សង្គមអន្តរជាតិ
អន្តរជាតិ
តៃវ៉ាន់ថា ការចោទប្រកាន់ចិនពាក់ព័ន្ធរឿងចារកម្ម ជាព័ត៌មានក្លែងក្លាយ ប្រធានាធិបតីតៃវ៉ាន់ អ្នកស្រី Tsai Ing-wen ថ្លែងសុន្ទរកថាអំឡុងពិធីបុណ្យជាតិ នៅថ្ងៃទី ១០ ខែតុលា ។ រូបភាព៖ Reuters
× រដ្ឋាភិបាលកោះតៃវ៉ាន់ បានចាត់ទុកការចោទប្រកាន់ថាក្រុងត៉ៃប៉ិបានធ្វើចារកម្មលើចិនជា «ព័ត៌មានក្លែងក្លាយ» ហើយរិះគន់ចិនថា កំពុងធ្វើនយោបាយដោយព្យាយាមមួលបង្កាច់មនុស្សទាំងឡាយជាចារកម្ម ។ ការប្រតិកម្មពីសំណាក់តៃវ៉ាន់ ធ្វើឡើយក្រោយពលរដ្ឋតៃវ៉ាន់ម្នាក់ទៀត ត្រូវចាប់ខ្លួនក្រោមបទចោទសន្តិសុខជាតិ ហើយបានចេញមុខសារភាពទោសកំហុសលើកញ្ចក់ទូរទស្សន៍រដ្ឋចិន។
២ថ្ងៃជាប់គ្នា ទូរទស្សន៍រដ្ឋចិន CCTV បានចាក់ផ្សាយការសារភាពទទួលកំហុសរបស់ជនជាតិចិនតៃវ៉ាន់ពីកំហុសធ្វើចារកម្ម។ នៅថ្ងៃទី១២ ខែតុលា បុរសតៃវ៉ាន់ម្នាក់ទៀតឈ្មោះថា Cheng Yu-chin ដែលត្រូវបានអះអាងថា ធ្លាប់ធ្វើជាគ្រូបង្រៀននៅសាធារណរដ្ឋឆែក ក៏បានសារភាពតាមកញ្ចក់ទូរទស្សន៍រដ្ឋចិន។
មួយថ្ងៃមុនករណីនេះ ទូរទស្សន៍ក៏បានផ្សាយពីការសារភាពរបស់បុរសតៃវ៉ាន់ម្នាក់ទៀត ដែលលួចថតយោធាចិនធ្វើសមរយុទ្ធនៅក្បែរហុងកុងដោយគ្មានការអនុញ្ញាត កាលពីឆ្នាំមុន។
បន្ថែមពីមុខងារជាគ្រូបង្រៀន ទូរទស្សន៍រដ្ឋចិនដដែលនេះ ចុះផ្សាយទៀតថា លោក Cheng ក៏ធ្លាប់ធ្វើជាជំនួយការឲ្យ លោក Cho Jung-tai ដែលជាអតីតប្រធានបក្សប្រជាធិបតេយ្យជឿនលឿន (DPP) ដែលជាបក្សកាន់អំណាចរបស់តៃវ៉ាន់។ លោក Chang បានបង្ហាញមុខលើកញ្ចក់ទូរទស្សន៍ហើយសារភាពថា លោកបានទទួលស្គាល់កំហុសថា ទង្វើរបស់លោកបង្កគ្រោះថ្នាក់ដល់ប្រទេសចិន។
CCTV ផ្សាយបន្តថា លោក Cheng ត្រូវចាប់ខ្លួននៅក្នុងប្រទេសចិនក្នុងខែមេសា ឆ្នាំ២០១៩ តែមិនបានបញ្ជាក់លម្អិតឡើយ។
យ៉ាងណាមិញ ទាំងលោក Cho និងបក្ស DPP តៃវ៉ាន់ អះអាងថា ពួកគេពុំធ្លាប់ស្គាល់និងធ្វើការជាមួយបុរសតៃវ៉ាន់រូបនេះឡើយ។ តាមរយៈបណ្ដាញសង្គមហ្វេសប៊ុក លោក លោក Cho Jung-tai អះអាងថា ព័ត៌មាននេះរាយការណ៍ពុំត្រឹមត្រូវទេ។
ជាមួយគ្នានេះដែរ ក្រុមប្រឹក្សាកិច្ចការចិនដីគោករបស់តៃវ៉ាន់ បានបញ្ជាក់ក្នុងសេចក្តីថ្លែងការណ៍មួយថា ខ្លួនពុំទទួលការស្នើសុំពីសមាជិកគ្រួសារណាមួយឲ្យជួយដោះស្រាយក្នុងករណីនេះឡើយ។
ក្រុមប្រឹក្សាតៃវ៉ាន់នេះ ក៏បានថ្កោលទោសចិនក្រោយចាក់ផ្សាយការសារភាពលោក Cheng លើទូរទស្សន៍នេះថាព័ត៌មានក្លែងក្លាយ ហើយសង្កត់ធ្ងន់ថា ចិនកំពុងលេងនយោបាយដោយព្យាយាមមួលបង្កាច់មនុស្សថាធ្វើចារកម្ម។
ជាញឹកញយ ក្រុមសិទ្ធិមនុស្សនិងរដ្ឋាភិបាលលោកខាងលិច បានរិះគន់ចិនដែលបង្ហាញមុខជនសង្ស័យឲ្យសារភាពលើកញ្ចក់ទូរទស្សន៍មុនសវនាការពួកគេ៕
Tag:
តៃវ៉ាន់
ចិន
ហុងកុង
ចារកម្ម
© រក្សាសិទ្ធិដោយ thmeythmey.com