COVID-19
សង្គមអន្តរជាតិ
អន្តរជាតិ
ការជជែកដេញដោលប្រធានាធិបតីអាមេរិកថ្ងៃ១៥ ខែតុលា នឹងមិនត្រូវរៀបចំឡើយ
× ការជជែកដេញដោលរវាងប្រធានាធិបតីអាមេរិក ដូណាល់ ត្រាំ និងបេក្ខជនប្រធានាធិបតីបក្សប្រជាធិបតេយ្យ ចូ បៃឌិន ដែលគ្រោងរៀបចំឡើងនៅថ្ងៃទី ១៥ ខែតុលា នឹងត្រូវលុបចោលវិញ។ គណៈកម្មាការរៀបចំការជជែកដេញដោលប្រធានាធិបតី (CPD) បញ្ជាក់បែបនេះក្នុងសេចក្តីថ្លែងការណ៍ នៅថ្ងៃទី ៩ ខែតុលា ដោយបន្ថែមថា ក្រុមធ្វើយុទ្ធនាការបោះឆ្នោតនៃបក្សទាំងពីរ បានប្រកាសគម្រោងថ្មីសម្រាប់ថ្ងៃនេះ។
«ឥឡូវនេះ គឺគ្មានទៀតឡើយការតស៊ូមតិនាថ្ងៃទី ១៥ ខែតុលា»។ គណៈកម្មាការរៀបចំការជជែកដេញដោលប្រធានាធិបតី (CPD) បញ្ជាក់បែបនេះ ដោយបន្ថែមថា គណៈកម្មការ នឹងផ្តោតសំខាន់លើការត្រៀមរៀបចំការជជែកដេញដោលប្រធានាធិបតីលើកចុងក្រោយ ដែលគ្រោងរៀបចំឡើងនាថ្ងៃទី២២ ខែតុលា ។
កាលពីថ្ងៃទី ៨ ខែតុលា លោក ដូណាល់ ត្រាំ បានប្រកាសមិនចូលរួមការតស៊ូមតិលើកទី២ ដែលគ្រោងរៀបចំឡើងនាថ្ងៃទី ១៥ ខែតុលា ក្រោយវាត្រូវបានផ្លាស់ទៅជាកម្មវិធីតាមអនឡាញដើម្បីបង្ការការរាលដាលជំងឺកូវីដ-១៩។
លោក ត្រាំ បានសម្រាកព្យាបាលនៅក្នុងមន្ទីរពេទ្យយោធាអស់៣ថ្ងៃ ក្រោយឆ្លងជំងឺកូវីដ-១៩ កាលពីថ្ងៃទី ១ ខែតុលា ហើយបច្ចុប្បន្នលោកកំពុងសម្រាកព្យាបាលបន្តនៅសេតវិមានអាមេរិក ។ គ្រូពេទ្យ អះអាងថា សុខភាពលោកត្រាំល្អប្រសើរ ហើយអាចទៅចូលព្រឹត្តិការណ៍ ចាប់ថ្ងៃទី ១០ ខែតុលា តទៅ ។ យ៉ាងណា គ្រូពេទ្យពុំបានបញ្ជាក់ថាលោកត្រាំបានធ្វើតេស្តអវិជ្ជមានចុងក្រោយនៅពេលណាឡើយ។
ប្រាប់ទូរទស្សន៍ Fox News តាមទូរសព្ទ លោក ត្រាំ និយាយថា លោកនឹងមិនខ្ជះខ្ជាយពេលវេលាលើការតស៊ូមតិតាមអនឡាញឡើយ។ លោកបន្តថា វារឿងអស់សំណើចបំផុត ហើយអ្នកសម្របសម្រួលអាចបិទមិនឲ្យលោកនិយាយគ្រប់ពេល។
ដើម្បីសងថ្ងៃការតស៊ូមតិនាថ្ងៃទី ១៥ ខែតុលា ក្រុមយុទ្ធនាការលោកបៃឌិន បានរៀបចំព្រឹត្តិការណ៍រកសំឡេងឆ្នោតមួយក្នុងទីក្រុង Philadelphia ដែលនឹងមានទូរទស្សន៍ ABC News ជារៀបចំកម្មវិធី ខណៈគ្មានដំណឹងពីក្រុមយុទ្ធនាការលោកត្រាំនៅឡើយទេ៕
Tag:
សហរដ្ឋអាមេរិក
ការបោះឆ្នោតអាមេរិក
© រក្សាសិទ្ធិដោយ thmeythmey.com