ជាតិ
ប្រទះឃើញក្រពើមួយក្បាលងាប់ នៅស្រុកអង្គរជុំ ខេត្តសៀមរាប ស្របពេលទឹកជំនន់
ក្រពើមួយក្បាលងាប់ នៅក្បែរស្ពានមួយកន្លែង ក្នុងស្រុកអង្គរជុំ ខេត្តសៀមរាប (រូបពីហ្វេសប៊ុករដ្ឋបាលស្រុកអង្គរជុំ ខេត្តសៀមរាប)
×![]()
សៀមរាប៖ សត្វក្រពើមួយក្បាល ត្រូវបានប្រជាពលរដ្ឋប្រទះឃើញងាប់ និងហើមស្ទើររលួយទៅហើយ នៅចំណុចស្ពានមួយកន្លែងក្នុងទីរួមស្រុកអង្គរជុំ ខេត្តសៀមរាប។ នេះបើតាមលោក លុក ផុស អភិបាលស្រុកអង្គរជុំ ។
លោក លុក ផុស ពន្យល់ថា សត្វក្រពើនោះមានសភាពហើម និងស្ទើររលួយ ដែលតាមការសន្និដ្ឋានរបស់អាជ្ញាធរអាចអណ្ដែតមកពីភូមិសាស្ដ្រដទៃមក។ លោក លុក ផុស បន្តថា ក្រពើនោះមានឆែមមាត់លើ និងដាច់ដៃម្ខាង ដែលតាមការពិចារណា វាត្រូវបានកន្លែងចិញ្ចឹមមួយយកបោះចោលតាមទឹក។
យ៉ាងណាក៏ដោយ អភិបាលស្រុកអង្គរជុំ សំណូមពរឱ្យប្រជាពលរដ្ឋមានការការពារឱ្យបានត្រឹមត្រូវ ដោយមិនត្រូវចុះទឹកជ្រៅៗទេ ដោយបារម្ភពីហានិភ័យផ្សេងៗ។ «យើងមិនដឹងថា សត្វក្រពើវាមកពីទីណាឱ្យប្រាកដទេ អាចជាក្រពើព្រៃក៏មិនដឹង ដូច្នេះត្រូវមានការប្រុងប្រយ័ត្នដែរ ជៀសវាងគ្រោះថ្នាក់ជាយថាហេតុ»។ លោក លុក ផុស បន្ថែម។
ស្រុកអង្គរជុំជាស្រុកមួយក្នុងខេត្តសៀមរាប ដែលរងគ្រោះដោយសារជំនន់ទឹកភ្លៀង ដែលហូរធ្លាក់ពីតំបន់ខាងលើ នៃខេត្តឧត្តរមានជ័យ។ ជំនន់ទឹកភ្លៀងបានវាយប្រហារក្នុងស្រុកមួយនេះ ក្នុងសភាពខ្លាំងក្លានារយៈពេល២ថ្ងៃ គឺចាប់ពីថ្ងៃទី១៩ និង២០ តុលា ។បច្ចុប្បន្ន ទឹកបានស្រកជាបណ្ដើរៗខ្លះហើយ។ តាមការបញ្ជាក់ពីលោកអភិបាលស្រុក លោក លុក ផុស ឃុំចំនួន៦ក្នុងចំណោម៧នៃស្រុក រងផលប៉ះពាល់ដោយសារគ្រោះជំនន់ទឹកភ្លៀងនារយៈពេលខ្លីនេះ និងប៉ះពាល់ដល់គ្រួសារជាង៣ពាន់គ្រួសារ៕
Tag:
ទឹកជំនន់
ស្រុកអង្គរជុំ
© រក្សាសិទ្ធិដោយ thmeythmey.com
