សង្គមអន្តរជាតិ
អន្តរជាតិ
ជប៉ុន គ្រោងបញ្ចេញទឹកពីរោងចក្រនុយក្លេអ៊ែរនៅ Fukushima ចូលក្នុងសមុទ្រ រោងចក្រថាមពលនុយក្លេអ៊ែរជប៉ុន Fukushima Daiichi។ រូបភាព៖ Kyodo
× រដ្ឋាភិបាលជប៉ុន គ្រោងបញ្ចេញទឹកដែលមានផ្ទុកសារធាតុវិទ្យុសកម្មពីរោងចក្រនុយក្លេអ៊ែរFukushima Daiichi ចូលទៅក្នុងសមុទ្រ។ គម្រោងបញ្ចេញទឹកពីរោងចក្រនុយក្លេអ៊ែរនេះ បានបង្កឲ្យក្រុមហ៊ុននេសាទ ជំទាស់យ៉ាងខ្លាំង និងទទូចឲ្យរដ្ឋាភិបាលជប៉ុន កុំបញ្ចេញទឹកទាំងនោះចូលសមុទ្រ។ នេះបើតាមការចុះផ្សាយរបស់ទីភ្នាក់ងារព័ត៌មានKyodo នៅថ្ងៃទី១៦ ខែតុលា។
ប្រសិនគ្មានការប្រែប្រួលទេ សេចក្តីសម្រេចជុំវិញការបញ្ចេញទឹកដែលមានសារធាតុវិទ្យុសកម្មពីរោងចក្រនុយក្លេអ៊ែរ Fukushima Daiichi ចូលទៅក្នុងសមុទ្រ នឹងធ្វើឡើងក្នុងខែនេះ។ ក្រុមហ៊ុនថាមពល Tokyo Electric បានប្រមូលស្តុកទឹកប្រភេទនេះច្រើនជាង ១លានតោន តាំងពីគ្រោះរញ្ជូយដីដែលបង្កទៅជារលកស៊ូណាមិនៅឆ្នាំ២០១១ ។ បើតាមការបញ្ជាក់របស់ក្រុមហ៊ុន កន្លែងផ្ទុកនេះ នឹងពេញនៅត្រឹមឆ្នាំ២០២២។ ទឹកប្រភេទនេះ ត្រូវបានប្រើប្រាស់ដើម្បីកាត់បន្ថយសារធាតុវិទ្យុសកម្ម ការគ្រប់គ្រងកាកសំណល់ក្នុងរោងចក្រ និងបញ្ហាផ្សេងទៀត។
ក្នុងជំនួបជាមួយប្រធានលេខាធិការគណៈរដ្ឋមន្ត្រីជប៉ុនលោក Katsunobu Kato លោក Hiroshi Kishi ប្រធានសហគ្រាសនេសាទ JF Zengyoren បានជំទាស់ទៅនឹងការបញ្ចេញទឹកនេះ និងជំរុញឲ្យរដ្ឋាភិបាលកុំបង្ហូរទឹក ដែលមានផ្ទុកសារធាតុវិទ្យុសកម្មចូលទៅក្នុងសមុទ្រ ព្រោះវាធ្វើឲ្យប៉ះពាល់ដល់កេរ្តិ៍ឈ្មោះជប៉ុនក្នុងការនេសាទត្រី និងគ្រឿងសមុទ្រ។ ចំណែកប្រជាជន ក៏ដូចជាអ្នកនេសាទនៅក្នុងតំបន់នេះ ក៏ប្រឆាំងការចាក់បញ្ចូលទឹកនេះចូលសមុទ្រដែរ ព្រោះធ្វើឲ្យប៉ះពាល់ត្រី និងធនធានផ្សេងទៀត។
ចាប់តាំងពីគ្រោះរញ្ជួយដី និងព្យុះស៊ូណាមិឆ្នាំ២០១១ ដែលបានបំផ្លាញរោងចក្រនុយក្លេអ៊ែរនេះមក មានប្រទេសជាច្រើនបានរឹតត្បិតក្នុងការទិញគ្រឿងសមុទ្រ និងផលិតផលកសិកម្មពីជប៉ុន ព្រោះដោយសារសារធាតុគីមីផ្សេងៗ បានហូរចូលសមុទ្រ និងតំបន់ផ្សេងៗ បន្ទាប់ពីរងការបំផ្លាញ។ ចំណែកកូរ៉េខាងត្បូង ថ្មីៗនេះ ក៏បានលើកឡើងពីការព្រួយបារម្ភជុំវិញការនាំចូលគ្រឿងសមុទ្រពីតំបន់នេះដែរ។
នៅដើមឆ្នាំ២០២០ រដ្ឋាភិបាលជប៉ុន បានរាយការណ៍ថា ទឹកនៅក្នុងរោងចក្រ Fukushima នេះ អាចនឹងចាក់ចូលសមុទ្រ ឬប្រើវិធីសាស្ត្ររំហួត។ ការបញ្ចេញទឹកមានផ្ទុកសារធាតុពុលនេះ ត្រូវបានជជែកជាច្រើនឆ្នាំមកហើយ។ រដ្ឋាភិបាលជប៉ុន នឹងបង្កើតគណៈកម្មការមួយ រួមគ្នាជាមួយមន្ត្រីតំបន់ និងឧស្សាហកម្មនេសាទ ដើម្បីសិក្សាពីផលវិបាក ការវាយតម្លៃផ្សេងៗ ជុំវិញការចាក់ទឹកប្រភេទនេះ ចូលសមុទ្រ។
នៅក្នុងខែកុម្ភៈកន្លងទៅ ក្នុងដំណើរទស្សនកិច្ចមករោងចក្រនុយក្លេអ៊ែរខាងលើ លោក Rafael Grossi ប្រធានទីភ្នាក់ងារថាមពលអាតូមិចអន្តរជាតិ បានលើកឡើងថា ការបញ្ចេញទឹកកខ្វក់ពីរោងចក្រនុយក្លេអ៊ែរ ចូលទៅក្នុងសមុទ្រ ជាការអនុវត្តទូទៅហើយនៅទូទាំងពិភពលោក បើទោះបីវាមិនទាន់ជាបញ្ហាអាសន្ននៅឡើយ៕
© រក្សាសិទ្ធិដោយ thmeythmey.com