Serie A៖ Juventus ចាំនៅកីឡដ្ឋាន តែ Napoli មិនទៅប្រកួត ព្រោះកីឡាករឆ្លង COVID-19

កីឡាអន្តរជាតិ

អន្តរជាតិ

Serie A៖ Juventus ចាំនៅកីឡដ្ឋាន តែ Napoli មិនទៅប្រកួត ព្រោះកីឡាករឆ្លង COVID-19

05, Oct 2020 , 9:19 pm

រូបភាព

ដោយ: ទេព ពិទូរ្យ

ជំនួបរវាង Juventus និង Napoli ក្នុងក្របខណ្ឌ Serie A បានធ្លាក់ក្នុងស្ថានភាពច្របូកច្របល់ បន្ទាប់ពីក្រុមភ្ញៀវ Napoli មិនទៅចូលរួមប្រកួត ដោយសារមានកីឡាករឆ្លង COVID-19។ អាជ្ញាធរសុខាភិបាល ជាអ្នកហាមសមាជិកក្រុម Napoli ក្នុងការធ្វើដំណើរ។

ដើមឡើយក្របខណ្ឌលីគកំពូលអ៊ីតាលីនេះ បានបដិសេធមិនបញ្ឈប់ការប្រកួតរវាងក្រុមទាំងពីរនោះទេ ខណៈក្រុម Juventus ក៏បានទៅដល់កីឡដ្ឋាន Allianz របស់ខ្លួនក្នុងក្រុង Turin រួចហើយដែរ។ សមាជិកក្រុមសេះបង្កង់ត្រូវនៅក្នុងរថយន្តក្រុងរបស់ក្រុមពួកគេរយៈពេល១ម៉ោងមុនចាប់ផ្តើមប្រកួត ស្របពេលប្រព័ន្ធផ្សព្វផ្សាយអ៊ីតាលីបានរាយការណ៍ថា Napoli មិនធ្វើដំណើរទៅចូលរួមប្រកួតនេះឡើយ។

យោងតាមច្បាប់នៅ Serie A ក្រុមរបស់លោក Andrea Pirlo នឹងត្រូវទទួលបានជ័យជម្នះ ៣-០ ដោយស្វ័យប្រវត្តិតែម្តង ដ្បិតគូប្រជែងបោះបង់ការប្រកួតដោយខ្លួនឯង។

យ៉ាងណាក៏ដោយ អ្នកនាំពាក្យក្លិប Napoli បានបញ្ជាក់ប្រាប់ទីភ្នាក់ងារព័ត៌មាន Reuters ថាក្រុមរបស់លោកត្រូវអាជ្ញាធរសុខាភិបាល (ASL) បញ្ជាឲ្យដាក់នៅដាច់ដោយឡែករយៈពេល៤ថ្ងៃ បន្ទាប់ពីកីឡាករខ្លួនពីរនាក់បានធ្វើតេស្តចេញលទ្ធផលវិជ្ជមាន COVID-19។ អ្នកនាំពាក្យរូបនេះ បញ្ជាក់ថាពួកគេនឹងតវ៉ារាល់ការសម្រេចរបស់ Serie A ដែលឲ្យក្រុមចាញ់ក្នុងប្រកួតនេះ។

ស្របពេលគ្នានេះ មន្ត្រីរបស់ ASL ក៏បានអះអាងក្នុងបទសម្ភាសតាមទូរទស្សន៍ដែរថា កីឡាកររបស់ Napoli ពិតជាត្រូវបញ្ជាឲ្យស្នាក់នៅផ្ទះរៀងៗខ្លួន ដើម្បីបង្កាការឆ្លងរាលដាល។ ប៉ុន្តែ ASL បន្ថែមថា ស្ថាប័នខ្លួនមិនដែលហាមក្រុមនេះមិនឲ្យប្រកួតនោះទេ បើទោះជាមានផលវិបាកយ៉ាងណាក៏ដោយ។

ជុំវិញករណីនេះ Serie A បានបន្ទោស ASL ដែលខកខានបង្ហាញពីពិធីសារសុខភាពដែលបានឯកភាពរវាងក្រសួងសុខាភិបាលនិងកីឡារបស់ប្រទេស ជាមួយអាជ្ញាធរបាល់ទាត់ឲ្យបានច្បាស់លាស់។ នៅក្នុងពិធីសាររបស់ក្រសួងសុខាភិបាលអ៊ីតាលីអំឡុងពេល COVID-19 ក្រុមនីមួយៗនៅតែត្រូវឲ្យលេងបាន បើទោះមានកីឡាករម្នាក់ ឬច្រើនជាងនេះឆ្លងជំងឺរាតត្បាតនេះក្តី៕