ហាងតែគជ់ដ៏ល្បីពីតៃវ៉ាន់ គ្រាន់តែមកដល់កម្ពុជា ក៏មានមហិច្ឆតាពង្រីកទីផ្សារភ្លាម

អត្ថបទពាណិជ្ជកម្ម

ហាងតែគជ់ដ៏ល្បីពីតៃវ៉ាន់ គ្រាន់តែមកដល់កម្ពុជា ក៏មានមហិច្ឆតាពង្រីកទីផ្សារភ្លាម

04, Oct 2020 , 4:19 pm

រូបភាព

ដោយ: សារព័ត៌មានថ្មីៗ

ហាងតែគជ់ល្បីឈ្មោះមួយមកពីកោះតៃវ៉ាន់ ដែលមានយីហោ One Zo (វ័ន ហ្សូ) បានចាប់ផ្ដើមដំណើរការទីតាំងទី១របស់ខ្លួននៅកម្ពុជា តាមបណ្ដោយផ្លូវកម្ពុជាក្រោម ក្នុងរាជធានីភ្នំពេញ ហើយគ្រាន់តែចាប់ផ្ដើមបើកដំណើរការនៅកម្ពុជាភ្លាម ម្ចាស់អាជីវកម្មនេះ បានប្រកាសថា នឹងស្វែងរកទីតាំងដើម្បីបើកដំណើរបន្តបន្ទាប់ទៀតនៅក្នុងប្រទេសកម្ពុជា ដោយសារតែមានសុទិដ្ឋិនិយមចំពោះទីផ្សារក្នុងប្រទេសកម្ពុជាពីតម្រូវការរបស់ប្រជាពលរដ្ឋ ។

ហាងតែគជ់ One Zo នៅតាមបណ្តោយផ្លូវកម្ពុជាក្រោម ត្រូវបានសម្ពោធជាផ្លូវការ កាលពីថ្ងៃទី២ ខែតុលា ២០២០។ លោក ខេវិន នាយកគ្រប់គ្រងហាងតែគជ់ One Zo ប្រចាំប្រទេសកម្ពុជា ថ្លែងក្នុងពិធីសម្ពោធថា ហាងតែគជ់ One Zo ជាហាងដែលបង្កើតឡើងនៅតៃវ៉ាន់ តាំងពីឆ្នាំ ២០១៥ ប៉ុន្តែអាជីវកម្មនេះ ទទួលបានការគាំទ្រយ៉ាងច្រើនពីសំណាក់ប្រជាជនទាំងនៅតៃវ៉ាន់ផ្ទាល់និងនៅអន្តរជាតិ។

លោក បន្តថា រហូតមកដល់ពេលនេះ One Zo បានពង្រីកទៅដល់ប្រទេសជាច្រើនរួមមានសហរដ្ឋអាមេរិក ហ្វីលីពីន វៀតណាម ថៃ សិង្ហបុរី ម៉ាឡេស៊ី កាណាដា អាល្លឺម៉ង់ នូវែលសេឡង់ អូស្ត្រាលី និង ប្រទេសជាច្រើនទៀត ហើយហាងតែគជ់ One Zo ក៏បានមើលពីសក្ដានុពលទីផ្សារក្នុងប្រទេសកម្ពុជា ទើបខ្លួនសម្រេចបើកដំណើរការ និងមានបំណងបើកបន្តបន្ទាប់នៅពេលអនាគត។

សម្រាប់ប្រទេសកម្ពុជា លោក មើលឃើញថា គឺនៅមានសក្ដានុពលខ្ពស់ក្នុងការពង្រីកទីផ្សារ ហើយទីតាំងដំបូងនេះ គឺជាទីតាំងដែលល្អបំផុត ដោយសារតែវានៅចំចំណុចកណ្ដាលនៃទីប្រជុំសិស្សនិស្សិត និងអាជីវករ ដោយក្នុងហាងមានកន្លែងសម្រាប់សិស្សនិស្សិតអង្គុយសិក្សា ក៏ដូចជាអ្នកធ្វើការ អាចមកធ្វើការនៅក្នុងហាងក៏បានដែរ។ លោក បន្ថែមថា អ្វីដែលសំខាន់សម្រាប់ហាងតែគជ់ One Zo គឺធ្វើដោយដៃពិតៗ នៅក្នុងហាងដោយផ្ទាល់ ហើយវាក៏អាចជាភេសជ្ជៈជំនួយសុខភាពដល់អ្នកទទួលទានផងដែរ។

លោក មានប្រសាសន៍ទៀតថា វត្តមានរបស់ហាងតែគជ់ One Zo នៅកម្ពុជា និងចូលរួមចំណែកដល់សេដ្ឋកិច្ចកម្ពុជាតាមរយៈការបង្កើតហាងសម្បូរបែប មានម៉ាកយីហោក្នុងប្រទេសដើម្បីបម្រើសេវាជូនដល់ភ្ញៀវទេសចរអន្តរជាតិក៏ដូចជាប្រជាជនកម្ពុជាផ្ទាល់តែម្ដង។ ក្រៅពីនេះក៏បានបង្កើតឱកាសការងារដល់ប្រជាពលរដ្ឋតាមរយៈបុគ្គលិកបម្រើការនៅក្នុងហាង ហើយអ្វីដែលពិសេសនោះ គឺការផ្ដល់ជំនាញដល់បុគ្គលិកក្នុងហាងទៀតផង។

ជាការកត់សម្គាល់ បើទោះបីជាកម្ពុជា និងពិភពលោកជួបវិបត្តិដោយសារតែជំងឺកូវីដ-១៩ក្ដី តែសកម្មភាពវិនិយោគនិងអាជីវកម្មនានានិងថ្មីៗពីបរទេសនោះ នៅតែបន្តចូលមកកម្ពុជា លើវិស័យជាច្រើន។ ដោយឡែកវិស័យភេសជ្ជៈក្នុងប្រទេសកម្ពុជា រយៈពេលប៉ុន្មានឆ្នាំមកនេះ ក៏ឃើញថាមានម៉ាកយីហោល្បីៗជាច្រើនចាប់ផ្ដើមចូលមកបើកអាជីវកម្មជាបន្តបន្ទាប់ ធ្វើឲ្យកម្ពុជាកាន់តែមានម៉ាកយីហោអន្តរជាតិកាន់តែច្រើន៕