ដោយ៖ កង ម៉េងហុង
ទីភ្នាក់ងារផ្នែកអាកាសធាតុរបស់អង្គការសហប្រជាជាតិ (UN) នៅថ្ងៃទី១៣ ខែតុលា បានព្រមានពីការកើនឡើងគ្រោះធម្មជាតិដូចជាទឹកជំនន់ គ្រោះរាំងស្ងួត និងខ្យល់ព្យុះដែលបង្កដោយការប្រែប្រួលអាកាសធាតុ។ ជាមួយនឹងការកើនឡើងគ្រោះធម្មជាតិនេះ ចំនួនមនុស្សដែលត្រូវការជំនួយមនុស្សធម៌ នឹងកើនឡើងផងដែរ។
ខណៈដែលបម្រែបម្រួលអាកាសធាតុនៅតែជាបញ្ហាប្រឈមរបស់ពិភពលោកនោះ ឥទ្ធិពលរបស់វា ក៏នាំឲ្យមានកើនឡើងគ្រោះធម្មជាតិកាន់តែច្រើនឡើងដែរនៅឆ្នាំខាងមុខៗ ហើយមនុស្សដែលរងគ្រោះកាន់តែ ក៏កើនឡើងតាមនោះដែរ។ នេះបើតាមរបាយការណ៍ស្ថានភាពអាកាសធាតុ (The State of Climate Services) ឆ្នាំ២០២០ ដែលចេញដោយទីភ្នាក់ងារឧតុនិយមពិភពលោក (WMO) របស់អង្គការសហប្រជាជាតិ។
WMO ព្រមានក្នុងរបាយការណ៍ដែលរៀបចំជាមួយ១៦ស្ថាប័នទៀតថា ចំនួនមនុស្សដែលត្រូវការជំនួយមនុស្សធម៌អន្តរជាតិអាចកើនឡើង ៥០ ភាគរយនៅឆ្នាំ ២០៣០ បើប្រៀបធៀបទៅនឹងចំនួន ១០៨ លាននាក់ដែលត្រូវការវានៅទូទាំងពិភពលោកក្នុងឆ្នាំ ២០១៨ ។
របាយការណ៍ថ្មីមួយដែលបានចេញផ្សាយនៅថ្ងៃទី ១៣ បន្ថែមថា គ្រោះមហន្តរាយកាន់តែច្រើនដែលបណ្តាលមកពីអាកាសធាតុកំពុងកើតឡើងជារៀងរាល់ឆ្នាំ។ គ្រោះមហន្តរាយជាង ១១,០០០ លើកបានកើតឡើងត្រូវបានគេសន្មតថាពាក់ព័ន្ធជាមួយអាកាសធាតុ និងបាតុភូតធម្មជាតិ។ ឧទាហរណ៍ រលកយក្សស៊ូណាមិទាក់ទងនឹងទឹកសមុទ្រជាដើម។
ក្នុងរយៈពេល៥០ឆ្នាំចុងក្រោយនេះគ្រោះមហន្តរាយបានបណ្តាលឱ្យមនុស្ស ២ លាននាក់បានស្លាប់និងប៉ះពាល់ដល់សេដ្ឋកិច្ចដែលមានតម្លៃប្រមាណ ៣.៦ ពាន់ពាន់លានដុល្លារ។ នេះបើតាមរបាយការណ៍ដដែល។ ប៉ុន្តែអ្វីដែលគួរឲ្យត្រេកអរនោះ ចំនួនអ្នកស្លាប់ជាមធ្យមដោយសារគ្រោះមហន្តរាយក្នុងមួយឆ្នាំបានធ្លាក់ចុះមួយភាគបី ខណៈចំនួនគ្រោះធម្មជាតិ និងការចំណាយខាងសេដ្ឋកិច្ចបានកើនឡើងក៏ដោយ។
របាយការណ៍ឆ្នាំ២០២០ បានអំពាវនាវឱ្យរដ្ឋាភិបាលបញ្ចេញប្រាក់បន្ថែមទៀតទៅក្នុងប្រព័ន្ធប្រកាសអាសន្នជាមុន ដែលអាចលើកកម្ពស់សមត្ថភាពរបស់ប្រទេសនានាក្នុងការរៀបចំត្រៀមឆ្លើយតបនិងកាត់បន្ថយផលប៉ះពាល់នៃគ្រោះមហន្តរាយធម្មជាតិ។
អគ្គលេខាធិការ WMO លោក Petteri Taalas បាននិយាយថា នៅពេលដែល COVID-19 បង្កើតឱ្យមានវិបត្តិសុខភាពនិងសេដ្ឋកិច្ចអន្តរជាតិដ៏ធំមួយដែលវានឹងចំណាយពេលរាប់ឆ្នាំដើម្បីធ្វើប្រសើរឡើងវិញ វាក៏ជាការសំខាន់ដែលត្រូវចងចាំថា ការប្រែប្រួលអាកាសធាតុនឹងបន្តបង្កើនការគំរាមកំហែងដល់អាយុជីវិតមនុស្ស ប្រព័ន្ធអេកូឡូស៊ី សេដ្ឋកិច្ច និងសង្គមជាច្រើនសតវត្សរ៍ទៀតទៅអនាគត។
លោកអគ្គលេខាធិការ WMO រូបនេះបានសង្កត់ធ្ងន់ថា ការងើបឡើងវិញពីការរីករាលដាលនៃជំងឺរាតត្បាតនេះ ជាឱកាសមួយដើម្បីដើរទៅមុខប្រកបដោយចីរភាពឆ្ពោះទៅរកភាពធន់ និងការបន្ស៊ាំទៅនឹងការប្រែប្រួលអាកាសធាតុដែលបណ្តាលមកពីសកម្មភាពមនុស្សផងដែរ៕