ជាតិ
សង្គមជាតិ
អតីតនិទ្ទេសA ឡុងអេង៖ យើងត្រូវបែងចែកកាលវិភាគតាមចំណុចខ្លាំង និងខ្សោយខ្លួន ដើម្បីបានពិន្ទុល្អ អតីតសិស្សនិទ្ទេសA ឆ្នាំ២០១៩ (ឈាន ធីហ្វុងឡុងអេង) Front
× ភ្នំពេញ៖ សល់ជាងខែទៀតប៉ុណ្ណោះ ដំណើរការប្រឡងសញ្ញាបត្រមធ្យមសិក្សាទុតិយភូមិ នឹងចាប់ផ្ដើម។ អតីតសិស្សនិទ្ទេសA ឆ្នាំ២០១៩ ឈាន ធីហ្វុងឡុងអេង បានចែករំលែកគន្លឹះសំខាន់ៗ សម្រាប់ការត្រៀមខ្លួនមុនប្រឡង ដើម្បីទទួលបានលទ្ធផលល្អ ដោយសិស្សត្រូវផ្ដោតសំខាន់លើមុខវិជ្ជា ដែលត្រូវប្រឡងឱ្យស្មើៗគ្នា, ដឹងពីសមត្ថភាពខ្លួនឱ្យច្បាស់, បែងចែកកាលវិភាគស្វ័យសិក្សាឱ្យត្រឹមត្រូវ ជាពិសេសពេលប្រឡងត្រូវសរសេរលើក្រដាសកិច្ចការឱ្យច្បាស់ៗ និងមានរបៀបល្អ។
ដើម្បីជ្រាបច្បាស់សូមអញ្ជើញលោក-អ្នកទស្សនាបទសម្ភាសរវាងកញ្ញា អ៊ុត រស្មី អ្នកសារព័ត៌មានថ្មីៗ ជាមួយលោក ឈាន ធីហ្វុងឡុងអេង ជាសិស្សនិទ្ទេសA ឆ្នាំ២០១៩ ដូចតទៅ៖
ក្នុងបទសម្ភាសជាមួយសារព័ត៌មានថ្មីៗ អតីតសិស្សនិទ្ទេសA មកពីខេត្តកំពង់ចាម បានលើកឡើងថា រយៈពេល៣ខែនេះ សិស្សត្រូវតែផ្ដោតសំខាន់លើ មុខវិជ្ជា៧មុខដែលត្រូវប្រឡងឱ្យស្មើៗគ្នា និងត្រូវដឹងពីសមត្ថភាពរបស់ខ្លួនឱ្យច្បាស់ថាពូកែ ឬខ្សោយលើមុខវិជ្ជាអ្វី ដើម្បីបែងចែកកាលវិភាគស្វ័យសិក្សាឱ្យបានត្រឹមត្រូវ។
សិស្សនិទ្ទេសA ឆ្នាំ២០១៩រូបនេះ បានរៀបរាប់ដូច្នេះថា៖«យើងត្រូវបែងចែកកាលវិភាគទៅតាមចំណុចខ្លាំង និងចំណុចខ្សោយរបស់ខ្លួនឯង។ បើសិនជាយើងពូកែខាងទន្ទេញមេរៀន អីចឹងកាលវិភាគសិក្សាគួរតែផ្ដោតលើការធ្វើលំហាត់វិញច្រើនជាង ហើយបើសិនជាយើងពូកែធ្វើលំហាត់ យើងត្រូផ្ដោតលើមុខវិជ្ជាទន្ទេញមេរៀនច្រើនជាងវិញ»។
តាមរយៈបទពិសោធន៍របស់សិស្សនិទ្ទេសA ឆ្នាំ២០១៩ រូបនេះ បានយល់ថា ដើម្បីទទួលបាននិទ្ទេសល្អក្នុងការប្រឡង ក្រៅពីផ្ដោតលើការគណនាលំហាត់ឱ្យបានត្រឹមត្រូវ សិស្សត្រូវយកចិត្តទុកដាក់លើរបៀបនៃការសរសេរឱ្យបានច្បាស់ៗ មានរបៀបល្អ និងប្រយ័ត្នចំណុចតូចៗដូចជាសញ្ញារង្វង់ក្រចក សញ្ញាគុណ ចែក បូក ដក ព្រោះបើក្រដាសប្រឡងស្អាតមានរបៀប និងចម្លើយត្រឹមត្រូវទៀតនោះ នឹងងាយទទួលបានពិន្ទុខ្ពស់ក្នុងការប្រឡង។
លោក ឡុងអេង បានបន្ថែមដូច្នេះថា៖«មុខវិជ្ជាគណិត លំហាត់មានបែបបត់និងទម្រង់ខុសៗគ្នា ដូចជាលំហាត់អាំងតេក្រាល ចំណុចពិសេសយើងអត់គួរភ្លេច ដេអ៊ិចនៅកន្ទុយៗវាទេ កាលណាយើងភ្លេចវាអាចបាត់បង់មួយពិន្ទុៗ រាប់ទៅច្រើនដែរ។ មួយទៀតចំពោះរូបវិទ្យា យើងត្រូវសរសេរតាមលំដាប់លំដោយ សំនួរទីមួយគេសួរអំពីអី យើងដាក់សំនួរហើយ យើងគួរតែប្រើរូបមន្តណាដែលទាក់ទងជាមួយសំនួរហ្នឹងហើយស្រង់បម្រាប់ជំនួសលេខចូលហើយ គណនា។ ចំពោះមុខវិជ្ជាជីវៈវិទ្យាវិញ គឺប្លែក ដោយយើងត្រូវតែស្រង់បម្រាប់ជាមុនសិន ថាគេឱ្យអីមកខ្លះ ហើយបានយើងទាញពីបម្រាប់ហ្នឹង នាំយើងទៅរករូបមន្តដែលយើងចង់ធ្វើ»។
Tag:
សិស្សនិទ្ទេសA
អប់រំ
សម្ភាស
ឈាន ធីហ្វុងឡុងអេង
© រក្សាសិទ្ធិដោយ thmeythmey.com