លោក សុខ វិជ្ចា៖ ផ្ញៀវភ្លើងមានផ្ទុកវីតាមីនសេ និងមានប្រយោជន៍ច្រើនទៀតដល់សុខភាព

ជាតិ

លោក សុខ វិជ្ចា៖ ផ្ញៀវភ្លើងមានផ្ទុកវីតាមីនសេ និងមានប្រយោជន៍ច្រើនទៀតដល់សុខភាព

12, Oct 2020 , 8:59 am

រូបភាព

ដោយ: ផាត ដាណេ

ភ្នំពេញ៖ ផ្ញៀវភ្លើង ជាផ្លែឈើព្រៃមួយប្រភេទ ដុះតាមតំបន់ព្រៃ ពិសេសនៅលើភ្នំខ្ពស់ៗ។ ផ្លែឈើប្រភេទនេះមានរសជាតិជូរអែម និងខ្លះជូរតែម្ដង ប្លែកពីផ្លែផ្ញៀវលក់តាមទីផ្សារ និងមានសំបកពណ៌ក្រហមឆ្អៅ។ បើតាមលោក សុខ វិជ្ចា អ្នកបច្ចេកទេសនៅមជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន ដើមផ្ញៀវភ្លើងប្រភេទនេះ អាចរស់បានរាប់រយឆ្នាំដោយធម្មជាតិ។

ផ្លែផ្ញៀវភ្លើងប្រភេទនេះ នៅកម្ពុជាមានដុះនៅ២តំបន់ដូចជា ភ្នំបូកគោ និងជួរភ្នំក្រវ៉ាញ។ វាអាចមានផ្លែនៅពេលលូតលាស់បាន៣ឆ្នាំ។ ប្រភេទដើមឈើព្រៃប្រភេទនេះ អាចរស់នៅបានរាប់រយឆ្នាំ ដោយខ្លួនឯង នៅលើភ្នំក្នុងព្រៃ នៃទ្វីបអាស៊ីអាគ្នេយ៍ មានរយៈកម្ពស់១០០០ម៉ែត្រ ឡើងពីនេវូទឹកសមុទ្រ។ ដើមផ្ញៀវភ្លើងនេះ អាចមានកម្ពស់លូតលាស់ចាប់ពី៣ទៅ១៥ម៉ែត្រ។ នេះបើតាមលោក សុខ វិជ្ចា អ្នកបច្ចេកទេសនៅមជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន។

លោក វិជ្ចា បានលើកឡើងថា មិនមែនចេញផ្លែមកភ្លាមពណ៌ក្រហមទេ ផ្លែផ្ញៀវភ្លើង ពេលខ្ចីមានពណ៌ផ្កាឈូក ហើយចេញពណ៌ក្រហមឆ្អៅនៅពេលវាទុំប៉ុណ្ណោះ។ ផ្លែឈើព្រៃប្រភេទនេះ ចេញផ្លែជាចង្កោមៗពីដើមរបស់វាតែម្ដង មិនចេញផ្លែពីមែកនោះទេ។

ផ្លែផ្ញៀវភ្លើង ក៏មានរដូវកាលចេញផ្លែផងដែរ គឺចាប់ពីខែកញ្ញា ដល់ខែវិច្ឆិកា ហើយផ្លែឈើប្រភេទនេះមិនមែនមាននៅតែកម្ពុជានោះទេ ប្រទេសថៃ និងម៉ាឡេស៊ី ក៏មានផ្លែផ្ញៀវភ្លើងនេះផងដែរ។ នេះជាការបញ្ជាក់របស់លោក សុខ វិជ្ចា ដោយបន្តទៀតថា នៅប្រទេសទាំង២នេះ គេដាំយកធ្វើអាជីវកម្មលក់តែម្ដង គេមានចម្ការផ្លែផ្ញៀវភ្លើងនេះ។

ជាផ្លែឈើព្រៃធម្មជាតិ ផ្ញៀវភ្លើងមានផ្ទុកវីតាមីនសេ ជំនួយដល់ស្បែក ឆ្អឹង និងសន្លាក់ ហើយក៏ជួយគ្រប់គ្រងដល់ចង្វាក់ និងសម្ពាធឈាម រួមទាំងជំនួយដល់ប្រព័ន្ធរំលាយអាហារផងដែរ។ នេះបើតាមការបញ្ជាក់ពីការស្រាវជ្រាវរបស់លោក សុខ វិជ្ចា៕