកិច្ចព្រមព្រៀងខាងលើ ធ្វើឲ្យមានក្ដីបារម្ភពីសំណាក់ក្រុងតៃប៉ិ ព្រោះអាចជាការចាប់ផ្ដើមបោះជំហានទៅរកទំនាក់ទំនងផ្លូវការ៕
Tag:
អាមេរិក
បុរីវ៉ាទីកង់
© រក្សាសិទ្ធិដោយ thmeythmey.com
