សង្គមអន្តរជាតិ
អន្តរជាតិ
ក្បួននាវាចម្បាំងជប៉ុនចូលចតនៅវៀតណាម ដើម្បីប្រឆាំងឥទ្ធិពលចិនក្នុងបញ្ហាសមុទ្រចិនខាងត្បូង រូបភាព៖ NHK
× ក្រសួងការពារជាតិជប៉ុន បានបញ្ជាក់ថា ក្បួននាវាចម្បាំងរបស់ខ្លួន ដែលរួមមាននាវាមុជទឹកផងដែរនោះ បានចូលចតនៅកំពង់មួយរបស់វៀតណាម។ នេះបើតាមការចុះផ្សាយរបស់ទូរទស្សន៍NHK នៅថ្ងៃទី១០ ខែតុលា។
តាមការបញ្ជាក់របស់ក្រសួងការពារជាតិជប៉ុន ក្បួននាវាចម្បាំងរបស់ខ្លួន បានទៅដល់កំពង់ផែទឹកជ្រៅវៀតណាម Cam Ranh Bay ខេត្ត Khanh Hoa នៅថ្ងៃទី១០ ខែតុលា។ ក្បួននាវាចម្បាំងនេះ រួមមាននាវាចម្បាំងចំនួន២គ្រឿង និងនាវាមុជទឹកមួយគ្រឿង។ ការចូលចតនេះ គឺដើម្បីផ្គត់ផ្គង់ស្បៀងនៅលើនាវា។
នាវាទាំងបី ជាផ្នែកមួយនៃក្បួននាវាចម្បាំងដែលជប៉ុនបញ្ជូនទៅកាន់សមុទ្រចិនខាងត្បូង និងមហាសមុទ្រឥណ្ឌាកាលពីខែកញ្ញា។ បើសិនគ្មានការប្រែប្រួលទេ ក្បួននាវាចម្បាំងនេះ នឹងនៅក្នុងតំបន់សមុទ្រចិនខាងត្បូងចំនួន ១ខែ ដើម្បីចូលរួមធ្វើសមយុទ្ធយោធារួមគ្នាជាមួយកងទ័ពជើងទឹកវៀតណាម និងបណ្តាប្រទេសដទៃទៀត។ នាវាដឹកឧទ្ធម្ភាគចក្រធំជាងគេរបសជប៉ុន Kaga ក៏មានវត្តមានក្នុងតំបន់នេះដែរ។
វត្តមានរបស់ក្បួននាវាជប៉ុននៅកំពង់ផែវៀតណាមបែបនេះ ត្រូវបានគេជឿថា ជាផ្នែកមួយនៃការពង្រឹងកិច្ចសហប្រតិបត្តិការរវាងទីក្រុងហាណូយ និងទីក្រុងតូក្យូ ដើម្បីទប់ស្កាត់ការបង្កើតឥទ្ធិពលរបស់ចិននៅក្នុងសមុទ្រចិនខាងត្បូង។
មួយរយៈចុងក្រោយនេះ ចិន បានធ្វើសកម្មភាពអុងអាត់យ៉ាងខ្លាំងនៅក្នុងសមុទ្រចិនខាងត្បូង តាមរយៈការធ្វើសមយុទ្ធយោធាជាច្រើនលើក។ បញ្ហានេះ បានធ្វើឲ្យវៀតណាម ដែលជាភាគីមួយនៃជម្លោះមិនពេញចិត្តឡើយ ហើយថែមទាំងដាក់ការតវ៉ាទៅចិនថែមទៀត។
បន្ថែមពីលើនេះ នាយករដ្ឋមន្រ្តីជប៉ុន លោក យូស៊ីហ៊ីដេ ស៊ូហ្កា ត្រូវបានរំពឹងថា នឹងមកធ្វើទស្សនកិច្ចនៅវៀតណាម នៅពាក់កណ្តាលខែតុលានេះ បន្ទាប់ពីចូលកាន់តំណែង។ ការជ្រើសរើសអាស៊ីជាគោលដៅទស្សនកិច្ចក្រៅប្រទេសលើកដំបូង ក៏ជាសញ្ញាបង្ហាញពីជំហររបស់រដ្ឋាភិបាលជប៉ុនថ្មីដែលបន្តរក្សាតួនាទីនៅតំបន់ ស្របពេលដែលឥទ្ធិពចិនកាន់តែកើននោះ។
សូមបញ្ជាក់ថា ក្បួននាវាចម្បាំងរបស់ជប៉ុន មកដល់វៀតណាមតែមួយថ្ងៃប៉ុណ្ណោះ មុនដំណើរទស្សនកិច្ចរបស់លោក វ៉ាង យី រដ្ឋមន្រ្តីការបរទេសចិន និងជាទីប្រឹក្សារដ្ឋចិន មកកម្ពុជា ម៉ាឡេស៊ី ឡាវ ថៃ រួមទាំងការឈប់សំចតនៅសិង្ហបុរី៕
© រក្សាសិទ្ធិដោយ thmeythmey.com