អន្តរជាតិ
ទីម័រខាងកើត ចាប់ផ្ដើមនីតិវិធីចូលអង្គការពាណិជ្ជកម្មពិភពលោកដើម្បីជំរុញឱកាសចូលអាស៊ាន
ក្មេងប្រុសម្នាក់កាន់ទង់ជាតិទីម័រខាងកើត។ រូបភាព AFP
×![]()
ដោយ: តន ចាន់រិទ្ធារ៉ា
ទីម័រខាងកើត នៅថ្ងៃទី២ ខែតុលា បានចាប់ផ្ដើមការចរចាផ្លូវការដើម្បីចូលរួមក្នុងអង្គការពាណិជ្ជកម្មពិភពលោក (WTO) សំដៅជំរុញការដោះដូរពាណិជ្ជកម្ម និងការលើកកម្ពស់សេដ្ឋកិច្ច។ មន្ត្រីទីម័រខាងកើតអះអាងថា ការចូលរួមក្នុងអង្គការអន្តរជាតិមួយនេះ ក៏នឹងជួយដល់ការក្លាយជាសមាជិកសមាគមរដ្ឋនៅអាស៊ីអាគ្នេយ៍ផងដែរ។
កិច្ចប្រជុំក្រុមការងារចម្រុះលើកទីមួយដើម្បីបើកផ្លូវឲ្យទីម័រខាងកើតក្លាយជាសមាជិកអង្គការពាណិជ្ជកម្មពិភពលោក បានចាប់ផ្ដើមនៅថ្ងៃទី២ ខែតុលា ដែលជាសញ្ញាពីការចាប់ផ្ដើមការចរចាជាផ្លូវការលើសមាជិកភាពរបស់ទីម័រខាងកើតដែលជារដ្ឋក្រីក្រៅមួយនៅតំបន់អាស៊ីអាគ្នេយ៍។ នេះបើតាមការប្រកាសរបស់ WTO ។
ក្នុងសេចក្ដីប្រកាសរបស់ WTO ប្រទេសជាសមាជិកបានគាំទ្រ និងកោតសរសើរការងារដែលធ្វើបានដោយអាជ្ញាធរនៃរដ្ឋាភិបាលប្រទេសនិយាយភាសាព័រទុយហ្កាល់មួយនេះ។ លោក Joaquim Amaral រដ្ឋមន្ត្រីសម្របសម្រួលកិច្ចការសេដ្ឋកិច្ចរបស់ទីម័រខាងកើតនិយាយថា ការចូលរួមក្នុង WTO នឹងជំរុញកំណើនសេដ្ឋកិច្ចរបស់ទីម័រខាងកើត និងការធ្វើពិពិធកម្មសេដ្ឋកិច្ចឲ្យបានកាន់តែប្រសើរឡើងផងដែរ។
«វាក៏ក្លាយជាការបោះជំហានដ៏សំខាន់សម្រាប់ទីម័រខាងកើតក្នុងការក្លាយជាសមាជិកអាស៊ានផងដែរ។» លោក Amaral បញ្ជាក់បែបនេះក្នុងសុន្ទរកថាតាមប្រព័ន្ធវីដេអូ។ ទីម័រខាងកើត កំពុងចរចាដើម្បីក្លាយជាសមាជិកទី១១ របស់អាស៊ាន ដោយប្រទេសសមាជិកជាច្រើនបានគាំទ្រ ទោះមានក្ដីបារម្ភថា ប្រទេសក្បែរខាងរបស់ឥណ្ឌូណេស៊ីមួយនេះ មិនទាន់លទ្ធភាពក្ដី។
រដ្ឋមន្ត្រីទីម័រខាងកើតបន្តថា ប្រទេសរបស់លោកប្ដេជ្ញាចិត្តពេញលេញក្នុងការកែទម្រង់រចនាសម្ព័ន្ធ ច្បាប់ និងគោលនយោបាយឲ្យស្របតាមបទបញ្ញត្តិរបស់ WTO ។ ដំណើរការចូលជាសមាជិក WTO ត្រូវបានចំណាយពេលយូរគួរសម។ កិច្ចប្រជុំទាក់ទងការសុំចូលរបស់ទីម័រខាងកើត ទំនងជាចាប់ផ្ដើមនៅដើមឆ្នាំ២០២១ខាងមុខ។
ទីម័រខាងកើត ជាប្រទេក្មេងខ្ចីមួយរបស់ពិភពលោក។ ជាអតីតរដ្ឋក្រោមអាណានិគមព័រទុយហ្កាល់ ទីម័រខាងកើត បន្តស្ថិតក្រោមការគ្រប់គ្រងរបស់ឥណ្ឌូណេស៊ី មុននឹងក្លាយជារដ្ឋឯករាជ្យនៅឆ្នាំ២០០២ ៕
Tag:
ទីម័រខាងកើត
WTO
អាស៊ាន
© រក្សាសិទ្ធិដោយ thmeythmey.com
