សង្គមអន្តរជាតិ
អន្តរជាតិ
រដ្ឋមន្ត្រីការបរទេសចិន លោក វ៉ាង យី ។ រូបភាព ៖ AFP
×![]()
ប្រទេសចិន គ្មានបំណងប្រកួតដណ្ដើមតំណែងជាមេដឹកនាំពិភពលោកឡើយ។ រដ្ឋមន្ត្រីការបរទេសចិន វ៉ាង យី អះអាងបែបនេះ ហើយបន្ថែមថា រដ្ឋាភិបាលក្រុងប៉េកាំង កំពុងស្វះស្វែងរកមាគ៌ាអភិវឌ្ឍន៍ដែលផ្ទុយពីក្រុមប្រទេសលោកខាងលិចកំពុងអនុវត្ត។ 
ដោយមិននិយាយចំឈ្មោះអាមេរិក ប្រមុខការទូតចិន បានអះអាងថា ចិនមិនបានព្យាយាមយកឈ្នះប្រទេសណាមួយឡើយ។ ពីខេត្តយូណា អំឡុងទស្សនកិច្ចផ្លូវការរបស់រដ្ឋមន្ត្រីការបរទេសហ្វីលីពីននៅទីនោះ លោក វ៉ាង យី និយាយដូច្នេះថា៖«យើងគ្មានឆន្ទៈប្រកួតជាមួយប្រទេសដទៃសម្រាប់ភាពជាអ្នកដឹកនាំ [ពិភពលោក] តែ [យើង] កំពុងផ្ដោតសំខាន់លើកិច្ចប្រឹងប្រែងក្នុងការដោះស្រាយបញ្ហារបស់យើងប៉ុណ្ណោះ»។
បើតាមកាសែត South China Morning Post ឆ្លៀតក្នុងឱកាសជំនួបជាមួយរដ្ឋមន្ត្រីការបរទេសហ្វីលីពីន Teodoro Locsin នៅថ្ងៃទី១០ ខែតុលា ទីប្រឹក្សារដ្ឋចិន វ៉ាង យី ក៏បានបញ្ជាក់ទៀតថា ប្រទេសទាំងពីរ គួរតែធ្វើជាមិត្តល្អជារៀងរហូត។ ម្យ៉ាងវិញទៀត លោក វ៉ាង យី ក៏បានប្រើជំនួបនេះលើកឡើងពាក់ព័ន្ធបញ្ហាសមុទ្រចិនខាងត្បូផងដែរ ដោយអះអាងថា ប្រទេសចិននិងហ្វីលីពីន គួរបន្តធ្វើការរួមគ្នាដើម្បីដោះស្រាយជម្លោះលំហសមុទ្រនេះ។
ក្នុងសេចក្តីថ្លែងការណ៍ដែលចុះផ្សាយដោយក្រសួងការបរទេសចិន លោក វ៉ាង ប្រាប់លោក Locsin ទៀតថា ប្រទេសចិនកំពុងស្វះស្វែងរកមាគ៌ាអភិវឌ្ឍន៍ ដែលខុសស្រឡះពីបណ្ដាប្រទេសលោកខាងលិច។ ត្រង់ចំណុចនេះ លោកសង្កត់ធ្ងន់ថា សិទ្ធិអភិវឌ្ឍន៍របស់ប្រទេសមួយ ពុំគួរត្រូវបានបង្អាក់ ឬរំខានពីសំណាក់កម្លាំងបរទេសដទៃឡើយ។
នៅមុនជំនួបជាមួយរដ្ឋមន្ត្រីការបរទេសហ្វីលីពីន ប្រមុខការទូតចិន ក៏បានជួបពិភាក្សាជាមួយប្រេសិតពិសេសរបស់ប្រធានាធិបតីឥណ្ឌូណេស៊ី Luhut Binsar Panjaitan ក្នុងខេត្តយូណានផងដែរ ដោយភាគីទាំងសងខាងបានសន្យាពង្រឹងចំណងទាក់ទងនិងកិច្ចសហប្រតិបត្តិការក្នុងការប្រយុទ្ធប្រឆាំងជំងឺកូវីដ-១៩។
ក្នុងសប្ដាហ៍នេះ លោក វ៉ាង យី កំពុងធ្វើដំណើរទស្សនកិច្ចរយៈ៥ថ្ងៃនៅប្រទេសក្នុងតំបន់អាស៊ីអាគ្នេយ៍ចំនួន៤ រួមមាន កម្ពុជា ម៉ាឡេស៊ី ឡាវ ថៃ រួចឈប់សំចតនៅសិង្ហបុរី៕
Tag:
ចិន
ហ្វីលីពីន
អាស៊ីអាគ្នេយ៍
វ៉ាង យី
© រក្សាសិទ្ធិដោយ thmeythmey.com
