អ្នកស្លាប់ដោយទឹកជំនន់ឡើងដល់២៥នាក់ ក្នុងនោះ១៥នាក់នៅបន្ទាយមានជ័យ

ជាតិ

អ្នកស្លាប់ដោយទឹកជំនន់ឡើងដល់២៥នាក់ ក្នុងនោះ១៥នាក់នៅបន្ទាយមានជ័យ

19, Oct 2020 , 10:19 pm

រូបភាព

លោក គន់ គីម ទេសរដ្ឋមន្ត្រី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ មើលស្ថានភាពទឹកជំនន់នៅបន្ទាយមានជ័យកាលពីថ្ងៃទី១៨ ខែតុលា

ដោយ:

ពលរដ្ឋស្លាប់ដោយសារទឹកជំនន់កើនឡើងដល់១៥ នាក់នៅក្នុងខេត្តបន្ទាយមានជ័យ ខណៈ អ្នកស្លាប់ដោយសារទឹកជំនន់សរុបមានចំនួន២៥នាក់ ក្នុងចំណោមខេត្តចំនួន ៥ គិតមកដល់ថ្ងៃទី១៩ ខែតុលា ឆ្នាំ២០២០។ នេះបើតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ។

អ្នកសា្លប់ដោយសារទឹកជំនន់ក្នុងខេត្តបន្ទាយមានជ័យ កើនដល់១៥នាក់ ក្នុងនោះមាន ក្មេងចំនួន ៤នាក់។ បើតាមគណៈកម្មាធិការជាតិគ្រប់គ្រងគ្រោះមហន្តរាយ មូលហេតុដែលបណ្ដាលឲ្យពលរដ្ឋនៅខេត្តបន្ទាយមានជ័យចំនួន ១៥នាក់ បាត់បង់ជីវិត ដោយសារឆក់ចរន្តអគ្គិសនី, លង់ទឹក និងរអិលជើងធ្លាក់ទឹក។

ជនរងគ្រោះបាត់បង់ជីវិតដោយសារទឹកជំនន់ខាងលើនេះ ស្ថិតនៅក្នុង ៦ស្រុក-ក្រុងនៃខេត្តបន្ទាយមានជ័យ រួមមាន ស្រុកស្វាយចេក, មង្គលបុរី, ម៉ាឡៃ, អូរជ្រៅ, ព្រះនេត្រព្រះ, ថ្មពួក និងក្រុងសិរីសោភ័ណ្ឌ។ របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹងទៀតថា គិតមកដល់ថ្ងៃទី ១៩ ខែតុលានេះ អ្នកស្លាប់ដោយសារទឹកជំនន់កើនដល់ ២៥នាក់ ដែលកើតឡើងនៅខេត្តចំនួន ៥ រួមមាន ខេត្តបន្ទាយជ័យ ១៥នាក់, ខេត្តព្រះសីហនុ ២នាក់, ពោធិ៍សាត់ ៣ នាក់, ប៉ៃលិន ១នាក់ និងខេត្តកំពង់ធំ ៤នាក់។

ក្រៅពីសម្លាប់មនុស្ស ចំនួន២៥នាក់ ក្នុងខេត្តចំនួន៥នេះ ទឹកជំនន់បានធ្វើឲ្យប៉ះពាល់ដល់ប្រជាពលរដ្ឋប្រមាណជាង ៣១ម៉ឺននាក់ និងប៉ះពាល់ដំណាំកសិកម្ម ប្រមាណជិត ៣០ម៉ឺនហិកតានៅក្នុង ១៩រាជធានី-ខេត្ត៕