សង្គមអន្តរជាតិ
អន្តរជាតិ
កងទ័ពវៀតណាម ជួយសង្គ្រោះអ្នកនេសាទនៅខេត្តQuang Tri នៅថ្ងៃទី ១១ ខែតុលា ។ រូបភាព៖ Reuters
×![]()
អ្នកស្លាប់ដោយសារជំនន់ទឹកភ្លៀង និងការបាក់ដីក្នុងភាគកណ្ដាលនៃប្រទេសវៀតណាម បានកើនដល់២៩នាក់ហើយ គិតត្រឹមថ្ងៃទី១៣ ខែតុលា ហើយមនុស្សរាប់សិបនាក់ទៀតបានបាត់ខ្លួន។ 
ភ្លៀងធ្លាក់មិនដាច់ ចាប់តាំងពីដើមខែតុលា បានបង្កទៅជាទឹកជំនន់និងការបាក់ដីក្នុងខេត្តមួយចំនួនក្នុងភាគកណ្ដាលនៃប្រទេសវៀតណាម ហើយជំនន់ទឹកភ្លៀងនេះ រំពឹងកាន់តែអាក្រក់ខ្លាំងទៀតក្នុងពេលប៉ុន្មានថ្ងៃខាងមុខ ខណៈព្យុះណាងកាកំពុងវាយប្រហារលើប្រទេសអាស៊ីអាគ្នេយ៍មួយនេះ នៅថ្ងៃទី ១៤ ខែតុលា។
ជំនន់ទឹកភ្លៀងដែលកំពុងបន្តនេះ បានសម្លាប់មនុស្ស២៩នាក់ក្នុងប្រទេសវៀតណាម ខណៈផ្ទះសម្បែង១៣០ ០០០ខ្នង និងដីស្រែរាប់ម៉ឺនហិកតាត្រូវបានខូចខាត។ នេះបើតាមការចុះផ្សាយរបស់សារព័ត៌មានក្នុងស្រុកវៀតណាម។
កម្មករសំណង់១៧នាក់ បានបាត់ខ្លួនក្រោយហេតុការណ៍បាក់ដីនៅការដ្ឋានគម្រោងទំនប់វារីអគ្គិសនីមួយកន្លែងក្នុងខេត្ត Thua Thien-Hue ភាគកណ្ដាលវៀតណាម។ ចំណែកមនុស្ស១៣នាក់ផ្សេងទៀត ដែលបញ្ជូនទៅជួយសង្គ្រោះកម្មករទាំងនេះក៏បានបាត់ខ្លួនផងដែរ។ នេះបើតាមការផ្សាយរបស់កាសែតរដ្ឋវៀតណាម Nhan Dan នៅថ្ងៃទី១៣ ខែតុលា។
នាយករដ្ឋមន្ត្រីវៀតណាម លោក ង្វៀន ស៊ួនហ្វុក ក្នុងសេចក្តីថ្លែងការណ៍មួយ បានចេញបញ្ជាឲ្យក្រសួងការពារជាតិបញ្ជូនកងទ័ពសង្គ្រោះបន្ថែមទៀតទៅកាន់ការដ្ឋានសំណង់ដែលបាក់ដីនេះ។ យ៉ាងណាមិញ គិតត្រឹមព្រឹកថ្ងៃអង្គារ ក្រុមសង្គ្រោះវៀតណាម ពុំអាចចូលទៅដល់ចំណុចការដ្ឋានទំនប់វារីអគ្គិសនីនោះបាន ដោយហេតុថាកម្រិតទឹកខ្ពស់ ភ្លៀងធ្លាក់ខ្លាំងពេក និងមានបាក់ដីបន្ថែម។
មកទល់ពេលនេះ អាជ្ញាធរតំបន់វៀតណាម បានជម្លៀសពលរដ្ឋជិត៥ម៉ឺននាក់ចេញពីតំបន់រងគ្រោះដោយសារជំនន់ទឹកភ្លៀងទៅកាន់ទីទួលសុវត្ថិភាព ហើយពួកគេក៏បានស្នើសុំអាហារបន្ទាន់ពីរដ្ឋាភិបាល៕
Tag:
វៀតណាម
ជំនន់ទឹកភ្លៀង
ព្យុះណាងកា
© រក្សាសិទ្ធិដោយ thmeythmey.com
