COVID-19
អន្តរជាតិ
សិង្ហបុរី បិទទ្វារភោជនីយដ្ឋាន២កន្លែង ដែលល្មើសវិធានការទប់ស្កាត់កូវីដ-១៩ រូបភាព Channel NewsAsia
× អាជ្ញាធរសិង្ហបុរី បានអះអាងថា ភោជនីយដ្ឋាន២កន្លែង ត្រូវបានបញ្ជាឲ្យបិទទ្វារ ក្រោយបរាជ័យក្នុងការគោរពតាមវិធានការទប់ស្កាត់ការរាលដាលជំងឺកូវីដ-១៩របស់រដ្ឋាភិបាល។ រដ្ឋាភិបាលសិង្ហបុរី បន្តអំពាវនាវឲ្យពលរដ្ឋខ្លួនគោរពគម្លាតសុវត្ថិភាព និងពាក់ម៉ាសគ្រប់ពេលវេលា។
ភោជនីយដ្ឋានដែលល្មើសវិធានការសុខាភិបាលទីមួយ គឺជាហាងលក់ស៊ុបមួយកន្លែង ដែលបណ្ដោយឲ្យអតិថិជនអង្គុយជាប់គ្នារដឹក។ ករណីនេះ កើតឡើងកាលពីថ្ងៃទី ៣ ខែតុលា នៅម៉ោង៩យប់។ តាមការចុះផ្សាយរបស់ទូរទស្សន៍សិង្ហបុរី Channel NewsAsia អាជ្ញាធរបានដាក់ចេញបញ្ជាឲ្យម្ចាស់ហាងនេះបិទអាជីវកម្មខ្លួនរយៈពេល១០ថ្ងៃពេញ រាប់ចាប់ពីថ្ងៃទី ៦ ដល់ថ្ងៃទី ១៥ ខែតុលា។
នៅថ្ងៃជាមួយគ្នា ករណីល្មើសវិធានការសុខាភិបាលមួយទៀត បានកើតឡើងក្នុងហាងលក់ផឹកស៊ីមួយកន្លែងទៀត ដែលអតិថិជននាំគ្នាផឹកស្រារហូតដល់ថ្ងៃម៉ោង១១៖៤០នាទីយប់ ហើយគ្មានគោរពគម្លាតសុវត្ថិភាព។ អាជ្ញាធរសិង្ហបុរី ក៏បានបញ្ជាឲ្យបិទទ្វារហាងនេះ១០ថ្ងៃផងដែរ។
ក្រៅពីភោជីយដ្ឋានទាំង២កន្លែងខាងលើ ហាងលក់ចំណីអាហារនិងភេសជ្ជតូចៗប្រមាណ១៣កន្លែងផ្សេងទៀត ក៏ត្រូវរងពិន័យដោយសារល្មើសវិធានការសុខាភិបាលទប់ស្កាត់ការរាលដាលជំងឺកូវីដ-១៩ផងដែរ។ ហាងទាំងនេះ រងពិន័យជាលុយរហូតចាប់ពីថ្ងៃ៧៣៥ដុល្លារដល់ ១៤៧០ដុល្លារ។
រដ្ឋាភិបាលសិង្ហបុរី បន្តអំពាវនាវឲ្យពលរដ្ឋខ្លួនគោរពគម្លាតសុវត្ថិភាព និងពាក់ម៉ាសគ្រប់ពេលវេលា ជាពិសេសនៅកន្លែងមានមនុស្សច្រើន។ បច្ចុប្បន្ន សិង្ហបុរីមានករណីឆ្លងកូវីដ-១៩សរុប ៥៧៨១៩ ករណី ក្នុងនោះ ៥៧៥៩៧នាក់ជាសះស្បើយ ខណៈ២៧នាក់ស្លាប់៕
Tag:
សិង្ហបុរី
កូវីដ-១៩
COVID-19
© រក្សាសិទ្ធិដោយ thmeythmey.com