ភ្នំពេញ៖ ក្នុងបំណងជំរុញលើកទឹកចិត្តដល់យុវផលិតករភាពយន្តកម្ពុជា សាធារណៈជន និងចាងហ្វាងផលិតកម្ម ក្នុងការអភិវឌ្ឍសមត្ថភាព និងការបញ្ចេញគំនិតច្នៃប្រឌិត ដើម្បីរួមចំណែកអភិវឌ្ឍវិស័យភាពយន្តជាតិ ក្រសួងវប្បធម៌ និងវិចិត្រសិល្បៈ នឹងប្រារព្ធរៀបចំមហោស្រពជាតិភាពយន្តខ្នាតខ្លីកម្ពុជាលើកទី៣ ឆ្នាំ២០២០ ក្រោមពាក្យស្លោក “ភាពយន្តខ្នាតខ្លី ជាជំហានឆ្ពោះទៅកាន់ភាពយន្តខ្នាតវែង”។
ពិធីបើកមហោស្រព នៅថ្ងៃទី៤ ខែធ្នូ ឆ្នាំ២០២០ និងពិធីបិទនៅថ្ងៃទី៧ ខែធ្នូ ឆ្នាំ២០២០ នៅសាលសន្និសីទចតុម្មុខ និងរោងភាពយន្តនានាក្នុងរាជធានីភ្នំពេញ។ កាលបរិច្ឆេទនៃការទទួលពាក្យចូលរួមប្រកួតប្រជែង ចាប់ពីថ្ងៃជូនដំណឹង រហូតដល់ថ្ងៃទី៣០ ខែតុលា ឆ្នាំ២០២០។
ខ្លឹមសារគោលនៃរឿង គឺវប្បធម៌ ឬការអភិវឌ្ឍសង្គម ដោយខ្លឹមសារនៃសាច់រឿងត្រូវឆ្លុះបញ្ចាំងពីទិដ្ឋភាពសង្គម និងបង្កប់នូវអត្តសញ្ញាណជាតិ រួមមានចំណេះដឹង ជំនឿសាសនា សិល្បៈប្រពៃណី ទំនៀមទម្លាប់ ដែលទាក់ទងនឹងជីវិតរស់នៅប្រចាំថ្ងៃរបស់ប្រជាជន។ ភាពច្នៃប្រឌិតនិងការបង្កើតថ្មី ត្រូវផ្ដោតលើភាពស្រមើស្រមៃ បំណងប្រាថ្នា អារម្មណ៍ផ្លូវចិត្ត ការស្រឡាញ់ និងទំនាក់ទំនងក្នុងសង្គម ដោយបង្កប់នូវគំនិតទស្សនវិជ្ជាទំនើប។
គ្រប់ស្នាដៃភាពយន្តខ្នាតខ្លីទាំងអស់ ដែលដាក់ចូលរួមប្រកួតប្រជែង ក្នុងមហោស្រពជាតិភាពយន្តខ្នាតខ្លី កម្ពុជាលើកទី៣ ឆ្នាំ២០២០ ត្រូវគោរពតាមលក្ខខណ្ឌដូចជា អ្នកនិពន្ធ និងអ្នកដឹកនាំ ជាជនជាតិខ្មែរ។ ផលិតករ បានផលិតភាពយន្តចាប់ពីខែមករា ឆ្នាំ២០១៨មក។ ថេរៈវេលាបញ្ចាំងមិនលើកពី៣០នាទី ជាទម្រង់ឌីជីថល(16:9 HD High Solution)។ មានចំណងជើងរង ជាភាសាអង់គ្លេស (English Subtitle)។ ពុំធ្លាប់ចូលរួមប្រកួតប្រជែង ក្នុងមហោស្រពភាពយន្តខ្នាតខ្លីកន្លងមក។
ចំពោះស្នាដៃភាពយន្តខ្នាតខ្លី ដែលផលិតដោយជនបរទេស អាចដាក់ពាក្យចូលរួមបញ្ចាំងបង្ហាញ(មិនប្រកួតប្រជែង) ក្នុងមហោស្រពជាតិភាពយន្តខ្នាតខ្លីកម្ពុជា លើកទី៣ឆ្នាំ២០២០។
ស្នាដៃភាពយន្តខ្នាតខ្លីទាំងអស់ដែលបានដាក់ចូលរួម នឹងត្រូវដាក់បញ្ចាំងជាសាធារណៈ នៅសាលសន្និសីទចតុម្មុខ និងរោងភាពយន្តនានា ក្នុងរាជធានីភ្នំពេញ រយៈពេល៣ថ្ងៃ ចាប់ពីថ្ងៃទី០៤ ដល់ថ្ងៃទី០៦ ខែធ្នូ ឆ្នាំ២០២០។ ស្នាដៃភាពយន្តដែលបានដាក់ចូលរួមប្រកួតប្រជែង នឹងត្រូវវិនិច្ឆ័យជ្រើសរើសបឋម ដោយគណៈកម្មការមេប្រយោគវគ្គជម្រុះ ដើម្បីជ្រើសរើសយកស្នាដៃភាពយន្តចំនួន០៥ចំណងជើង បន្តចូលរួមប្រកួតប្រជែងក្នុងវគ្គផ្ដាច់ព្រ័ត្រ។
ការប្រកួតផ្ដាច់ព្រ័ត្រនឹងប្រព្រឹត្តទៅ នៅរាត្រីថ្ងៃទី៧ ខែធ្នូ ឆ្នាំ២០២០ ក្នុងបរិវេណសាលសន្និសីទចតុម្មុខ។ ភាពយន្តដែលល្អដាច់គេយ៉ាងតិច៣ស្នាដៃ នឹងទទួលបានពានរង្វាន់។ ស្នាដៃភាពយន្តខ្នាតខ្លី ដែលបានចូលរួមប្រកួតប្រជែងវគ្គផ្ដាច់ព្រ័ត្រ គណៈកម្មការរៀបចំមហោស្រព មានសិទ្ធិបញ្ជូនទៅចូលរួមក្នុងមហោស្រពភាពយន្តថ្នាក់តំបន់ និងអន្តរជាតិ។
ស្នាដៃភាពយន្តដែលជាប់ជ័យលាភីលេខ១ នឹងទទួលបានពានមាស អមដោយថវិកា។ ជ័យលាភីលេខ២ ទទួលបានពានប្រាក់ អមដោយថវិកា។ ជ័យលាភីលេខ៣ ទទួលបានពានសំរិទ្ធ អមដោយថវិកា។ រង្វាន់លើកទឹកចិត្ត ផ្ដល់ឱ្យដល់ជ័យលាភីទស្សនិកជន ដោយទទួលបានពានលើកទឹកចិត្ត។
លេខាធិការដ្ឋាននៃគណៈកម្មការរៀបចំ មហោស្រពជាតិភាពយន្តខ្នាតខ្លីកម្ពុជាលើកទី៣ ឆ្នាំ២០២០ មានអាស័យដ្ឋាននៅ នាយកដ្ឋានសិល្បៈភាពយន្ត និងផ្សព្វផ្សាយវប្បធម៌ អគារលេខ ៧០ ផ្លូវលេខ ២០០ សង្កាត់បឹងរាំង ខណ្ឌដូនពេញ រាជធានីភ្នំពេញ។ គេហទំព័រ www.cambodiafilm.info ៕