កីឡាជាតិ
ជាតិ
ពីរគូ ត្រូវប្រជែងគ្នាក្នុងពានរង្វាន់លីគកំពូល ថ្ងៃនេះ អ្នកចាំទី គង់ រ៉ាហ្វាត់ (ឆ្វេង) និងកីឡាករ ដាវ នីម របស់ក្លិបគីរីវង់សុខសែនជ័យ
× ការប្រកួតបាល់ទាត់ដណ្តើមពានរង្វាន់ក្របខណ្ឌមិត្តហ្វូនខេមបូឌានលីគនៅថ្ងៃសៅរ៍ ទី៣ តុលា ឆ្នាំ២០២០ នេះ មានការប្រកួតចំនួនពីរគូ ក្នុងនោះក្រុមគីរីវង់សុខសែនជ័យ បើកទ្វារកីឡដ្ឋានខ្លួន ទទួលភ្ញៀវអគ្គិសនីកម្ពុជា ស្របពេលយុវជនអាយុក្រោម១៨ឆ្នាំបាទីប៉ះនគរបាលជាតិ។ ការប្រកួតទាំងពីរធ្វើឡើងនៅម៉ោង៣:៣០នាទីរសៀលដូចគ្នា។
ក្រុមគីរីវង់សុខសែនជ័យ ត្រូវការឈ្នះអគ្គិសនីកម្ពុជានៅថ្ងៃនេះ ដើម្បីបាន៣ពិន្ទុបន្ថែមក្នុងការពង្រឹងទីតាំង ដែលខ្លួនកំពុងឈរលេខ៨មាន១៧ពិន្ទុ។ កាលជើងទី១ក្រុមមានមូលដ្ឋាននៅខេត្តតាកែវមួយនេះ បានបញ្ចប់ក្នុងលទ្ធផលស្មើ ២-២ ជាមួយអគ្គិសនីកម្ពុជា ដែលកំពុងឈរលេខរៀងទី១១ មាន១០ពិន្ទុ។
ការប្រកួតនេះអាចក្លាយជាជំនួបដ៏តានតឹង ដ្បិតអគ្គិសនីកម្ពុជា ក៏ត្រូវការឈ្នះ ដើម្បីគេចផុតពីការកាត់ចេញពីក្របខណ្ឌមិត្តហ្វូនខេមបូឌានលីគនៅរដូវកាលនេះ។ គណៈកម្មការប្រកួតបាល់ទាត់ជាតិកម្ពុជា សម្រេចកាត់ក្រុមដែលមានពិន្ទុទាបជាងចំនួនមួយចេញពីក្របខណ្ឌលីគកំពូលនៅរដូវកាលនេះ។ ប៉ុន្តែបើក្រុមយុវជនអាយុក្រោម១៨ឆ្នាំបាទីមានពិន្ទុទាបជាងគេ នោះក្រុមដែលត្រូវកាត់ចេញ គឺក្រុមឈរលេខរៀងពីលើបន្ទាប់។
ក្រោយស្គាល់ជ័យជម្នះលើកដំបូង ២-១ លើក្រុមអាស៊ីអឺរ៉ុប ក្រុមយុវជនអាយុក្រោម១៨ឆ្នាំបាទី ដែលសហព័ន្ធកីឡាបាល់ទាត់កម្ពុជាដាក់ឲ្យប្រកួតក្នុងលីគកំពូល ដើម្បីដកស្រង់បទពិសោធ ត្រូវតទល់ជាមួយគរបាលជាតិវេលាម៉ោង៣:៣០នាទីរសៀលនៅកីឡដ្ឋានមជ្ឈមណ្ឌលសាលាបាល់ទាត់ជាតិបាទី។ កាលជើងទី១ ក្រុមទាំងពីរបានបញ្ចប់ក្នុងលទ្ធផលស្មើ ១-១។
បច្ចុប្បន្នយុវជនបាទីឈរបាតតារាងមាន៦ពិន្ទុ ខណៈនគរបាលជាតិឈរលេខរៀងទី១០មាន១១ពិន្ទុ៕
Tag:
បាល់ទាត់
Cambodian League 2020
© រក្សាសិទ្ធិដោយ thmeythmey.com