សង្គមអន្តរជាតិ
អន្តរជាតិ
ក្រសួងការបរទេសអាមេរិក អនុញ្ញាតជាផ្លូវការគម្រោងលក់អាវុធឲ្យតៃវ៉ាន់តម្លៃ១,៨ពាន់លានដុល្លារ រូបភាព៖ Petra News Agency
× ក្រសួងការបរទេសអាមេរិក បានផ្ដល់ភ្លើងបៃតងលើគម្រោងលក់សព្វាវុធបីប្រភេទទៅឲ្យតៃវ៉ាន់។ នេះបើតាមការបញ្ជាក់មន្ទីរបញ្ចកោណអាមេរិកនៅថ្ងៃទី២២ ខែតុលា ប៉ុន្មានថ្ងៃក្រោយទីភ្នាក់ងារព័ត៌មាន Reuters រាយការណ៍ពីគម្រោងមួយនេះ។ អាវុធដែលត្រូវលក់មានឧបករណ៍សម្រាប់ផ្តល់សញ្ញា (Sensor), មីស៊ីល និងរថយន្តបាញ់គ្រប់រ៉ុក្កែតជាដើម។
ក្នុងសេចក្តីជូនដំណឹងផ្លូវការទៅសភា ក្រសួងការបរទេសអាមេរិក បានឯកភាពលក់អាវុធចំនួន ៣ប្រភេទឲ្យតៃវ៉ាន់។ សម្ភារទាំងនោះមានរថយន្តបាញ់គ្រាប់រ៉ុក្កែតប្រភេទ High Mobility Artillery Rocket System ផលិតដោយក្រុមហ៊ុន Lockheed Martin ចំនួន១១គ្រឿង ក្នុងតម្លៃជាង ៤៣៦លានដុល្លារ, មីស៊ីលប្រដេញដែលបាញ់ពីលើអាកាស AGM-84H ចំនួន១៣៥គ្រាប់ និងសម្ភារផ្សេងទៀតតម្លៃជាង ១ពាន់លានដុល្លារ និងឧបករណ៍ផ្តល់ដំណឹង(Sensor) បំពាក់លើយន្តហោះស៊ើបការណ៍ចំនួន៦គ្រឿងក្នុងតម្លៃប្រមាណ៣៦៧,២លានដុល្លារ។
ទន្ទឹមនឹងនេះ អាមេរិក អាចនឹងយល់ព្រមលក់អាវុធផ្សេងទៀត ដូចជាដ្រូនជាដើម ឲ្យតៃវ៉ាន់ នៅថ្ងៃបន្តបន្ទាប់។ ក្រោយការជូនដំណឹងក្រសួងការបរទេសនេះ សភាអាមេរិកមានរយៈ ៣០ថ្ងៃដើម្បីពីនិត្យថា អនុញ្ញាតឲ្យលក់ឬអត់ក្នុងការលក់អាវុធ ឬក៏អត់។ ជានីតិវិធី គម្រោងលក់អាវិធទាំងអស់ ត្រូវមានអនុញ្ញាតពីក្រសួងការបរទេសអាមេរិកសិន មុនដល់សភា។
ទាក់ទិនព័ត៌មានខាងលើ ក្រសួងការបរទេស និងការពារជាតិតៃវ៉ាន់ បានសំដែងស្វាគមន៍ ចំពោះដំណឹងល្អមួយនេះ ព្រោះវានឹងជួយពង្រឹងសមត្ថភាពការពារជាតិរបស់តៃវ៉ាន់។ យ៉ាងណាក៏ដោយ រដ្ឋមន្ត្រីការពារជាតិតៃវ៉ាន់ លោក Yen De-fa បាននិយាយការពារថា ការទិញអាវុធ និងគ្រឿងបរិក្ខារយោធាពីអាមេរិក មិនមែនជាការរត់ប្រណាំងអាវុធជាមួយទីក្រុងប៉េកាំងឡើយ ប៉ុន្តែតៃវ៉ាន់គ្រាន់តែត្រូវការសមត្ថភាពប្រយុទ្ធ ដែលអាចទុកចិត្តបាន។
ដោយឡែកទីក្រុងប៉េកាំង មិនទាន់មានប្រតិកម្មជុំវិញបញ្ហានេះទេ។ កន្លងមកចិន ក៏បានប្រាប់អាមេរិកឲ្យផ្អាកការលក់អាវុធឲ្យតៃវ៉ាន់ផងដែរ ព្រោះវាធ្វើឲ្យប៉ះពាល់ដល់ទំនាក់ទំនងចិន និងអាមេរិក ក៏ដូចជា ស្ថិរភាពនៅច្រកសមុទ្រតៃវ៉ាន់។
នៅសប្តាហ៍មុនទីភ្នាក់ងារព័ត៌មានReuters ក៏បានចុះផ្សាយពីការលក់អាវុធខាងលើឲ្យតៃវ៉ាន់ដែរ ប៉ុន្តែពេលនោះវាមិនទាន់ផ្លូវការនៅឡើយទេ។ រហូតដល់ថ្ងៃទី២២ ខែតុលា ទើបក្រសួងការពារជាតិអាមេរិក បានបញ្ចេញព័ត៌មានជាផ្លូវការ។ ការយល់ព្រមលក់អាវុធឲ្យតៃវ៉ាន់នេះ ធ្វើឡើងស្របពីចិនកំពុងធ្វើសកម្មភាពអុងអាត់យ៉ាងខ្លាំង ដើម្បីដាក់សម្ពាធលើតៃវ៉ាន់ ដែលកំពុងតែបង្កើតទំនាក់ទំនងជាមួយអាមេរិក៕
Tag:
អាមេរិក
តៃវ៉ាន់
ចិន
© រក្សាសិទ្ធិដោយ thmeythmey.com