សេដ្ឋកិច្ចចិន បន្តធូរស្រាលឡើងវិញពីជំងឺរាតត្បាតសកលកូវីដ-១៩ ជាមួយកំណើនសេដ្ឋកិច្ចចន្លោះខែកក្កដានិងកញ្ញា កើនឡើង៤,៩ភាគរយ បើធៀបនឹងត្រីមាសទី៣ឆ្នាំមុន។ នេះបើតាមតួលេខផ្លូវការចុងក្រោយ។ យ៉ាងណាមិញ តួលេខនេះ គឺទាបជាងការព្យាករទុក ៥,២ភាគរយរបស់អ្នកជំនាញសេដ្ឋកិច្ចខ្លះ។
វិបត្តិកូវីដ-១៩ ដែលបានផ្ទុះឡើងដំបូងក្នុងចុងឆ្នាំ២០១៩ បានជះឥទ្ធិពលធ្ងន់ធ្ងរដល់សេដ្ឋកិច្ចចិន។ ៣ខែដើមឆ្នាំ២០២០ សេដ្ឋកិច្ចចិនដាំក្បាលចុះ ៦,៨ភាគរយ នៅពេលសកម្មភាពរោងចក្រនិងឧស្សាហកម្មនៅទូទាំងប្រទេសផ្អាកដំណើរការ។ នេះជាលើកដំបូងដែលសេដ្ឋកិច្ចធ្លាក់ចុះខ្លាំងបែបនេះចាប់តាំងពីឆ្នាំ១៩៩២មក។
យោងតាមទិន្នន័យពីការិយាលល័យស្ថិតិជាតិរបស់ចិន នៅថ្ងៃទី ១៩ ខែតុលា ផលិតផលក្នុងស្រុកសរុប (GDP) ចិន បានកើន ៤,៩ភាគរយក្នុងចន្លោះខែកក្កដា-កញ្ញា ហើយលឿនជាងកំណើនសេដ្ឋកិច្ច ៣,២ភាគរយក្នុងត្រីមាសទី២ ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
យ៉ាងណាមិញ កំណើនសេដ្ឋកិច្ចចិននេះ គឺទាបជាងការព្យាករទុក ៥,២ភាគរយ របស់អ្នកជំនាញសេដ្ឋកិច្ចក្នុងការស្ទង់មតិរបស់ទីភ្នាក់ងារ Reuters ។ ចំណែក ក្នុងពេល៩ខែដើមឆ្នាំ២០២០ សេដ្ឋកិច្ចរបស់យក្សអាស៊ីមួយនេះ កើន ០,៧ភាគរយ បើធៀបនឹងឆ្នាំមុន។ ទិន្នន័យផ្លូវការដដែលនេះ បង្ហាញបែបនេះ។
សន្ទុះនៃកំណើនសេដ្ឋកិច្ចចិននេះ កើតឡើងក្រោយរដ្ឋាភិបាលក្រុងប៉េកាំងបានដាក់ចេញចំណាត់ការជាច្រើនក្នុងឆ្នាំនេះ រួមមាន បង្កើនការចំណាយថវិកាជាតិ បន្ធូរបន្ថយពន្ធ ព្រមទាំងកាត់បន្ថយអត្រាការប្រាក់លើកម្ចី និងតម្រូវការបម្រុងរបស់ធានាដើម្បីស្ដារសេដ្ឋកិច្ច និងគាំទ្រការងារ។
ម្យ៉ាងទៀត សេដ្ឋកិច្ចចិនសម្រាប់ត្រីមាសក្រោយ ក៏រំពឹងមានសន្ទុះអំឡុង «សប្ដាហ៍មាស» ដែលជាថ្ងៃឈប់សម្រាកប្រចាំឆ្នាំ ក្នុងខែតុលា ពោលគឺចាប់ផ្ដើមពីថ្ងៃ១ ដល់ថ្ងៃទី៧ ខែតុលា។ ខណៈការធ្វើដំណើរអន្តរជាតិរងការរឹតត្បិតធ្ងន់ធ្ងរ ប្រជាជនចិនរាប់លាននាក់ បានធ្វើដំណើរ និងចាយវាយក្នុងស្រុកជំនួសវិញ អំឡុងពេលឈប់សម្រាកនេះ។
នាយករដ្ឋមន្ត្រីចិន លី ខឹឈាង នៅដើមខែតុលា បានព្រមានថា ចិនត្រូវការប្រឹងប្រែងខ្លាំងបន្ថែមទៀតដើម្បីសម្រេចគោលដៅសេដ្ឋកិច្ចពេញមួយឆ្នាំរបស់ខ្លួន ខណៈបរិយាកាសសេដ្ឋកិច្ចបរទេសនិងក្នុងស្រុកមានភាពស្មុគស្មាញ៕