អន្តរជាតិ
លោក ស៊ី ជិនភីង ប្រាប់ឲ្យកងម៉ារីនចិនពង្រឹងសមត្ថភាពត្រៀមធ្វើសង្គ្រាម លោកប្រធានាធិបតីចិន ស៊ី ជិនភីង ថ្លែងអំឡុងទស្សនកិច្ចនៅមូលដ្ឋានទ័ពម៉ារីន ក្នុងទីក្រុងឆាវចូវ ខេត្តគ័ងតុង នៅថ្ងៃទី ១៣ ខែតុលា ។ រូបភាព Xinhua
× ប្រធានាធិបតីចិន ស៊ី ជិនភីង បានប្រាប់ឲ្យកងម៉ារីននៃកងទ័ពជើងទឹករំដោះប្រជាជនចិនពង្រឹងសមត្ថភាពធ្វើសង្គ្រាម និងត្រៀមលក្ខណៈទប់ទល់គ្រោះថ្នាក់ជានិច្ច។ លោក ស៊ី ណែនាំបែបនេះអំឡុងទស្សនកិច្ចថ្ងៃទី២របស់លោកក្នុងខេត្តគ័ងតុងភាគខាងត្បូងប្រទេស។
ពីមូលដ្ឋានទ័ពម៉ារីននៅទីក្រុងឆាវចូវខេត្តគ័ងតុងនៅថ្ងៃទី ១៣ ខែតុលា លោក ស៊ី ជិនភីង បានទទូចឲ្យកងម៉ារីនពង្រឹងសមត្ថភាពប្រយុទ្ធដើម្បីប្រែក្លាយជាកងទ័ពដ៏មានឥទ្ធិពលមួយ ដែលអាចប្រតិបត្តិការឆ្លើយតបលឿនរហ័ស និងមានសមត្ថភាពប្រយុទ្ធក្រោមលក្ខខណ្ឌអាកាសធាតុគ្រប់បែបយ៉ាង។
យោងតាមទូរទស្សន៍រដ្ឋចិន CCTV លោកប្រធានាធិបតី ស៊ី និយាយដូច្នេះថា៖«ផ្តោតការគិតនិងថាមពលអ្នកលើការត្រៀមលក្ខណៈទៅធ្វើសង្គ្រាម ហើយត្រូវតែត្រៀមទប់ទល់គ្រោះថ្នាក់ជានិច្ច»។
លោក ស៊ី ដែលជាប្រធានគណៈកម្មការយោធាមជ្ឈិមបក្សកុម្មុយនីស្តចិនដែរនោះ បានប្រាប់កងម៉ារីនទៀតថា ពួកគេ មានការទទួលខុសត្រូវសំខាន់ក្នុងការការពារបូរណភាពទឹកដីនិងអធិបតេយ្យភាព ព្រមទាំងផលប្រយោជន៍លំហសមុទ្ររបស់ប្រទេស ក៏ដូចជាផលប្រយោជន៍នៅបរទេសផងដែរ។
ទន្ទឹមនេះ លោកប្រធានាធិបតីសង្កត់ធ្ងន់ពីភាពចាំបាច់សម្រាប់កងម៉ារីនចិនក្នុងការធ្វើការជិតស្និទ្ធបន្ថែមទៀតជាមួយកងកម្លាំងដទៃទៀតរបស់កងទ័ពរំដោះប្រជាជនចិន ហើយធ្វើសមាហរណកម្មស៊ីជម្រៅឲ្យប្រែក្លាយជាប្រព័ន្ធប្រតិបត្តិការួម។
ទស្សនកិច្ចរបស់លោកស៊ីក្នុងមូលដ្ឋានទ័ពនេះ ធ្វើឡើងខណៈភាពតានតឹងកើនឡើងនៅច្រកសមុទ្រតៃវ៉ាន់ និងចំណងមិត្តភាពកាន់តែជិតស្និទ្ធរវាងតៃវ៉ាន់និងសហរដ្ឋអាមេរិក ។ ចិនដែលចាត់ទុកកោះតៃវ៉ាន់ជាដែនដីរបស់ខ្លួន ប្តេជ្ញាប្រើកម្លាំងយោធាបើចាំបាច់។
អ្នកនាំពាក្យក្រសួងការបរទេសចិន លោក Zhao Lijian បានបញ្ជាក់នៅថ្ងៃទី១៣ ខែតុលាថា ក្រុងប៉េកាំង នឹងវាយបកឆ្លើយតបនឹងរបាយការណ៍ដែលថា សភាអាមេរិកកំពុងត្រួតពិនិត្យលើកិច្ចព្រមព្រៀងចំនួន៣ផ្គត់ផ្គង់សព្វាវុធទំនើបៗឲ្យតៃវ៉ាន់។ «សហរដ្ឋអាមេរិក គួរលុបចោលភ្លាមៗនូវគម្រោងលក់អាវុធឲ្យតៃវ៉ាន់ បញ្ឈប់កិច្ចព្រមព្រៀងលក់អាវុធណាៗទាំងអស់ និងកាត់ចំណងទាក់ទងយោធាជាមួយតៃវ៉ាន់»។ លោក Zhao លើកឡើងបែបនេះ៕
Tag:
ចិន
ស៊ី ជិនភីង
ការពារជាតិ
© រក្សាសិទ្ធិដោយ thmeythmey.com