សង្គមអន្តរជាតិ
អន្តរជាតិ
កូរ៉េខាងត្បូង សន្យាផ្ដល់ជំនួយមនុស្សធម៌៣០ម៉ឺនដុល្លារឲ្យវៀតណាម ផ្ទះរបស់ពលរដ្ឋវៀតណាមដែលជន់លិច ក្នុងខេត្ត Quang Binh ។ រូបភាព៖ VIetnam Red Cross
× រដ្ឋាភិបាលកូរ៉េខាងត្បូង ប្រកាសផ្ដល់ជំនួយមនុស្សធម៌ទំហំទឹកប្រាក់ ៣០ម៉ឺនដុល្លារឲ្យវៀតណាម ដើម្បីដោះស្រាយផលប៉ះពាល់ដោយសារជំនន់ទឹកភ្លៀង។ នេះបើតាមក្រសួងការបរទេសកូរ៉េខាងត្បូង នៅថ្ងៃទី ២២ ខែតុលា ។
ក្នុងសេចក្តីប្រកាសព័ត៌មាន ក្រសួងការបរទេសកូរ៉េខាងត្បូង បញ្ជាក់ដូច្នេះថា រដ្ឋាភិបាលសង្ឃឹមថា ជំនួយគ្រាអាសន្ននេះ នឹងត្រូវប្រើប្រាស់ដើម្បីជួយដល់ជនរងគ្រោះដោយសារជំនន់ទឹកភ្លៀង និងរួមចចំណែកជួយស្ដារជីវភាពពួកគេ។ នេះបើតាមទីភ្នាក់ងារព័ត៌មាន Yonhap ។
គ្រោះទឹកជំនន់ដែលបង្កឡើងដោយភ្លៀងធ្លាក់ច្រើនថ្ងៃជាប់គ្នាក្នុងប្រទេសវៀតណាមភាគកណ្ដាល បានឆក់យកជីវិតមនុស្ស១១៤នាក់ ខណៈ២១ផ្សេងទៀតបាត់ខ្លួន គិតត្រឹមថ្ងៃទី ២២ ខែតុលា។ មនុស្សប្រមាណ១០ម៉ឺននាក់ទៀត ត្រូវបានជម្លៀសចេញពីផ្ទះសម្បែង ហើយផ្ទះជាង១៧ម៉ឺនខ្នង ត្រូវជន់លិច។
យោងតាមទីភ្នាក់ងារឧតុនិយមវៀតណាម ព្យុះ «សូដែល» បន្តមានឥទ្ធិពលខ្លាំងដដែលក្នុងប្រទេសវៀតណាម ហើយទំនងជានាំយកទឹកភ្លៀងធ្ងន់ធ្ងរថែមទៀតមកលើប្រទេសនេះ ជាពិសេស តំបន់ភាគកណ្ដាល តែម្ដង។ ព្យុះនេះ អាច បន្តវាយប្រហារវៀតណាមរហូតដល់ថ្ងៃអាទិត្យ។
និយាយដល់គ្រោះធម្មជាតិនៅឥណ្ឌូណេស៊ីវិញ ភ្លៀងធ្លាក់ខ្លាំង បានបង្កឲ្យមានហេតុការណ៍បាក់ស្រុតដីនៅរ៉ែធ្យូងថ្មមួយកន្លែងលើកោះ ស៊ូម៉ាត្រា ដែលសម្លាប់កម្មករជីករ៉ែ១១នាក់។ អាជ្ញាធរឥណ្ឌូណេស៊ី បានបញ្ជាក់បែបនេះ នៅថ្ងៃទី ២២ ខែតុលា។
ហេតុការណ៍បាក់ដី បានកើតឡើងនៅថ្ងៃទី ២១ ខែតុលា ក្នុងរូងជីករ៉ែមួយកន្លែងជម្រៅ ២០ម៉ែត្រ នៅភូមិ Tanjung Lalang ស្រុក Muara Enim ខេត្ត ស៊ូម៉ាត្រាខាងត្បូង ។ នេះបើតាមការបញ្ជាក់របស់អ្នកនាំពាក្យទីភ្នាក់ងារទប់ស្កាត់គ្រោះមហន្តរាយជាតិរបស់ឥណ្ឌូណេស៊ី លោក Raditya Jati ។
តាមការចុះផ្សាយរបស់ទីភ្នាក់ងារព័ត៌មាន AP ក្រុមជួយសង្គ្រោះ បានរកឃើញសាកសពកម្មករជីករ៉ែទាំង១១នាក់នោះហើយ៕
Tag:
ឥណ្ឌូណេស៊ី
គ្រោះធម្មជាតិ
© រក្សាសិទ្ធិដោយ thmeythmey.com