ពីនេះ ពីនោះ
សុខភាព
×![]()
ដោយ: សារព័ត៌មានថ្មីៗ
ភាពធាត់ជ្រុលផ្សារភ្ជាប់នឹងការកើនឡើងនូវហានិភ័យនៃជំងឺជាច្រើន ប៉ុន្តែចង់ទប់ស្កាត់ភាពធាត់ជ្រុលមិនពិបាកឡើយ។ អ្វីដែលអ្នកត្រូវធ្វើ គឺគ្រាន់តែផ្លាស់ប្ដូរទម្លាប់ខ្លះក្នុងជីវិតរស់នៅប្រចាំថ្ងៃ។ ទម្លាប់ទាំងនោះមានអ្វីខ្លះ? កុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីទម្លាប់ដែលអ្នកគួរប្រកាន់ខ្ជាប់ដើម្បីចៀសផុតពីហានិភ័យនៃជំងឺធាត់ជ្រុល ៖
១. ព្យាយាមគ្រប់គ្រងស្ត្ត្រេស ឬភាពតានតឹងក្នុងអារម្មណ៍
នោះក៏ព្រោះតែភាពស្ត្រេសនាំឱ្យមានការបញ្ចេញអ័រម៉ូន cortisol ច្រើនដែលបង្កើនការស្តុកទុកជាតិខ្លាញ់ក្នុងរាងកាយ។ ដូច្នេះចូរព្យាយាមគ្រប់គ្រងភាពតានតឹងរបស់អ្នក។
២. ធ្វើលំហាត់ប្រាណជាប្រចាំ
ការធ្វើលំហាត់ប្រាណ គឺចាំបាច់ណាស់សម្រាប់រក្សាសុខភាពរាងកាយទាំងមូល ក៏ដូចជាប្រយុទ្ធប្រឆាំងនឹងភាពធាត់ជ្រុល។ ដូច្នេះដើម្បីជាការប្រសើរអ្នកចាំបាច់គួរព្យាយាមធ្វើលំហាត់ប្រាណឱ្យបានទៀងទាត់យ៉ាងហោចណាស់ ១៥០ នាទីក្នុងមួយសប្តាហ៍ ឬរយៈពេល ៣០ នាទីយ៉ាងហោចណាស់ ៥ ដងក្នុងមួយសប្តាហ៍។
៣. ចៀសវាងភេសជ្ជៈមានផ្ទុកជាតិស្ករខ្ពស់ និងភេសជ្ជៈសូដា
ជាតិស្ករខ្ពស់នឹងបង្កើនហានិភ័យនៃបញ្ហាធាត់ជ្រុល ឬលើសទម្ងន់។ ដូច្នេះដើម្បីជាការប្រសើរអ្នកចាំបាច់គួរកម្រិត ឬចៀសវាងទទួលទានភេសជ្ជៈមានផ្ទុកជាតិស្ករខ្ពស់។ នេះមិនមែនមានន័យថាអ្នកគួរជ្រើសរើសទទួលទានភេសជ្ជៈកំប៉ុងគ្មានជាតិស្ករជាប្រចាំជំនួសវិញនោះទេ! ក៏ព្រោះជាតិផ្អែមសិប្បនិម្មិតអាចបណ្ដាលឱ្យអ្នកធាត់បានដូចស្ករធម្មតាដែរ។
៤. ទទួលទានបន្លែឱ្យបានច្រើន
ការបង្កើនកម្រិតនៃការទទួលទានបន្លែ ក៏ដូចជាផ្លែឈើ គឺល្អណាស់ដើម្បីទប់ស្កាត់ និងដោះស្រាយបញ្ហាធាត់ជ្រុល។ ការទទួលទានបន្លែផ្លែឈើក៏ជួយជម្រុញការស្រកទម្ងន់ដែលល្អសម្រាប់អ្នកដែលកំពុងព្យាយាមសម្រកទម្ងន់ផងដែរ។ បន្លែផ្លែឈើថែមទាំងអាចកាត់បន្ថយហានិភ័យនៃជំងឺសសៃឈាមបេះដូងនិងមហារីកគួរឱ្យកត់សម្គាល់។
៥. គេងឱ្យបានគ្រប់គ្រាន់
