អន្តរជាតិ
ប្រមុខការទូតចិនថា អាមេរិក ជប៉ុន ឥណ្ឌានិងអូស្ត្រាលី ចង់បង្កើតណាតូនៅឥណ្ឌូ-បាស៊ីហ្វិក លោកវ៉ាង យី រដ្ឋមន្រ្តីការបរទេសចិន ជាមួយសមភាគីម៉ាឡេស៊ី លោក Hishammuddin Hussein។ រូបភាព៖ Xinhua
× ប្រមុខការទូតចិន លោក វ៉ាង យី នៅថ្ងៃទី១៣ ខែតុលា បានរិះគន់ក្រុមប្រទេសកិច្ចសន្ទនាសន្តិសុខចតុភាគី (Quad) ដែលមានអាមេរិក ជប៉ុន អូស្ត្រាលី និងឥណ្ឌា ថា មានបំណងចង់បង្កើតបក្សសម្ព័ន្ធយោធាNATO នៅក្នុងតំបន់ឥណ្ឌូ-បាស៊ីហ្វិក។ ការលើកឡើងនេះ ធ្វើឡើងបន្ទាប់ពីកិច្ចប្រជុំQuad ទើបតែធ្វើឡើងនៅទីក្រុងតូក្យូ ប្រទេសជប៉ុន សប្តាហ៍មុន។
ថ្លែងនៅក្នុងសន្និសីទសារព័ត៌មានរួមគ្នាជាមួយសមភាគីម៉ាឡេស៊ី លោក Hishammuddin Hussein នៅក្នុងទីក្រុងគូឡាឡាំពួ លោកវ៉ាង យី រដ្ឋមន្ត្រីការបរទេសចិន បានលើកឡើងពីបញ្ហាជាច្រើនដូចជា COVID-19 សហប្រតិបត្តិការលើវ៉ាក់សាំងCOVID-19 សមុទ្រចិនខាងត្បូង និងទំនាក់ទំនងទ្វេភាគីជាដើម។
ប្រមុខការទូតចិនរូបនេះ ក៏ត្រូវបាអ្នកសារព័ត៌មានរបស់ទីភ្នាក់ងារព័ត៌មានរដ្ឋចិន Xinhua ចោទជាសំណួរជុំវិញកិច្ចសន្ទនាសន្តិសុខចតុភាគីរវាងអាមេរិក ឥណ្ឌា ជប៉ុន និងអូស្ត្រាលី (Quad) ដែលទើបបញ្ចប់កិច្ចប្រជុំរដ្ឋមន្ត្រីការបរទេសថ្មីៗនេះ។ លោក វ៉ាង ឆ្លើយថា៖ «យុទ្ធសាស្ត្រឥណ្ឌូ-បាស៊ីហ្វិក ធ្វើឡើងដើម្បីបង្កើត បក្សសម្ព័ន្ធNATO តំបន់ឥណ្ឌូ-បាស៊ីហ្វិក ដែលមានយន្តការកិច្ចសន្ទនាចតុភាគីជាមូលដ្ឋាន»។
បើតាមប្រមុខការទូតចិន កិច្ចសន្ទនា Quad ជាកន្លែងបណ្តុះឲ្យមានគំនិតសង្គ្រាមត្រជាក់ជាថ្មី បង្កើតការប្រឈមមុខដាក់គ្នា និងការប្រកួតប្រជែងនៅក្នុងតំបន់។ ក្នុងសន្និសីទសារព័ត៌មានដដែល ទីប្រឹក្សារដ្ឋចិន បានបន្ថែមទៀតថា កិច្ចសន្ទនា Quad ក៏គ្រាន់ជាការការពារនូវប្រព័ន្ធអនុត្តរភាព និងគ្រប់គ្រងរបស់អាមេរិកប៉ុណ្ណោះ។ តាមការចុះផ្សាយរបស់កាសែត South China Morning Post លោកវ៉ាង បានចាត់ទុក Quad ថា គឺជាគ្រោះថ្នាក់សន្តិសុខ និងបង្កឲ្យមានប្រវត្តិសាស្ត្រច្រំដែល។
ការលើកឡើងរបស់លោក វ៉ាង ធ្វើឡើងបន្ទាប់ពីកិច្ចប្រជុំសន្ទនាសន្តិសុខចតុភាគីប្រព្រឹត្តឡើងនៅទីក្រុងតូក្យូនាសប្តាហ៍មុន។ ក្នុងកិច្ចប្រជុំនោះ លោក ម៉ៃ ប៉ុមប៉េអូ រដ្ឋមន្ត្រីការបរទេសអាមេរិក បានអំពាវនាវឲ្យប្រទេសសម្ព័ន្ធមិត្តទប់ស្កាត់សកម្មភាពអុងអាត់របស់ចិននៅក្នុងតំបន់។ យ៉ាងណាក៏ដោយ ក្នុងកិច្ចប្រជុំនេះ គឺមានតែអាមេរិកប៉ុណ្ណោះ ដែលនិយាយពីចិនចំៗ។
ក្រៅពីក្រុមប្រទេស Quad លោកវ៉ាង ក៏បានលើកឡើងពីសមុទ្រចិនខាងត្បូង ដោយជំរុញឲ្យអាស៊ានបង្ការការរំខានពីកម្លាំងខាងក្រៅមកក្នុងសមុទ្រចិនខាងត្បូង។ ក្នុងន័យនេះ ចិន និងអាស៊ាន គួរតែដោះស្រាយបញ្ហាសមុទ្រចិនខាងត្បូងដោយសន្តិវិធី ជាជាងការប្រឈមមុខដាក់គ្នា។
សូមបញ្ជាក់ថា លោកវ៉ាង យី កំពុងស្ថិតដំណើរទស្សនកិច្ចទៅបណ្តាប្រទេសអាស៊ីអាគ្នេយ៍ចំនួន៤ ក្នុងនោះមានដូចជាកម្ពុជា ម៉ាឡេស៊ី ឡាវ ថៃ និងសំចតនៅសិង្ហបុរី។ លោកបានបញ្ចប់ទស្សនកិច្ចបីប្រទេសរួច នៅតែថៃ និងឡាវ៕
© រក្សាសិទ្ធិដោយ thmeythmey.com