សង្គមអន្តរជាតិ
អន្តរជាតិ
ចិននិងប្រទេស២៥ទៀត ស្នើឲ្យប្រទេសលោកខាងលិចដកទណ្ឌកម្មអំឡុងវិបត្តិកូវីដ-១៩
អគ្គរដ្ឋទូតចិនប្រចាំUN លោក Zhang Jun ។ រុបភាព៖ Xinhua
×![]()
ប្រទេសចិន និងប្រទេស២៥ផ្សេងទៀត នៅថ្ងៃទី៥ ខែតុលា បានទាមទារឲ្យដកហូតទណ្ឌកម្មជាបន្ទាន់ ដែលដាក់ដោយសហរដ្ឋអាមេរិក និងបណ្ដាប្រទេសលោកខាងលិច ដើម្បីធានានូវការឆ្លើយតបប្រកបដោយប្រសិទ្ធភាពប្រឆាំងជំងឺរាតត្បាតសកលកូវីដ-១៩។ 
ថ្លែងជំនួសមុខឲ្យប្រទេសទាំង២៦នៅកិច្ចប្រជុំមួយនៃគណៈកម្មាធិការសិទ្ធិមនុស្សនៃមហាសន្និបាតអង្គការសហប្រជាជាតិ(UN) អគ្គរដ្ឋទូតចិនប្រចាំ UN លោក Zhang Jun បានបញ្ជាក់ថា វិធានការបង្ខិតបង្ខំលក្ខណៈឯកតោភាគី បានរំលោភបំពានធម្មនុញ្ញអង្គការសហប្រជាជាតិ និន្នាការពហុភាគីនិយម និងរារាំងដល់ការគោរពសិទ្ធិមនុស្ស តាមរយៈការបង្អាក់ដល់សុខុមាលភាពប្រជាជនក្នុងប្រទេសដែលរងគ្រោះដោយសារជំងឺកូវីដ-១៩ និងប៉ះពាល់ដល់សិទ្ធិទទួលបានការថែទាំសុខភាព។
ប្រទេសទាំង២៦នេះ បានបញ្ជាក់ក្នុងសេចក្តីថ្លែងការណ៍រួមថា៖«សាមគ្គីភាពជាសកលនិងកិច្ចសហប្រតិបត្តិការអន្តរជាតិ គឺជាអាវុធដ៏មានឥទ្ធិពលបំផុត ក្នុងការប្រយុទ្ធនិងយកជ័យជម្នះប្រឆាំងជំងឺកូវីដ-១៩»។ ឆ្លៀតក្នុងឱកាសនេះ ប្រទេសទាំងនេះជបានស្នើឲ្យដកហូតទាំងស្រុងនិងបន្ទាន់នូវទណ្ឌកម្មដែលដាក់ដោយសហរដ្ឋអាមេរិកនិងបណ្ដាប្រទេសលោកខាងលិច ក្នុងគោលដៅធានាឲ្យបាននូវការឆ្លើយតបយ៉ាងពេញលេញ និងមានប្រសិទ្ធភាពរបស់សមាជិកទាំងអស់នៃសហគមន៍អន្តរជាតិប្រឆាំងកូវីដ-១៩។
ក្នុងចំណោមបណ្ដាប្រទេសដែលគាំទ្រសេចក្តីថ្លែងការណ៍នេះ គឺពាក់កណ្ដាលហើយដែលស្ថិតក្រោមទណ្ឌកម្មរបស់សហរដ្ឋអាមេរិក សហភាពអឺរ៉ុប ឬប្រទេសលោកខាងលិចផ្សេងទៀត រួមមាន គុយបា កូរ៉េខាងជើង អ៊ីរ៉ង់ រុស្ស៊ី ស៊ីរី និងវេណេស៊ុយអេឡា។
សេចក្តីថ្លែងការណ៍រួមដដែលនេះ ក៏បានកត់សម្គាល់ថា ទាំងអគ្គលេខាធិការអង្គការសហប្រជាជាតិ លោក អាន់តូនីញ៉ូ ហ្គូតេរ៉េស និងស្នងការសិទ្ធិមនុស្ស UN អ្នកស្រី Michelle Bachelet បានទទូចឲ្យលើកលែងទណ្ឌកម្មដែលប៉ះពាល់ដល់សមត្ថភាពប្រទេសណាមួយក្នុងការឆ្លើយតបជំងឺរាតត្បាតសកលនេះផងដែរ។
ទោះមិនទាន់មានការឆ្លើយតបណាមួយពីសំណាក់ស្ថានបេសកកម្មអាមេរិកប្រចាំ UN អគ្គរដ្ឋទូតអាល្លឺម៉ង់ប្រចាំ UN លោក Christoph Heusgen បានសង្កត់ធ្ងន់ថា ទណ្ឌកម្មរបស់សហភាពអឺរ៉ុប ពុំប៉ះពាល់ដល់ការដឹកជញ្ជូនជំនួយមនុស្សធម៌ ឬសម្ភារសុខាភិបាល ដែលនឹងជះឥទ្ធិពលលើការឆ្លើយតបរបស់ប្រទេសណាមួយប្រឆាំងកូវីដ-១៩ឡើយ៕
Tag:
ចិន
សហរដ្ឋអាមេរិក
អឺរ៉ុប
© រក្សាសិទ្ធិដោយ thmeythmey.com
