កីឡាអន្តរជាតិ
អន្តរជាតិ
Messi និង Ronaldo ប៉ះគ្នាជាថ្មីនៅ UCL ឯ Man Utd ជួប PSG
× Lionel Messi និង Cristiano Ronaldo នឹងត្រូវធ្វើព្យុះភ្លៀងជាមួយគ្នាក្នុងពានរង្វាន់ UEFA Champions League ជាថ្មីនៅរដូវកាល ២០២០-២១ នេះ បន្ទាប់ពី Barcelona និង Juventus បានចាប់ឆ្នោតនៅពូល G ជាមួយគ្នា។
នាការចាប់ឆ្នោតរើសពូលការប្រកួត UEFA Champions League រដូវកាលថ្មី ២០២០-២១ ដែលធ្វើឡើងនៅយប់ថ្ងៃទី១ ខែតុលា ក្រុមយក្សអេស្ប៉ាញ Barcelona និងក្រុមយក្សអ៊ីតាលី Juventus ស្ថិតក្នុងពូល G ជាមួយគ្នា រួមជាមួយ Dynamo Kiev (អ៊ុយក្រែន) និង Ferencvaros (ហុងគ្រី)។
Bayern Munich ម្ចាស់ជើងឯករដូវកាលមុនស្ថិតក្នុងពូល A ត្រូវតតាំងជាមួយ Atletico Madrid (អេស្ប៉ាញ), Salzburg (អូទ្រីស) និង Lokomotiv Moskva (រុស្ស៊ី)។
Paris Saint-Germain ក្រុមរងជើងឯក ស្ថិតក្នុងពូល H ជាមួយ Manchester United (អង់គ្លេស), RB Leipzig (អាល្លឺម៉ង់)និង Istanbul Basaksehir (តួកគី)។ ខណៈ Liverpool ត្រូវប្រជែងជាមួយក្រុម Ajax (ហូឡង់), Atalanta (អ៊ីតាលី) និង Midtjylland (ដាណឺម៉ាក) ក្នុងពូល D។
Real Madrid ម្ចាស់ពានកំពូលអឺរ៉ុបច្រើនជាងគេ ស្ថិតនៅក្នុងពូល B ជាមួយ Shakhtar Donetsk (អ៊ុយក្រែន), Inter Milan (អ៊ីតាលី) និង Borussia Monchengladbach (អាល្លឺម៉ង់)។ Sevilla ដែលជាម្ចាស់ជើងឯក Europa League រដូវកាលមុន ត្រូវប៉ះ Chelsea (អង់គ្លេស) Krasnodar (រុស្ស៊ី) និង Rennes (បារាំង) ក្នុងពូល E ។
ពូល C រួមមាន Manchester City (អង់គ្លេស), Porto (ព័រទុយហ្គាល់), Olympiacos (ក្រិក) និង Marseille (បារាំង)។ រីឯ Zenit (រុស្ស៊ី), Borussia Dortmund (អាល្លឺម៉ង់) និង Lazio (អ៊ីតាលី)ចូលរួមជាមួយ Club Brugge (បែលហ្ស៊ិក) ក្នុងពូល F។
ការប្រកួតវគ្គជម្រុះតាមពូលនេះ នឹងចាប់ផ្តើមការប្រកួតនៅថ្ងៃទី២០ ខែតុលា ឆ្នាំ២០២០ តទៅខណៈជំនួបផ្តាច់ព្រ័ត្រនឹងត្រូវធ្វើឡើងនៅពហុកីឡដ្ឋានជាតិ Ataturk Olympic ក្នុងទីក្រុងអ៊ីស្តង់ប៊ុល ប្រទេសតួកគីនាថ្ងៃទី២៩ ខែឧសភាឆ្នាំ ២០២១៕
© រក្សាសិទ្ធិដោយ thmeythmey.com