COVID-19
អន្តរជាតិ
IMF ជំរុញឲ្យវិនិយោគវិស័យហេដ្ឋារចនាសម្ពន្ធ ដើម្បីបង្កើនកំណើនសេដ្ឋកិច្ចក្រោយ COVID-19
×![]()
មូលនិធិរូបិយវត្ថុអន្តរជាតិ (IMF) កាលពីថ្ងៃទី៥ តុលា បានស្នើឲ្យប្រទេសជាសមាជិកគិតគូរវិនិយោគក្នុងវិស័យហេដ្ឋារចនាសម្ព័ន្ធ ដើម្បីបង្កើនកំណើនសេដ្ឋកិច្ច ដែលរងគ្រោះយ៉ាងធ្ងន់ធ្ងរដោយសារជំងឺឆ្លងសាកលCOVID-19 ។ ស្ថាប័នហិរញ្ញវត្ថុអន្តរជាតិមួយនេះ ក៏ជំរុញឲ្យមានការបង្វែរការយកចិត្តទុកដាក់ទៅលើថាមពលបៃតងដែលមិនប៉ះពាល់ដល់បរិស្ថានផងដែរ។
នៅមុនកិច្ចប្រជុំប្រចាំឆ្នាំនាសប្តាហ៍ក្រោយរបស់មូលនិធិរូបិយវត្ថុអន្តរជាតិ និងធនាគារពិភពលោក ដែលនឹងផ្តោតលើការធ្វើបច្ចុប្បន្នភាពនៃផលប៉ះពាល់របស់ COVID-19 មូលនិធិរូបិយវត្ថុអន្តរជាតិ បានបញ្ចេញរបាយការណ៍វាយតម្លៃស្តីពីស្ថានភាពសារពើពន្ធរបស់ប្រទេសជាសមាជិក។
បើតាមទីភ្នាក់ងារព័ត៌មាន Reuters ក្នុងរបាយការណ៍វាយតម្លៃ និងស្រាវជ្រាវរបស់ខ្លួន IMF បានលើកឡើងថា ការវិនិយោគក្នុងវិស័យហេដ្ឋារចនាសម្ពន្ធសាធារណៈ ដែលរួមមានប្រព័ន្ធសុខាភិបាល ហេដ្ឋារចនាសម្ពន្ធឌីជីថល និងដោះស្រាយបញ្ហាបម្រែបម្រួលអាកាសធាតុ នឹងផ្តល់លទ្ធផលមួយទ្វេជាពីរលើកំណើនសេដ្ឋកិច្ចក្នុងរយៈពេល២ឆ្នាំ។ ក្នុងន័យនេះ ការអភិវឌ្ឍវិស័យហេដ្ឋារចនាសម្ពន្ធ គួរជារឿងអាទិភាពមួយ។
ស្ថាប័នរូបិយវត្ថុអន្តរជាតិនេះ អះអាងថា ការវិនិយោគក្នុងវិស័យសាធារណៈ១ភាគរយ នៃផលិតផលសរុបក្នុងស្រុក សម្រាប់ប្រទេសអភិវឌ្ឍ និងកំពុងអភិវឌ្ឍ នឹងនាំមកនូវកំណើនសេដ្ឋកិច្ច២,៧ភាគរយ តាមរយៈបង្កើតការងារដោយផ្ទាល់ចំនួន៧លានកន្លែង និងការងារដោយប្រយោលពីចំនួន២០ ទៅ៣៣លានកន្លែងថែមទៀត។ ប៉ុន្តែ គេក៏ត្រូវពិចារណាលើឥទ្ធិពលនៃវិស័យម៉ាក្រូសេដ្ឋកិច្ចដែរ។
លោក Victor Gaspar នាយកកិច្ចការសារពើពន្ធរបស់IMF លើកឡើងថាក្នុង Blog លោក ថា តាំងតែពីមុនការផ្ទុះនៃជំងឺឆ្លង ការវិនិយោគជាសាកលលើវិស័យហេដ្ឋារចនាសម្ព័ន្ធមានសភាពខ្វះខាតជាច្រើនទសវត្សរ៍ បើទោះផ្លូវ និងស្ពានក្នុងប្រទសអភិវឌ្ឍខូចខាតក៏ដោយ។ លោកបន្តថា ចំណែកក្នុងប្រទេសកំពុងអភិវឌ្ឍ និងកំពុងលូតលាស់វិញ មានការខ្វះខាតក្នុងការវិនិយោគលើការដឹកជញ្ជូន ទឹកស្អាត អនាម័យដែលជាតម្រូវការដ៏ចាំបាច់។
ខណៈអត្រាការប្រាក់ទាបកើតមានទៅទូទាំងពិភពលោក លោក Gaspar អះអាងថា នេះជាពេលត្រឹមត្រូវសម្រាប់ការវិនិយោគ។ ប៉ុន្តែ IMF ធ្លាប់បានព្រមានជារឿយៗ អំពីបំណុលក៏ច្រើនសន្ធឹកសន្ធាប់ក្នុងប្រទេសកំពុងអភិវឌ្ឍក្តី។ ត្រង់នេះ លោកថា សម្រាប់ប្រទេសដែលមានលក្ខខណ្ឌតឹងរ៉ឹងក្នុងការចំនាយថវិកា ប្រទេសនោះអាចវិនិយោគបន្តិចម្តងៗ។ ការវិនិយោគ នឹងផ្ដល់ប្រទេសនោះ បើសិនជាគ្រប់គ្រងគម្រោងវិនិយោគបានល្អ និងអាចផ្តល់ជាជន្ទល់សម្រាប់កំណើនសេដ្ឋកិច្ចនាពេលអនាគត។
ក្រៅពីនោះ ស្របពេលដែលពិភពលោកកំពុងស្ថិតក្នុងស្ថានភាពជំងឺឆ្លងសាកល របាយការណ៍របស់ IMF បានលើកឡើងពីភាពជចាំបាច់ក្នុងការវិនិយោគវិស័យមួយចំនួនដើម្បីគ្រប់គ្រង់ជំងឺឆ្លងដែលរួមមាន សុខាភិបាល អប់រំ អាគារ និងការដឹកជញ្ជូនមានសុវត្ថិភាព ក៏ដូចជាហេដ្ឋារចនាសម្ពន្ធឌីជីថលជាដើម។
ជាមួយគ្នានោះ របាយការណ៍ខាងលើ ក៏ស្នើឲ្យប្រទេសនានាផ្ដោតលើការវិនិយោគលើថាមពលបៃតងដែរ។ IMF បញ្ជាក់ថា ការវិនិយោគដើម្បីសម្របទៅនឹងបម្រែបម្រួលអាកាសធាតុ នឹងហុចផលត្រឡប់មកវិញច្រើនជាងការវិនិយោគលើផ្នែកផ្សេង។ ប៉ុន្តែប្រទេសទាំងឡាយ ក៏ត្រូវបង្កើនថវិកាច្រើនជាងទ្វេដងផងដែរដើម្បីអាចសម្របខ្លួនដោយត្រឹមត្រូវ៕
Tag:
IMF
COVID-19
© រក្សាសិទ្ធិដោយ thmeythmey.com
