តៃវ៉ាន់៤នាក់ ត្រូវឃុំខ្លួន ក្រោយនាំគ្រឿងញៀនជាង២តោន ពីឡាវ ឆ្លងកាត់ខ្មែរ បម្រុងទៅតៃវ៉ាន់

សង្គមអន្តរជាតិ

អន្តរជាតិ

តៃវ៉ាន់៤នាក់ ត្រូវឃុំខ្លួន ក្រោយនាំគ្រឿងញៀនជាង២តោន ពីឡាវ ឆ្លងកាត់ខ្មែរ បម្រុងទៅតៃវ៉ាន់

16, Oct 2020 , 7:59 pm

រូបភាព

ជនជាតិចិនតៃវ៉ាន់៤នាក់ ត្រូវចាប់ខ្លួន ជាមួយនឹងគ្រឿងញៀនជាង២,១តោន និងសារធាតុគីមីផ្សំ៦រយគីឡូក្រាម (រូបពីមន្ទីរប្រឆាំងគ្រឿងញៀន)

ដោយ: ថ្មីៗ

បុរសជនជាតិចិនតៃវ៉ាន់៤នាក់ ត្រូវបានអាជ្ញាធរកម្ពុជា ឃាត់ខ្លួនជាមួយនឹងគ្រឿងញៀន ដែលទម្ងន់ចូលខ្ទង់តោន។ ចៅក្រមស៊ើបសួរនៃសាលាដំបូងរាជធានីភ្នំពេញ ចេញបញ្ជាឲ្យកម្លាំងសមត្ថកិច្ច យកពួកគេ ទៅឃុំនៅពន្ធនាគារព្រៃសជាបណ្តោះអាសន្ន កាលពីថ្ងៃទី១៥ ខែតុលា ឆ្នាំ២០២០ ដើម្បីរង់ចាំការកាត់ទោស។

លោកព្រះរាជអាជ្ញារង គុជ គឹមឡុង អ្នកនាំពាក្យអយ្យការអមសាលាដំបូងរាជធានីភ្នំពេញ ប្រាប់សារព័ត៌មានថ្មីៗ តាមទូរស័ព្ទ នៅព្រឹកថ្ងៃទី១៦ ខែតុលា ថា ជនជាតិចិនតៃវ៉ាន់ទាំង៤នាក់នោះ ត្រូវបានយកទៅឃុំនៅមណ្ឌមអប់រំកែប្រែ១ (ម១) នៃពន្ធនាគារព្រៃស។ លោក បន្តថា គ្រឿងញៀន ដែលអាជ្ញាធរ ចាប់បាននៅនឹងជនជាតិចិនតៃវ៉ាន់ទាំង៤នាក់នោះ មានទម្ងន់ជាង២តោន តែលោក ពុំបានដឹងថា មានតម្លៃជាទឹកប្រាក់ប៉ុន្មានឡើយ។

មន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិ បានបង្ហោះព័ត៌មានថា វត្ថុតាងដែលចាប់បានពីជនជាតិចិនតៃវ៉ាន់ទាំង៤នាក់ រួមមាន គ្រឿងញៀនទម្ងន់ជាង២,១តោន និងសារធាតុគីមីផ្សំប្រមាណ៦រយគីឡូក្រាមទៀត (សរុបចូលគ្នាមានទំហំជាង២,៧តោន) ដោយសរុបជាទឹកប្រាក់ មានតម្លៃប្រមាណ១០លានដុល្លារ។ ជនជាតិចិនតៃវ៉ាន់ទាំង៤នាក់ ត្រូវបានកម្លាំងសមត្ថកិច្ច បង្ក្រាបបាននៅខេត្តព្រះសីហនុផងនិងនៅរាជធានីភ្នំពេញផង ហើយក៏រៀបចំសំណុំរឿងបញ្ជូនទៅសាលាដំបូងរាជធានីភ្នំពេញ កាលពីថ្ងៃទី១៤ ខែតុលា។

បើតាមព័ត៌មានពីមន្ទីរប្រឆាំងគ្រឿងញៀន ករណីនេះ គឺជាករណីដឹកជញ្ជូននិងជួញដូរគ្រឿងញៀនឆ្លងដែន ពីប្រទេសឡាវ ឆ្លងកាត់ប្រទេសកម្ពុជា និងបំណងនាំទៅកាន់កោះតៃវ៉ាន់។ មន្ទីរប្រឆាំងគ្រឿងញៀន បានឲ្យដឹងទៀតថា កិច្ចប្រតិបត្តិការបង្ក្រាបគ្រឿងញៀនទ្រង់ទ្រាយធំនេះ គឺមានការបញ្ជាពីនាយឧត្ដនសេនីយ៍ នេត សាវឿន អគ្គស្នងការនគរបាលជាតិ និងមានការចង្អុលដឹកនាំផ្ទាល់ពីនាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិទទួលផែនប្រឆាំងគ្រឿងញៀន។

មន្ទីរប្រឆាំងគ្រឿងញៀន សរសេរលើទំព័រហ្វេសប៊ុកថា៖«ករណីនេះ មន្ទីរប្រឆាំងបទល្មើសគ្រឿងញៀន បន្តស្រាវជ្រាវរកបក្ខពួក ដែលនៅសេសសល់ និងសហការជាមួយសមត្ថកិច្ចនៃប្រទេសពាក់ព័ន្ធ ដើម្បីស្រាវជ្រាវបង្ក្រាបឧក្រិដ្ឋជនជាមេខ្លោង»។

មន្ទីរប្រឆាំងគ្រឿងញៀន បង្ហាញថា បុរសជនជាតិចិនតៃវ៉ាន់ទាំង៤នាក់នោះ គឺ ឈ្មោះ ចិន ជឺជា (Chen Chih Chieh) ជាអ្នកបញ្ជាការដឹកជញ្ជូន, ឈ្មោះ ចាង ឈិជឺ (Zhan Qi Zhi) ជាអ្នកដឹកជញ្ជូន, ឈ្មោះ យ៉ូវ យ៉ាវជុង (YU Yao Tsung) ជាអ្នកដឹកជញ្ជូន, និង ឈ្មោះ ឈិន ប៉ាវជីន (Chen Pao Jiun) ជាអ្នកដឹកជញ្ជូន។ បើតាមមន្ទីរប្រឆាំងគ្រឿងញៀនដដែល នៅមានបុរសជនជាតិចិនតៃវ៉ាម្នាក់ទៀត ឈ្មោះ វូ ឈីសុន (WU Chi Hsun) តែជនល្មើសរូបនេះ បានកាន់គ្រឿងញៀន ព្យាយាមរត់គេចខ្លួន ដោយលួចសម្រួតតាមបង្កាន់ដៃអគារ ហើយក៏ធ្លាក់បណ្ដាលឲ្យស្លាប់៕