ជាតិ
សង្គមអន្តរជាតិ
អន្តរជាតិ
លោកស្រី ទេវីយ៉ានី ឧត្តម កុប្រាហ្កេដេ បំពេញការងារថ្ងៃដំបូងជាទូតឥណ្ឌាប្រចាំកម្ពុជា ទូតឥណ្ឌា
× លោកស្រីវេជ្ជបណ្ឌិត ទេវីយ៉ានី ឧត្តម កុប្រាហ្កេដេ (Devyani Uttam Khobragade) នៅថ្ងៃទី១៦ ខែតុលា ឆ្នាំ២០២០ នេះ បានចូលបំពេញការងារថ្ងៃដំបូង ក្នុងឋានៈជាឯកអគ្គរដ្ឋទូតថ្មីនៃសាធារណរដ្ឋឥណ្ឌា ប្រចាំកម្ពុជា។ កាលពីថ្ងៃទី១ ខែតុលា លោកស្រីត្រូវបានក្រសួងការបរទេសឥណ្ឌា តែងតាំងឲ្យកាន់តំណែងបន្តពីលោកស្រី Manika Jain.
មុនកាន់តំណែងនៅកម្ពុជា លោកស្រី Devyani Uttam Khobragade មានតួនាទីជាលេខាធិការ (Joint Secretary) ក្រសួងការបរទេសឥណ្ឌា ដោយលោកស្រីបានបម្រើការនៅការិយាល័យការបរទេសឥណ្ឌាចាប់តាំងពីឆ្នាំ១៩៩៩មក។
តាមបណ្តាញសារព័ត៌មានឥណ្ឌា លោកស្រី Khobragade ជាជាវេជ្ជបណ្ឌិតម្នាក់ ហើយកាលពីឆ្នាំ២០១២ គាត់ធ្លាប់កាន់តំណែងជាអគ្គរងកុងស៊ុលរបស់ឥណ្ឌាប្រចាំក្រុងញូវយ៉ក សហរដ្ឋអាមេរិក ដោយទទួលបន្ទុកកិច្ចការនារី នយោបាយ និងសេដ្ឋកិច្ច។
លោកស្រីជាកូនស្រីបង្កើតរបស់អ្នកនយោបាយជើងចាស់ លោក Uttam Khobragade ហើយលោកស្រី Khobragade ក៏ជាអ្នកនិពន្ធមួយរូបផងដែរ ដែលក្នុងនោះមានដូចជា «The White Sari» និង The Adventures of Young Ambedkar» ជាដើម។
នៅថ្ងៃធ្វើការដំបូង ស្ថានទូតឥណ្ឌា ក៏បានបង្ហោះរូបលោកស្រី ទេវីយ៉ានី ឧត្តម កុប្រាហ្កេដេ នៅពេលដែលស្រីបានចូលគោរពរូបសំណាកបិតាជាតិឥណ្ឌា មហាត្មៈគន្ធី ផងដែរ៕
© រក្សាសិទ្ធិដោយ thmeythmey.com