ដំណាំដំឡូងមីជាង២៥០០ហិកតានៅប៉ៃលិនលិចលង់ដោយសារជំនន់ទឹកភ្លៀង

ជាតិ

សង្គមជាតិ

ដំណាំដំឡូងមីជាង២៥០០ហិកតានៅប៉ៃលិនលិចលង់ដោយសារជំនន់ទឹកភ្លៀង

15, Oct 2020 , 3:21 pm

រូបភាព

front សកម្មភាពរបស់ UYFC ខេត្តប៉ៃលិនជួយដកដំឡូងមីកសិករខេត្តប៉ៃលិន

ដោយ:

ដំណាំកសិកម្មប្រមាណ ៣ ៤០០ហិកតា ក្នុងខេត្តប៉ៃលិន ប្រឈមនឹងការខូចខាត ដោយសារជំនន់ទឹកភ្លៀង។ តាមលោក អែម សុភឿន អនុប្រធានមន្ទីរកសិកម្មខេត្តប៉ៃលិនប្រាប់សារព័ត៌មាន Thmeythmey25 ក្នុងចំណោមដំណាំទាំងនោះ មានដំឡូងមីខូចច្រើនជាងគេ ។

អនុប្រធានមន្ទីរកសិកម្មខេត្តរូបនេះ បានបញ្ជាក់កាលពីថ្ងៃទី១៤ ខែតុលា ថា ដំឡូងមី បានជន់លិចជិត២៥០០ហិកតា ខណៈកសិករមួយចំនួន បានបង្ខំចិត្តប្រមូលផលដំឡូងមីមុនរដូវកាលផង ដើម្បីជៀសវាងខូចខាតកាន់តែច្រើន។ ពោតក្រហម រងការជន់លិចជាង៧៩០ហិកតា ដំណាំស្រូវ ៧៦ហិកតា និងដំណាំរួមផ្សំ ៥៤ហិកតា។

ទន្ទឹមនឹងមន្ទីរកសិកម្មខេត្តប៉ៃលិន ក៏បានអំពាវនាវឲ្យកសិករ ប្រុងប្រយ័ត្នចំពោះសត្វចិញ្ចឹមរបស់ខ្លួន និងទាក់ទងទៅមន្ត្រីជំនាញ និងភ្នាក់ងារសត្វជាបន្ទាន់ ក្នុងករណីមានសត្វឈឺ ឬសត្វជួបបញ្ហាណាមួយ ដើម្បីអន្តរាគមន៍បានទាន់ពេលវេលា។

បើតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ គិតត្រឹមព្រឹកថ្ងៃទី១៤ តុលា ដំណាំកសិកម្មជាង១៦.៥ម៉ឺនហិកតា បានរងផលប៉ះពាល់ ក្នុងនោះស្រូវជាង១១ម៉ឺនហិកតា និង ដំណាំផ្សេងៗទៀត មានជាង៥.៥ម៉ឺនហិកតា ត្រូវជន់លិច។

ក្រៅពីដំណាំកសិកម្ម មានពល ១២នាក់ (ក្មេង៥នាក់) បានបាត់បង់ជីវិត និងមានពលរដ្ឋជិត១៦ម៉ឺននាក់ បានរងផលប៉ះពាល់ពីគ្រោះទឹកជំនន់នេះ៕