ភ្នំពេញ៖ លោក ស៊ឺ សោភ័ណ្ឌរិទ្ធី ដែលគេនិយមស្គាល់ថា «Judge រិទ្ធី» ក្នុងកម្មវិធី Master Chef Khmer ទាំងរដូវកាលទី១ និងរដូវកាលទី២នេះ បានទទួលមរណភាព វេលាម៉ោង២យប់ ឈានចូលថ្ងៃទី២១ ខែតុលា ដោយសារជំងឺប្រចាំកាយ ។
ភរិយារបស់លោក ស៊ឺ សោភ័ណ្ឌរិទ្ធី បានបញ្ជាក់ប្រាប់អ្នកសារព័ត៌មានថ្មីៗតាមទូរសព្ទថា លោក រិទ្ធី បានមរណភាពកាលពីម៉ោង២យប់ ឈានចូលថ្ងៃទី២១ ខែតុលា ដោយសារជំងឺលើសជាងស្ករ ជំងឺក្រិនថ្លើម និងជំងឺផ្សេងៗទៀត។ ភរិយាលោក ស៊ឺ សោភ័ណ្ឌរិទ្ធីបានរៀបរាប់ដូច្នេះថា៖«ប្តីខ្ញុំគាត់ឈឺជំងឺទាំងនេះអស់រយៈពេល២ឆ្នាំហើយ។ ហើយគាត់សម្រាកព្យាបាលនៅពេទ្យអស់រយៈពេល១០ថ្ងៃមកក្រោយ ដោយធ្វើទុក្ខខ្លាំងរយៈពេល២ ទៅ៣ថ្ងៃមុន។ ហើយគាត់ក៏ស្លាប់នៅយប់មិញនៅមន្ទីរពេទ្យខេមា»។
បើតាមភរិយាលោក ស៊ឺ សោភ័ណ្ឌរិទ្ធី ពិធីបុណ្យសពរបស់លោក រិទ្ធី កំពុងតែប្រារព្ធធ្វើឡើងនៅសង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។
លោក រិន ណារ៉ា ដែលនិយាយតំណាងឲ្យកម្មវិធី Master Chef Khmer មានការសោកស្តាយ និងទុក្ខព្រួយជាខ្លាំង ចំពោះការបាត់បង់លោក ស៊ូ ភណ្ឌរិទ្ធី។ លោក រិន ណារ៉ា ចាត់ទុកថាការបាត់បង់សមាជិកគណៈកម្មាការកម្មវិធីMaster Chef Khmerមួយរូបនេះ ប្រៀបដូចជាបាត់បង់ធនធានផ្នែកចុងភៅខ្មែរដ៏មានសមត្ថភាពមួយរូបផងដែរ។
«ការស្លាប់របស់គាត់ ជាមហាទុក្ខសោករបស់ក្រុមគ្រួសាររបស់គាត់ និងរបស់សមាជិកទាំងអស់ក្នុងកម្មវិធី Master Chef Khmer។ គាត់ជាចុងភៅឯកមា្នក់ដែលមានសមត្ថភាពខ្ពស់ ព្រោះគាត់មានសមត្ថភាព និងបទពិសោធន៍លើសខ្ញុំច្រើនឆ្នាំឯណោះ។ ខ្ញុំចាត់ទុកដូចជាបងប្រុសបង្កើតអ៊ីចឹង។ នេះជាការរៀបរាប់របស់លោក រិន ណារ៉ា។
ចំពោះសមាជិកគណៈកម្មាការមា្នក់ទៀតគឺ Jessica ក៏បានចូលរួមរំលែកទុក្ខលោករិទ្ធីផងដែរ។ «គាត់ប្រៀបដូចជាគ្រូ ជាបង ជាដៃគូរការងារដ៏ល្អ ហើយក៏ជា Chef មួយរូបដែលមានសម្ថភាពខ្ពស់ផងដែរ។ ប្អូនសូមឲ្យបងទៅកាន់សុគតិភព ហើយសូមបួងសួងដល់បង បើមានជាតិក្រោយពិតសូមកុំឲ្យបងដូចជាតិនេះអី សូមអោយមានសុខភាពល្អព្រមទាំងអាយុវែងផងដែរ។ ប្អូនពិតជាសោកស្តាយខ្លាំងណាស់ចំពោះការបាត់បង់រូបបងប្រៀបដូចជាការបង់ធនធានមនុស្សដែលមានសម្ថភាពដ៏ល្អមួយរូប ជាចុងក្រោយបងរិទ្ធីនៅតែស្ថិតក្នុងការចងចាំប្អូន និងប្រជាពលរដ្ឋទូទាំងប្រទេស»។ នេះជាការរំលែកទុក្ខរបស់គណៈកម្មការ Jessica ។
ការបាត់បង់ចុងភៅខ្មែរមួយរូបនេះ មានពលរដ្ឋដែលនិយមតាមដានកម្មវិធីការប្រឡងប្រកួតធ្វើម្ហូបនេះ បានបង្ហាញការសោកស្តាយ ដោយអ្នកខ្លះសឹងតែមិនជឿថាគាត់ស្លាប់ទៅទៀត ពីព្រោះហាក់បីដូចជារយៈពេលខ្លីពេក ខណៈគេឃើញវត្តមានគាត់ ក្នុងកម្មវិធីប៉ុន្មានថ្ងៃមុននៃការស្លាប់នេះ។
បេក្ខជនប្រកួតធ្វើម្ហូបម្នាក់ ក្នុងចំណោមបេក្ខជន១៦នាក់ទៀត ដែលមានឈ្មោះថា យូរ៉ា បានសរសេរសារតាមទំព័រហ្វេសប៊ុកដោយបង្ហាញការតក់ស្លុតនូវដំណឹងមរណភាពរបស់គណៈកម្មាការរិទ្ធី។ លោកបានរៀបរាប់ដូច្នេះថា៖«ពិតជាតក់ស្លុតខ្លាំងណាស់Chef ពេលដឹងថាChef នៅពេទ្យខ្ញុំធ្វើអ្វីមិនកើតទេ រត់ទៅពេទ្យទាំងយប់ បានជូនដំណើរChefទៅផ្ទះលើកចុងក្រោយRIP Chef។ ទើបនិយាយការងារជាមួយChef រួចហើយកំពុងរង់ចាំគំរោងទាំង៣របស់Chefធ្វើរួមគ្នាតែគួរអោយសោកសៅណាស់Chefបានទៅចោលខ្ញុំហើយទៅដោយគ្មានការត្រលប់វិញទេ ខ្ញុំចាំទូរសព្ទChef ចេះតែបាត់សូន្យឈឹងទាល់ឃើញដំណឹងនេះធ្វើអោយខ្ញុំទទួលយកមិនបានទេChef។
ក្រៅពីលោក ស៊ូ សុភណ្ឌរិទ្ធី ជាគណៈកម្មាការកម្មវិធី Master Chef Khmer ដែលមានបទពិសោធន៍ចំអិនម្ហូបជាង១០ឆ្នាំមកហើយ លោក ក៏ជាមេចុងភៅម្នាក់នៅភោជនីយដ្ឋាន One More Restaurant ផងដែរ៕