កីឡាអន្តរជាតិ
អន្តរជាតិ
Mourinho ថា ៦-១ មិនអាចបំផ្លាញ Solskjaer និង Man Utd បានឡើយ
× Manchester United ទទួលបានបរាជ័យយ៉ាងចាស់ដៃក្នុងផ្ទះខ្លួនឯងក្រោមថ្វីជើង Tottenham Hotspur ក្នុងលទ្ធផល ៦-១។ យ៉ាងណា លោក Jose Mourinho ជឿថា លទ្ធផលនេះ មិនអាចបំផ្លាញលោក Ole Gunnar Solskjaer និងក្រុមរបស់គាត់នោះឡើយ។
នាការប្រកួតក្របខណ្ឌ Premier League ក្នុងកីឡដ្ឋាន Old Trafford នៅយប់ថ្ងៃទី៤ ខែកញ្ញា Manchester United ដែលសល់គ្នា១០នាក់ ក្រោយ Anthony Martial ទទួលកាតក្រហម បានចាញ់ភ្ញៀវ Spurs ដល់ទៅ ៦-១។ បិសាចក្រហមរកគ្រាប់បាល់នាំមុខដោយខ្សែបម្រើ Bruno Fernandes ទាត់បាល់ពិន័យប៉េណាល់ទី មុនពេល Tanguy Ndombele, Son Heung-min និង Harry Kane (២គ្រាប់ម្នាក់ដូចគ្នា), និង Serge Aurier រកគ្រាប់រៀងៗខ្លួនសម្រាប់ក្រុមលោក Mourinho។
នេះជាបរាជ័យធ្ងន់ធ្ងរនៅផ្ទះខ្លួនឯងក្នុងការប្រកួតលីគកំពូលអង់គ្លេសរបស់ Man Utd ចាប់តាំងពីពួកគេចាត់ Manchester City ៦-១ កាលពីឆ្នាំ ២០១១មក។ មិនតែប៉ុណ្ណោះនេះក៏ជាកំណត់ត្រាអាក្រក់សម្រាប់លោក Solskjaer ផងដែរ ដែលដឹកនាំក្រុមបិសាចក្រហមត្រឹម៣ប្រកួតដំបូងរបូតគ្រាប់បាល់ដល់ទៅ១១គ្រាប់។
ស្របពេលគ្នានេះ លោក Mourinho ដែលដឹកនាំក្រុមរហស្សនាមមាន់ខ្នាយមាសទទួលបានលទ្ធផលចាស់ដៃលើអតីតក្រុមខ្លួន យល់ថាភាពអាម៉ាសនេះនឹងធ្វើឲ្យលោក Solskjaer បង្កើនភាពជឿជាក់ក្នុងការដឹកនាំ Man Utd ទៅកាន់កម្រិតកំពូលក្នុងលីគអង់គ្លេសនេះ។
អ្នកចាត់ការសញ្ជាតិព័រទុយហ្គាល់ដែលចាកចេញពី Old Trafford ហើយជំនួសដោយអ្នកចាត់ការន័រវែសនៅឆ្នាំ២០១៨ បានប្រាប់អ្នកយកព័ត៌មានក្រោយចប់ការប្រកួតថា៖« ខ្ញុំមានការអាណិតអាសូរចំពោះ Solskjaer ដោយសារតែលទ្ធផលនេះ។ ខ្ញុំមិនចាំទេថាខ្ញុំធ្លាប់ចាញ់៦គ្រាប់ ៥ ឬ ៤ ហើយខ្ញុំដឹងថាវាឈឺចាប់យ៉ាងម៉េច»។
ផ្ទុយពីការអាណិត Mourinho យល់ឃើញថា Man Utd កំពុងមានការវិវឌ្ឍន៍ដ៏ខ្លាំងក្លា។ « Solskjaer មកដល់ទីនេះមិនមែនក្រុមគ្មានភាពប្រសើរឡើងទេ។ ក្រុមនេះកំពុងរីកចម្រើន ពួកគេមានកីឡាករល្អៗ គាត់បានទិញកីឡាករវ័យក្មេងជាច្រើន។ កីឡាកររបស់គាត់ពិតជាល្អណាស់។ វាជាការពិតដែលថា Edinson Cavani កំពុងតែមកទីនេះ ហើយ Cavani ជាខ្សែប្រយុទ្ធម្នាក់ក្នុងចំណោមខ្សែប្រយុទ្ធកំពូលៗ នៅលើពិភពលោក។ Man Utd គឺ Man Utd បរាជ័យនេះមិនអាចបំផ្លាញពួកគេបានទេ»។ Mourinho លើកឡើងដូច្នេះ មុនសង្កត់ធ្ងន់ថា លោកអាណិត Solskjaer អំពីលទ្ធផល តែក្រៅពីនោះលោកគ្មានអាណិតទេ។
ឆ្លងកាត់ការប្រកួត៤លើក Spurs រកបាន៧ពិន្ទុ ឈរនៅលេខរៀងទី៦ក្នុងតារាង Premier League ខណៈ Man Utd ដែលប្រកួត៣លើកចាញ់២ឈ្នះមួយមាន៣ពិន្ទុនៅចំណាត់ថ្នាក់ទី១៦៕
Tag:
Manchester United
Jose Mourinho
Ole Gunnar Solskjaer
© រក្សាសិទ្ធិដោយ thmeythmey.com