ដើម្បីអាចចូលជាធរមានបាន សន្ធិសញ្ញាហាមឃាត់អាវុធនុយក្លេអ៊ែរ ត្រូវការប្រទេសចំនួន៥០ ក្នុងការផ្តល់សច្ចាប័ន។ ប្រទេសចុងក្រោយ គឺហុងឌូរ៉ាស ដែលបានផ្តល់សច្ចាប័នលើសន្ធិសញ្ញាអន្តរជាតិមួយនេះ។ នៅក្នុងខែមករា ឆ្នាំ២០២១ ខាងមុខ សន្ធិសញ្ញាហាមឃាត់អាវុធនុយក្លេអ៊ែរ នឹងចូលជាធរមាន។
 

ទាក់ទិននឹងការផ្តល់សច្ចាប័នគ្រប់ចំនួននេះ អង្គការអន្តរជាតិបានអបអរសាទរ ចំពោះដំណឹងល្អមួយនេះ។ សរសេរលើបណ្តាញសង្គមTwitter របស់ខ្លួន យុទ្ធនាការអន្តរជាតិលុបបំបាត់អាវុធនុយក្លេអ៊ែរ (ICAN) បានលើកឡើងថា ហុងឌូរ៉ាស គឺជាប្រទេសទី៥០ ដែលបានផ្តល់សច្ចាប័ន លើសន្ធិសញ្ញាហាមឃាត់នុយក្លេអ៊ែរ ដែលនេះគឺការបង្កើតប្រវត្តិសាស្រ្តថ្មីមួយ។ 
 

ចំណែកប្រធានគណៈកម្មាធិការអន្តរជាតិរបស់អង្គការកាកបាទក្រហម លោក Peter Maurer ក៏បានសាទរដំណឹងល្អនេះដែរ ដោយលោក បានលើកឡើងថា ថ្ងៃនេះ គឺជាជោគជ័យមួយសម្រាប់មនុស្សជាតិ ហើយពិភពលោក នឹងកាន់តែមានសុវត្ថិភាពជាងមុន។ 
 

តាមការចុះផ្សាយរបស់ទីភ្នាក់ងារព័ត៌មាន AFP សន្ធិសញ្ញាហាមឃាត់អាវុធនុយក្លេអ៊ែរនេះ មានប្រទេសចំនួន៨៤ បានចុះហត្ថលេខា ប៉ុន្តែមានតែប្រទេសចំនួន ៥០ប៉ុណ្ណោះ ដែលបានផ្តល់សច្ចាប័ន។ បន្ថែមពីលើនេះ ប្រទេសមហាអំណាចនុយក្លេអ៊ែរទាំង៥ ដែលមានបារាំង អង់គ្លេស អាមេរិក រុស្ស៊ី ចិន មិនបានចុះហត្ថលេខាលើសន្ធិសញ្ញាអន្តរជាតិនេះទេ៕