កីឡាអន្តរជាតិ
អន្តរជាតិ
UEFA អនុញ្ញាតឲ្យអ្នកគាំទ្រ៣០ភាគរយចូលកីឡដ្ឋានវិញ នៅតំបន់អឺរ៉ុប
× សហព័ន្ធកីឡាបាល់ទាត់ទ្វីបអឺរ៉ុប (UEFA) បានអនុញ្ញាតឲ្យអ្នកគាំទ្រចូលទស្សនាការប្រកួតក្នុងតំបន់អឺរ៉ុប និងការប្រកួតរបស់ក្រុមជម្រើសជាតិដោយកំណត់ត្រឹម៣០ភាគរយ នៃចំនួនកៅអីសរុបក្នុងកីឡដ្ឋាន។ យ៉ាងណាក៏ដោយ អាជ្ញាធរមូលដ្ឋាន ជាអ្នកអារកាត់ចុងក្រោយលើរឿងនេះ ប្រសិនពួកគេភ័យខ្លាចមានករណីឆ្លង COVID-19។
ការប្រកាសរបស់ UEFA នៅថ្ងៃទី១ ខែតុលា ធ្វើឡើងបន្ទាប់ពី UEFA ផ្ទាល់មើលឃើញពីភាពជោគជ័យក្នុងការរៀបចំឲ្យមានអ្នកគាំទ្រចូលទស្សនានាការប្រកួតរវាង Bayern Munich ទល់នឹង Sevilla ពានរង្វាន់ Super Cup ក្នុងក្រុង Budapest ប្រទេសហុងគ្រី កាលពីថ្ងៃទី២៤ កញ្ញាកន្លងទៅ។
បើទោះជាប្រកាសពីការអនុញ្ញាតបែបនេះក៏ដោយ ប៉ុន្តែស្ថាប័នគ្រប់គ្រងកីឡាបាល់ទាត់អឺរ៉ុបបានកម្រិតចំនួនអ្នកគាំទ្រត្រឹម៣០ភាគរយប៉ុណ្ណោះដើម្បីរក្សាគម្លាតសុវត្ថិភាព ហើយការឲ្យមានអ្នកគាំទ្រចូលកីឡដ្ឋាន ឬអត់នោះក៏នឹងអាស្រ័យលើការសម្រេចចិត្តរបស់អាជ្ញាធរតាមតំបន់ដែលជាម្ចាស់ផ្ទះផងដែរ។
លោក Aleksander Ceferin ប្រធាន UEFA ក៏បានអះអាងដែរថា មានប្រទេសនៅអឺរ៉ុបចំនួន ២៧ហើយ បានអនុញ្ញាតឲ្យអ្នកគាំទ្រចូលកីឡាដ្ឋានវិញដោយមានការកម្រិតចំនួនអ្នកទស្សនា និងគោរពតាមគោលការណ៍សុវត្ថិភាពរបស់ក្រសួងសុខាភិបាលប្រទេសខ្លួន។
ព្រឹត្តិការណ៍កីឡាបាល់ទាត់បានផ្អាកការប្រកួតកាលពីខែមីនា ដោយសារការរាតត្បាតនៃជំងឺ COVID-19 មុនសម្រេចឲ្យដំណើរការប្រកួតឡើងវិញនៅខែមិថុនាដោយបិទទ្វារកីឡដ្ឋាន៕
© រក្សាសិទ្ធិដោយ thmeythmey.com