ដំណាំកសិកម្មជាង១២ម៉ឺនហិកតាហើយ ដែលត្រូវលិចលង់ដោយសារទឹកជំនន់

ជាតិ

សង្គមជាតិ

ដំណាំកសិកម្មជាង១២ម៉ឺនហិកតាហើយ ដែលត្រូវលិចលង់ដោយសារទឹកជំនន់

13, Oct 2020 , 9:49 pm

រូបភាព

ស្ថានភាពទឹកជំនន់នៅខេត្តបាត់ដំបងក្រោយភ្លៀងធ្លាក់ខ្លាំងកាលពីថ្ងៃទី១០ ខែតុលា។ រូបថត AFP

ដោយ:

គិតត្រឹមថ្ងៃទី១២ ខែតុលា ឆ្នាំ២០២០ គ្រោះទឹកជំនន់ បានជនលិចដំណាំកសិកម្មជាង១២ម៉ឺន ហិកតា នៅក្នុងរាជធានី-ខេត្តចំនួន១៦ នៃប្រទេសកម្ពុជា។ នេះបើតាម លោក ឃុន សុខា អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានប្រាប់សារព័ត៌មានThmeyThmey25 ដូច្នេះ កាលពីល្ងាច ថ្ងៃទី ១២ ខែតុលា ឆ្នាំ២០២០។

លោក ឃុន សុខា បានលម្អិតថា ដំណាំកសិកម្មដែលបានលិចលង់ទាំងនោះរួមមាន ដំណាំស្រូវជិត ៨ម៉ឺនហិកតា និងដំណាំរួមផ្សំដទៃទៀតជាង ៤ម៉ឺនហិកតា។ រាជធានី-ខេត្ត ដែលរងគ្រោះមាន រាជធានីភ្នំពេញ ខេត្តតាកែវ កំពង់ស្ពឺ, ស្ទឹងត្រែង ,កំពង់ចាម ,ពោធិ៍សាត់,សៀមរាប, បាត់ដំបង, បន្ទាយមានជ័យ, ឧត្តរមានជ័យ, ព្រះវិហារ, ប៉ៃលិន, កោះកុង, ព្រះសីហនុ , ស្វាយរៀង និងខេត្តមណ្ឌលគិរី។

លោក ឃុន សុខា បញ្ជាក់បន្ថែមថា៖«ដោយសារយើង កំពុងស្ថិតនៅក្នុងព្យុះទី១៥។ ដូច្នេះខេត្តទាំង១៦ នៅតែបន្តមានភ្លៀងធ្លាក់ អ៊ីចឹងផលប៉ះ អាចនឹងនៅត្រឹង ឬមានការកើនឡើងនៅតំបន់ខ្លះ»។

លោក ឃុន សុខា មិនទាន់បញ្ជាក់ពីដំណោះស្រាយចំពោះផលប៉ះពាល់ដាំំកសិកម្មនៅឡើយ ខណៈដែលបច្ចុប្បន្នអាជ្ញាធរ កំពុងតែមមាញឹកលើការងារសង្គ្រោះ និងជម្លៀសពលរដ្ឋទៅកាន់ទីសុវត្ថិភាព ផ្តល់សេវាកម្មសុខភាពស្បៀង និងទឹកស្អាត។

គួរបញ្ជាក់ផងដែរថា ក្រៅពីផលប៉ះពាល់ដំណាំកសិកម្ម គ្រោះទឹកជំនន់ក្នុងប្រទេសកម្ពុជា បានសម្លាប់មនុស្សយ៉ាងហោចណាស់១០នាក់ហើយ គិតចាប់ពីថ្ងៃទី១ ដល់ទី១១ ខែតុលា ឆ្នាំ២០២០៕