អន្តរជាតិ
សណ្ឋាគារ «Le Palais» នៅថៃ សុំទោសចំពោះតុបតែងរចនាបទ្មអង្គរវត្ត, ក្រសួងវប្បធម៌កំពុងសិក្សាបញ្ហានេះ
× ភ្នំពេញ៖ សណ្ឋាគារ Le Palais នៅប្រទេសថៃ ដែលបានយករចនាបថប្រាសាទខ្មែរ ជាពិសេសប្រាសាទអង្គរវត្ត តុបតែងលម្អនៅសណ្ឋាគារនោះ បានសុំអភ័យទោស ក្រោយមានប្រតិកម្មពីសំណាក់ពលរដ្ឋខ្មែរ ។ នេះបើតាមហ្វេសប៊ុកផ្លូវការរបស់សណ្ឋាគារ Le Palais។
សណ្ឋាគារLe Palais នៅលើកោះ Phangan ប្រទេសថៃ ដែលមានស្ថាបនិកជាជនជាតិខ្មែរ បានសុំទោសចំពោះកំហុស និងបញ្ជាក់ថាខ្លួនគ្មានចេតនាបំពានលើប្រាសាទ និងវប្បធម៌របស់កម្ពុជាឡើយ។
បើតាមហ្វេសប៊ុកផ្លូវការរបស់សណ្ឋាគារ Le Palais បានរៀបរាប់ដូច្នេះថា៖ « ពួកយើងដំណើរការសណ្ឋាគារនេះ ដោយការកោតសរសើរ ចំពោះសិល្បៈដ៏អស្ចារ្យនេះ ។ សំណង់ និងការតុបតែងនេះ កើតចេញពីស្នាដៃ និងបេះដូង ដោយក្រុមការងារកម្ពុជា ថៃ ។ ភាពអស្ចារ្យ នៅតែជារបស់អង្គរវត្ត មិនអាចប្រៀបផ្ទឹមបានឡើយ»។
លោក ឡុង ប៉ុណ្ណាសិរីរត្ថ អ្នកនាំពាក្យក្រសួងវប្បធម៌ និងវិចិត្រសិល្បៈ បានឱ្យដឹងថាក្រសួងវប្បធម៌ បានកំពុងសិក្សាពីបញ្ហានេះ។ ដោយឡែកចំពោះការមានចំណាត់ការបែបណា ក្រសួងមិនទាន់បញ្ជាក់នោះឡើយ។ អ្នកនាំពាក្យក្រសួងវប្បធម៌បានអះអាងដូច្នេះថា៖ »រដ្ឋាភិបាល នៅតែធ្វើលើគោលការណ៍គតិយុទ្ធជាតិ-អន្តរជាតិ ការចចារ និងការដែលត្រូវជជែកផ្ដល់ជាមតិយោបល់ បើសិនមានចំណុចវិជ្ជមានណាមួយ»។
បើតាមកាសែតបាងកកប៉ុស្តិ៍ សណ្ឋាគារ Le Palais បានបង្កើតឡើងកាលពីឆ្នាំ២០១៤ ដោយប្តីជនជាតិបារាំង និងប្រពន្ធជនជាតិខ្មែរ បានចូលភាគហ៊ុនជាមួយអ្នកវិនិយោគថៃ ដើម្បីកសាងសណ្ឋាគារ ដែលមានរចនាបទ្មបែបខ្មែរនេះឡើង។
ប្រធានសមាគមទេសចរណ៍ នៅ Koh Phangan ប្រទេសថៃ លោក Vichai Khongmun យល់ឃើញថា ការកសាងសណ្ឋាគារ ដោយយករចនាបទ្មអង្គរវត្តនេះ គឺជារឿងល្អទៅវិញទេ សម្រាប់កម្ពុជា។ «ខ្ញុំគិតថា (រចនាបទ្មសណ្ឋាគារបែបអង្គរវត្ត)នេះ វានឹងជំរុញឲ្យភ្ញៀវទេសចរណ៍ទៅទស្សនាទីតាំងពិតប្រាកដផ្ទាល់តែម្ដង» ។ នេះបើតាមប្រធានសមាគមទេសចរណ៍ លោក Vichai Khongmun ដែលបានស្រង់សម្តីដោយបាងកកប៉ុស្តិ៍៕
© រក្សាសិទ្ធិដោយ thmeythmey.com