បុគ្គលិកសុខាភិបាលបារាំងរាប់រយនាក់ធ្វើកូដកម្ម ខណៈករណីកូវីដ-១៩ ហក់ឡើង

COVID-19

សង្គមអន្តរជាតិ

អន្តរជាតិ

បុគ្គលិកសុខាភិបាលបារាំងរាប់រយនាក់ធ្វើកូដកម្ម ខណៈករណីកូវីដ-១៩ ហក់ឡើង

16, Oct 2020 , 11:25 am

រូបភាព

បុគ្គលិកសុខាភិបាលបារាំងធ្វើបាតុកម្មតាមដងផ្លូវនាទីក្រុង ប៉ារីស នៅថ្ងៃទី ១៥ ខែតុលា ។ រូបភាព ៖ AFP

ដោយ:

បុគ្គលិកសុខាភិបាលបារាំងរាប់រយនាក់ បានដើរតវ៉ាតាមដងផ្លូវទីក្រុង ប៉ារីស នៅថ្ងៃទី ១៥ ខែតុលា ដើម្បីប្រឆាំងលក្ខខណ្ឌការងារក្នុងមន្ទីរពេទ្យដែលពួកគេធ្វើការ។ ការធ្វើកូដកម្មនេះ ធ្វើឡើងខណៈករណីឆ្លងជំងឺកូវីដ-១៩ ហក់ឡើងនៅទូទាំងប្រទេស។

វេជ្ជបណ្ឌិត គិលានុបដ្ឋាក និងបុគ្គលិកសុខាភិបាលផ្សេងទៀត ដែលសុទ្ធតែពាក់ម៉ាស់ពេទ្យការពារ បានប្រមុំផ្ដុំគ្នាតាមដងផ្លូវ ហើយលើកក្រវីបដា និងទង់ជាតិ ខណៈពួកគេបានដើរជាក្បួនពីរូបសំណាក Les Invalides របស់ទីក្រុងនេះ ឆ្ពោះទៅកាន់ក្រសួងសុខាភិបាល។ ក្រៅពីទីក្រុងប៉ារីស ការតវ៉ានេះ ក៏បានកើតឡើងក្នុងទីក្រុងមួយចំនួនទៀតរបស់បារាំងផងដែរ រួមមាន Annecy, Besançon, Saint-Étienne និង Rennes ។

ខណៈអត្រាករណីឆ្លងជំងឺកូវីដ-១៩បន្តកើនឡើងជាលំដាប់ ហើយគ្រែសម្រាកព្យាបាលនៅបន្ទប់សង្គ្រោះបន្ទាន់ពេញណែនយ៉ាងលឿនរហ័ស បុគ្គលិកសុខាភិបាលបារាំង ទាមទារប្រាក់បៀវត្សរ៍បន្ថែម លក្ខខណ្ឌការងារល្អប្រសើរជាងមុន និងជ្រើសរើសបុគ្គលិកថែមទៀតដើម្បីឆ្លើយតបការផ្ទុះរាលដាលឲ្យទាន់ពេល។

សហជីបសុខាភិបាលនិងសង្គមកិច្ចបារាំង (CGT Santé et Action Sociale) ប្រាប់ទីភ្នាក់ងារព័ត៌មាន AFP ថា មន្ទីរពេទ្យ និងគ្រឹះស្ថានសាធារណៈដទៃ ជួបប្រទះការលំបាកខ្លាំងដោយសារការងារច្រើនលើសលប់ ចាប់តាំងផ្ទុះជំងឺរាតត្បាតសកលកូវីដ-១៩មក ដោយគ្មានធនធានមនុស្សគ្រប់គ្រាន់។

កាលពីសប្ដាហ៍មុន ចំនួនអ្នកជំងឺកូវីដ-១៩ ដែលសម្រាកនៅមន្ទីរពេទ្យព្យាបាលកើនឡើង ៦៥២៩នាក់ ។ នេះបើតាមតួលេខចុងក្រោយរបស់ទីភ្នាក់ងារសុខភាពសាធារណៈរដ្ឋាភិបាលបារាំង (Santé Publique France) ដោយក្នុងនោះអ្នកជំងឺ១៧៥០នាក់ត្រូវបញ្ជូនទៅសម្រាកនៅបន្ទប់សង្គ្រោះបន្ទាន់។

ការធ្វើកូដកម្មពីសំណាក់បុគ្គលិកសុខាភិបាលនេះ ធ្វើឡើងក្រោយមួយថ្ងៃប៉ុណ្ណោះក្រោយប្រធានាធិបតីបារាំង អេម៉ានុយអែល ម៉ាក្រុង បានប្រកាសវិធានការរឹតត្បិតកូវីដ-១៩ថ្មីមួយចំនួន រួមមាន បម្រាមគោចរចន្លោះពីម៉ោង៩យប់ដល់៦ព្រឹក ក្នុងទីក្រុងប៉ារីស និងក្នុងតំបន់រងគ្រោះខ្លាំង៨ទីតាំងទៀត ។ លោក ម៉ាក្រុង ក៏ទទួលស្គាល់ពីបន្ទុកការងារធ្ងន់របស់វិស័យសុខាភិបាលរបស់ប្រទេសបារាំងផងដែរ។

នាយករដ្ឋមន្ត្រីបារាំង លោក Jean Castex នៅថ្ងៃទី ១៥ ខែតុលា បានប្រកាសថា រដ្ឋាភិបាលលោកមានផែនការពន្លឿនពេលវេលានៃដំឡើងប្រាក់បៀវត្សរ៍សម្រាប់បុគ្គលិកសុខាភិបាល។ លោកបន្ថែមថា បុគ្គលិកណាដែលលើកគម្រោងឈប់សម្រាកអំឡុងពេលថ្ងៃបុណ្យសប្ដាហ៍ក្រោយ នឹងទទួលប្រាក់ឧបត្ថម្ភបន្ថែមចន្លោះពី ១២៨ដុល្លារ ទៅ២៣៤ដុល្លារក្នុងមួយថ្ងៃផងដែរ។

ប៉ុន្តែសម្រាប់បុគ្គលិកសុខាភិបាលរាប់រយនាក់ដែលបានធ្វើបាតុកម្មនេះ ការប្រឹងប្រែងរដ្ឋាភិបាលនៅមិនទាន់គ្រាប់គ្រាន់ឡើយ។ តំណាងអ្នកតវ៉ាម្នាក់និយាយថា ស្ថានភាពក្នុងមន្ទីរពេទ្យ គឺកាន់តែអាក្រក់ខ្លាំងជាងរលកជំងឺកូវីដ-១៩ទីមួយទៀតផង ខណៈសេវាកម្មសង្គ្រោះបន្ទាន់ គឺច្រើនលើសលប់។ បច្ចុប្បន្ន ជំងឺកូវីដ-១៩ នៅបារាំង មានសរុប ៨០៩ ៦៨៤ករណី ដែលធ្វើឲ្យបារាំងក្លាយជាប្រទេសមានអត្រាចម្លងខ្ពស់លំដាប់ទី២ក្នុងតំបន់អឺរ៉ុប បន្ទាប់ពីអេស្ប៉ាញ៕