ផលប៉ះពាល់មួយផ្សេងទៀតនៃការគេងមិនគ្រប់ គឺជំងឺធាត់ជ្រុល។ កង្វះនៃការគេងអាចបង្កបញ្ហាអតុល្យភាពនៃអ័រម៉ូននិងចំណង់អាហារ។ នៅពេលគេងមិនបានគ្រប់គ្រាន់រាងកាយនឹងមិនអាចផលិតអ័រម៉ូន ghrelin (ទទួលខុសត្រូវរំញោចការឃ្លាន) និងអ័រម៉ូន leptin (ទប់ស្កាត់ចំណង់អាហារ) ត្រឹមត្រូវដើម្បីអាចអោយខួរក្បាលបានដឹងថាយើងឆ្អែតក្រោយទទួលទានរួចឡើយ។ ម្យ៉ាងវិញទៀតការគេងមិនគ្រប់អាចបណ្ដាលឱ្យរាងកាយស្ត្រេសហើយបញ្ចេញអ័រម៉ូន cortisol ដែលបង្កើនឱកាសនៃការកើនទម្ងន់មិនចាំបាច់ផងដែរ។
៦. កុំគេងច្រើនហួសម៉ោងពេក
ក្រៅពីជម្រើសនៃអាហារសុខភាពល្អហើយនោះ វិធីដ៏សំខាន់មួយទៀតដើម្បីកម្ចាត់ទម្ងន់ដែលលើស គឺការធ្វើសកម្មភាពរាងកាយ ឬរបៀបរស់នៅប្រកបដោយភាពសកម្ម។ ហើយវាច្បាស់ណាស់ដែលអ្នកនឹងមិនអាចសម្រេចបាន ប្រសិនបើគិតតែពីគេង។ ការធាត់លើសទម្ងន់មិនត្រឹមតែធ្វើឱ្យអ្នកបាត់បង់ភាពទាក់ទាញប៉ុណ្ណោះទេ ប៉ុន្តែក៏មិនប្រសើរចំពោះសុខភាពផងដែរ ដោយជានាំឱ្យកើតមានជំងឺគួរឱ្យព្រួយបារម្ភជាច្រើន។ ការសិក្សាស្រាវជ្រាវផ្សេងៗគ្នាជាច្រើនបានបង្ហាញថា ការគេងមិនគ្រប់ ឬគេងយូរពេក មានទំនាក់ទំនងផ្សារភ្ជាប់ទៅនឹងជំងឺទឹកនោមផ្អែម និងជំងឺធាត់ជ្រុល។ ពី ៧ ទៅ ៩ ម៉ោង គឺជាបរិមាណនៃការគេងរាល់យប់ដែលអាជ្ញាធរសុខាភិបាលបានណែនាំ។
៧. កុំរំលងមិនទទួលទានអាហារពេលព្រឹក
នោះក៏ព្រោះតែអ្នកអាចនឹងទទួលទានអាហារពេលថ្ងៃ ឬល្ងាចច្រើនជាងធម្មតា ប្រសិនបើមិនបានទទួលទានអ្វីសោះតាំងពីព្រឹក។ លើសពីនេះទៅទៀតទៀតប្រសិនបើអ្នកមិនទទួលទានអាហារពេលព្រឹកទេនោះអ្នកប្រហែលជានឹងមិនរក្សាបាននូវជាតិប្រូតេអ៊ីនគ្រប់គ្រាន់ក្នុងរាងកាយឡើយ។ ហើយប្រូតេអ៊ីន គឺដើរតួនាទីយ៉ាងសំខាន់នៅក្នុងការទទួលនិងរក្សាបាននូវទម្ងន់ដ៏ល្អឥតខ្ចោះ។ ប្រូតេអ៊ីនជួយបង្កើនលឿននៃការដុតរំលាយអាហារនិងថែមទាំងធ្វើឲ្យមានអារម្មណ៍ថាឆ្អែតបានយូរទៀតផង។
៨. ទទួលទានភេសជ្ជៈក្ដៅឧណ្ហៗ
ភេសជ្ជៈក្ដៅឧណ្ហៗកាត់បន្ថយបរិមាណនៃកាកសំនល់មេតាប៉ូលីសពន្យឺតដំណើរការនៃភាពចាស់តាមវ័យ។ ការទទួលទានតែ ឬទឹកក្ដៅឧណ្ហៗ ១ កែវ នៅរាល់ ៣០ នាទី មុនពេលអាហារ ជួយពន្លឿនការរំលាយអាហារ បង្កើនភាពសកម្មនៃការដុតរំលាយអាហារក្នុងរាងកាយ និងសម្រួលចរន្តឈាម។
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
