លោក សួង ម៉ារឌី៖ អ្នកថតរូបរួមចំណែកផ្សព្វផ្សាយទេសចរណ៍ និងវប្បធម៌ខ្មែរច្រើន

ជាតិ

បទសម្ភាសន៍

វីដេអូ

លោក សួង ម៉ារឌី៖ អ្នកថតរូបរួមចំណែកផ្សព្វផ្សាយទេសចរណ៍ និងវប្បធម៌ខ្មែរច្រើន

01, Oct 2020 , 11:29 pm

រូបភាព

ដោយ: ផាត ដាណេ

ភ្នំពេញ៖ លោក សួង ម៉ារឌី ជាអ្នកជំនាញថតរូបម្នាក់ ដែលបានចំណាយពេលជាច្រើនឆ្នាំមកហើយ ក្នុងការផលិតយកទិដ្ឋភាពស្អាតៗ នៅតាមតំបន់ទេសចរណ៍នានា មកផ្សព្វផ្សាយពីទេសចរណ៍ និងវប្បធម៌កម្ពុជា។ លោក សប្បាយចិត្ត ដែលបច្ចុប្បន្នមានអ្នកចូលចិត្ត និងចាប់យកវិស័យថតរូបនេះច្រើន ហើយជាពិសេសទេសចរណ៍ និងវប្បធម៌កម្ពុជា ត្រូវបានផ្សព្វផ្សាយ និងពិភពលោកស្គាល់កាន់តែច្រើន តាមរយៈរូបថតទាំងអស់នោះ។

រយៈពេល១០ឆ្នាំហើយ ដែលលោក សួង ម៉ារឌី បានចំណាយពេលដើម្បីថតរូបទេសភាព នៅតាមតំបន់ទេសចរណ៍នានា ក្នុងប្រទេសកម្ពុជា។ នៅពេលលោក ចាប់ផ្តើមជំនាញនេះលើកដំបូង វាពិតជាពិបាកខ្លាំងណាស់សម្រាប់រូបលោក ព្រោះមិនសូវមានមនុស្សចាប់អារម្មណ៍ ហើយរូបលោក ផ្ទាល់ក៏មិនទទួលបានចំណូល ពីអាជីពមួយនេះដែរ។ លោក ព្យាយាមខ្លាំងមែន លើអាជីពជាអ្នកថតរូបនេះ ព្រោះលោក ស្រឡាញ់ និងចង់លើកកម្ពស់វិស័យទេសចរណ៍តាមរយៈស្នាដៃរបស់ខ្លួនផងដែរ។

លោក ម៉ារឌី ប្រាប់ ThmeyThmey25 ដូច្នេះថា៖«ខ្ញុំចង់ទៅគាស់រំលើង ក៏ដូចជាទៅចាប់យករូបភាពដែលកម្រ ដែលប្រជាជនយើងទៅអត់ដល់ ក៏ដូចជាអ្វីដែលស្អាត ដែលគាត់ទៅដែរមើលទៅអត់ឃើញយើងមើលឃើញ។ ចឹងឃើញអ្នកថតរូបគាត់មើលឃើញថាកន្លែងហ្នឹងត្រូវថតម៉េចឲ្យស្អាត ចឹងយើងទៅយកអាអស់ហ្នឹង ដើម្បីផ្សព្វផ្សាយទៅដល់សហគមន៍ក្នុងប្រទេស ក៏ដូចជាសហគមន៍ខាងក្រៅប្រទេស បានន័យថាភ្ញៀវជាតិ និងអន្តរជាតិ»។

លោក បន្តថា ប្រជាសហគមន៍នៅទីនោះ នឹងទទួលបានចំណូលពីភ្ញៀវទេសចរតាមរយៈ ការនាំភ្ញៀវ ដឹកភ្ញៀវ និងធ្វើម្ហូបអាហារដល់ភ្ញៀវទេសចរជាដើម។ លើសពីនោះទៅទៀត ប្រជាជននឹងអាចផ្លាស់ប្ដូរឥរិយាបថរបស់ខ្លួន ពីការកាប់បំផ្លាញព្រៃឈើ ដែលជាសម្បត្តិធម្មជាតិ មកធ្វើការងារទេសចរណ៍វិញ ដោយគ្មានក្ដីបារម្ភពីការខុសច្បាប់។

បច្ចុប្បន្ន ការថតរូបភាពឃើញថា មានយុវជនចាប់អារម្មណ៍ និងចូលចិត្តច្រើន ដែលធ្វើឲ្យលោក សួង ម៉ារឌី សប្បាយចិត្តខ្លាំង ព្រោះតាមរយៈរូបភាពស្អាតៗទាំងអស់នេះ គឺបានរួមចំណែកយ៉ាងច្រើនដល់វិស័យទេសចរណ៍។ លោក ចង់ឲ្យមានអ្នកថតរូបច្រើន ដើម្បីជាចំណែកចូលរួមផ្សព្វផ្សាយទេសចរណ៍ក្នុងស្រុកឲ្យកាន់តែទូលំទូលាយ៕