សង្គមអន្តរជាតិ
អន្តរជាតិ
អគ្គរដ្ឋទូតចិនប្រចាំកាណាដា លោក Cong Peiwu ។ រូបភាព៖ AFP
×![]()
អគ្គរដ្ឋទូតចិនប្រចាំកាណាដា លោក Cong Peiwu បានប្រាប់រដ្ឋាភិបាលកាណាដាពាក់ព័ន្ធការផ្ដល់សិទ្ធិជ្រកកោននយោបាយឲ្យបាតុករទាមទារប្រជាធិបតេយ្យហុងកុង។ មន្ត្រីការទូតចិន អះអាងថា បើកាណាដាផ្ដល់សិទ្ធិជ្រកកោនឲ្យពលរដ្ឋហុងកុង វាអាចប៉ះពាល់ដល់សុខទុក្ខ និងសុវត្ថិភាពពលរដ្ឋកាណាដាដែលកំពុងរស់នៅក្នុងក្រុងហុងកុង។ រដ្ឋមន្ត្រីការបរទេសកាណាដា ប្រតិកម្មការលើកឡើងបែបនេះ ដែលវាទំនងជាបង្កភាពតានតឹងថែមទៀតរវាងប្រទេសទាំងពីរ។ 
ក្នុងសន្និសីទព័ត៌មានតាមអនឡាញ នៅថ្ងៃទី១៦ ខែតុលា លោក Cong Peiwu លើកឡើងដូច្នេះថា៖«យើងទទូចឲ្យភាគីកាណាដា កុំផ្ដល់សិទ្ធិជ្រកកោននយោបាយទៅឲ្យឧក្រិដ្ឋជនហិង្សាទាំងនោះក្នុងទីក្រុងហុងកុង ព្រោះថាវាជាការជ្រៀតជ្រែកក្នុងកិច្ចការផ្ទៃក្នុងរបស់ចិន»។ លោក បន្តថា ទង្វើនេះ ក៏ជាការលើកទឹកចិត្តដល់ពួកបាតុករហិង្សាទាំងនោះផងដែរ។
ការលើកឡើងរបស់អគ្គរដ្ឋទូតចិនប្រចាំកាណាដា លោក Cong Peiwu គឺជាការឆ្លើយតបនឹងរបាយការណ៍មួយដែលថា គូស្នេហ៍ហុងកុងមួយគូ ដែលបានចូលរួមក្នុងបាតុកម្មហិង្សាកាលពីឆ្នាំមុន ត្រូវផ្ដល់សិទ្ធិជ្រកកោននយោបាយនៅកាណាដា។
តាមការចុះផ្សាយរបស់ទីភ្នាក់ងារព័ត៌មាន Reuters លោក Cong និយាយទៀតថា ប្រសិនបើខាងកាណាដា ពិតជាខ្វាយខ្វល់អំពីស្ថិរភាព និងវឌ្ឍនភាពក្នុងទីក្រុងហុងកុង ហើយពិតជាយកចិត្តទុកដាក់លើសុខទុក្ខនិងសុវត្ថិភាពរបស់ពលរដ្ឋកាណាដាទាំង៣០ម៉ឺននាក់ ដែលកំពុងរស់នៅក្នុងហុងកុង ព្រមទាំងក្រុមហ៊ុនកាណាដាមួយចំនួនធំដែលកំពុងប្រតិបត្តិការនៅហុងកុង រដ្ឋាភិបាលក្រុងអូតាវ៉ាគួរគាំទ្រកិច្ចប្រឹងប្រែងរបស់ទីក្រុងហុងកុងក្នុងការប្រយុទ្ធប្រឆាំងនឹងឧក្រិដ្ឋកម្មហិង្សា។
រដ្ឋមន្ត្រីការបរទេសកាណាដា Francois-Philippe Champagne បានចាត់ទុកសម្តីរបស់លោក Congថាមិនអាចទទួលយកបានទាំងស្រុង និងគួរឲ្យព្រួយបារម្ភ។ ក្នុងសេចក្តីថ្លែងការណ៍មួយ លោកអះអាងថា លោកបានចេញបញ្ជាឲ្យក្រសួងការបរទេសកោះហៅលោកអគ្គរដ្ឋទូតចិនមកបញ្ជាក់ឲ្យច្បាស់ពាក់ព័ន្ធនឹងបញ្ហានេះ ។
ទំនាក់ទំនងការទូត៥០ឆ្នាំរវាងចិននិងកាណាដា មានភាពល្អក់កករខ្លាំង ពោលគឺចាប់តាំងពីការចាប់ឃាត់ខ្លួនអ្នកស្រី Meng Wanzhou អ្នកគ្រប់គ្រងហិរញ្ញវត្ថុរបស់ក្រុមហ៊ុនយក្សចិន Huawei និងជាកូនស្រីរបស់ស្ថាបនិកក្រុមហ៊ុននេះផងដែរ។
អ្នកស្រី Meng ត្រូវបានចាប់ខ្លួនក្រោមដីការរបស់សហរដ្ឋអាមេរិកក្នុងខែធ្នូ ឆ្នាំ២០១៨ អំឡុងពេលអ្នកស្រីនៅទីក្រុង Vancouver ហើយត្រូវជាប់ចោទពីបទបោកប្រាស់ធនាគារពាក់ព័ន្ធការបំពានទណ្ឌកម្មអាមេរិកប្រឆាំងប្រទេសអ៊ីរ៉ង់។ ភ្លាមៗក្រោយមក អតីតអ្នកទូតកាណាដា Michael Kovrig និងអ្នកជំនួញកាណាដា Michael Spavor ត្រូវចាប់ខ្លួនក្រោមបទចោទចារកម្ម។ រដ្ឋាភិបាលលោកខាងលិចមើលឃើញការចាប់ឃុំឃាំងពលរដ្ឋកាណាដាទាំងពីរនាក់នេះជាការសងសឹករបស់ក្រុងប៉េកាំង៕
Tag:
ចិន
ហុងកុង
កាណាដា
© រក្សាសិទ្ធិដោយ thmeythmey.com
