ជាតិ
ភាជន៍ទាំង២៨៤ ដែលរឹបអូសពីជនជាតិវៀតណាម មានអាយុចន្លោះពីស.វ.ទី១៥ដល់១៧នៃគ.ស. រូបពីហ្វេសប៊ុកក្រសួងវប្បធម៌ និងវិចិត្រសិល្បៈ
× ភ្នំពេញ៖ ក្រោយពីបានពិនិត្យ និងវាយតម្លៃយ៉ាងល្អិតល្អន់ ក្រុមអ្នកជំនាញបានសន្និដ្ឋានថា ភាជន៍ទាំង២៨៤ ដែលរឹបអូសពីជនជាតិវៀតណាមនោះ គឺជាភាជន៍បុរាណ មានអាយុកាលក្នុងចន្លោះពីស.វ.ទី១៥ ដល់១៧នៃគ.ស.។ នេះបើយោងតាមការផ្សាយរបស់ទំព័រហ្វេសប៊ុកផ្លូវការរបស់ក្រសួងវប្បធម៌ និងវិចិត្រសិល្បៈ។
យោងតាមហ្វេសប៊ុកផ្លូវការរបស់ក្រសួងវប្បធម៌ និងវិចិត្រសិល្បៈ កាលព្រឹកថ្ងៃទី២៩ ខែកញ្ញា ឆ្នាំ២០២០ ក្រុមការងារនៃអគ្គនាយកដ្ឋានបេតិកភណ្ឌ នៃក្រសួងវប្បធម៌ និងវិចិត្រសិល្បៈ បានសហការជាមួយមន្ទីរវប្បធម៌ និងវិចិត្រសិល្បៈខេត្តព្រះសីហនុ បានចុះពិនិត្យ វាយតម្លៃ កុលាលភាជន៍ទាំង២៨៤ ដែលបញ្ជាការដ្ឋានកងរាជអាវុធហត្ថខេត្តព្រះសីហនុរឹបអូស បានពីជនជាតិវៀតណាម ឈ្មោះ ឡេ វាន់ហួន។
តាមសេចក្ដីសម្រេចរបស់ព្រះរាជអាជ្ញារង និងលោក ហេង ប៊ុនទី មេបញ្ជាការអាវុធហត្ថខេត្ត បានប្រគល់កុលាលភាជន៍ទាំង២៨៤នោះ ជូនមន្ទីរវប្បធម៌ខេត្ត យកទៅរក្សាទុកជាសម្បត្តិវប្បធម៌ជាតិ។ ចំណែកឯជនសង្ស័យឈ្មោះ ឡេ វាន់ហួន ត្រូវបានសមត្ថកិច្ចឃាត់ខ្លួនជាបណ្ដោះអាសន្ន ដើម្បីបន្តនិតិវិធីតាមផ្លូវច្បាប់៕
Tag:
វប្បធម៌
ភាជន៍
កុលាលភាជន៍
វប្បធម៌
សិល្បៈ
បុរាណ
វត្ថុបុរាណ
© រក្សាសិទ្ធិដោយ thmeythmey.com