COVID-19
អន្តរជាតិ
មហាក្សត្រម៉ាឡេស៊ី ច្រានចោលសំណើនាយករដ្ឋមន្ត្រីក្នុងការដាក់ប្រទេសក្នុងស្ថានភាពអាសន្ន មហាក្សត្រម៉ាឡេស៊ី Al-Sultan Abdullah។ រូបភាព៖ Bernama
× ម៉ាឡេស៊ី មិនត្រូវការដាក់ស្ថានភាពអាសន្ននៅក្នុងពេលនេះឡើយ។ នេះបើតាមការបញ្ជាក់របស់អ្នកគ្រប់គ្រងកិច្ចការរាជវាំងម៉ាឡេស៊ី ដែលបានស្រង់ព្រះបន្ទូលរបស់មហាក្សត្រម៉ាឡេស៊ី Al-Sultan Abdullah នៅថ្ងៃទី២៥ ខែតុលា។ ការបញ្ជាក់របស់មហាក្សត្រម៉ាឡេស៊ីបែបនេះ ធ្វើឡើងបន្ទាប់ពីប្រមុខរដ្ឋាភិបាល លោក មូហ៊ីឌីន យ៉ាស៊ីន បានស្នើដាក់ប្រទេសក្នុងស្ថានភាពអាសន្នដោយសារការកើនឡើងនៃ COVID-19 ។
នាយករដ្ឋមន្ត្រីម៉ាឡេស៊ី លោកមូហ៊ីឌីន យ៉ាស៊ីន នៅថ្ងៃទី២៣ ខែតុលាកន្លងទៅ បានស្នើទៅព្រះមហាក្សត្រ ជុំវិញបញ្ហាដាក់ប្រទេសក្នុងស្ថានភាពអាសន្ន ដើម្បីទប់ស្កាត់ការរាតត្បាតនៃCOVID-19។ សំណើនេះ ត្រូវបានមហាក្សត្រម៉ាឡេស៊ី យកមកពិភាក្សាជាមួយអ្នកតំណាងរដ្ឋម៉ាឡេស៊ី ដែលមានសមាជិកចំនួន៩រូប នៅថ្ងៃទី២៥ ខែតុលា។ បន្ទាប់កិច្ចពិភាក្សានេះ មហាក្សត្រ បានបដិសេធការដាក់ស្ថានភាពអាសន្ននៅម៉ាឡេស៊ី ឬតំបន់ណាមួយនៅក្នុងម៉ាឡេស៊ី។
«ព្រះមហាក្សត្រ ទ្រង់មានបន្ទូលថា នៅពេលនេះ ម៉ាឡេស៊ីមិនត្រូវការការដាក់ស្ថានភាពអាសន្ននៅក្នុងប្រទេស ឬតំបន់ជាក់លាក់ណាមួយនៃប្រទេសឡើយ»។ អ្នកគ្រប់គ្រងកិច្ចការរាជវាំងម៉ាឡេស៊ី លោក Ahmad Fadil Shamsuddin បានលើកឡើងបែបនេះ នៅក្នុងសេចក្តីថ្លែងការណ៍មួយរបស់រាជវាំងម៉ាឡេស៊ី ដោយបន្ថែមថា មហាក្សត្រ ទ្រង់ក៏បានអំពាវនាវឲ្យអ្នកនយោបាយទាំងអស់ រួមទាំងសមាជិកសភាមួយចំនួន បញ្ឈប់សកម្មភាពនយោបាយទាំងអស់ ដែលបង្កឲ្យប៉ះពាល់ដល់រដ្ឋាភិបាលផងដែរ។
សេចក្តីថ្លែងការណ៍ដដែលនេះ បានបន្ថែមថា សម្រាប់ការអនុម័តថវិកាជាតិឆ្នាំ២០២១ សមាជិកសភាត្រូវគិតគូរពីបញ្ហាប្រជាជន និងសេដ្ឋកិច្ច ដែលកំពុងតែរងគ្រោះដោយសារCOVID-19 ពោលគឺមិនមែនផលប្រយោជន៍សមាជិកសភាខ្លួនឯងឡើយ។ បន្ថែមពីលើនេះ អ្នកគ្រប់គ្រងកិច្ចការរាជរាំង បានបន្ថែមថា ការបែងចែកហិរញ្ញវត្ថុ គឺសំខាន់ណាស់សម្រាប់បុគ្គលិក ដែលកំពុងប្រយុទ្ធជាមួយCOVID-19 នៅជួរមុខ។ នេះបើតាមការចុះផ្សាយរបស់ទូរទស្សន៍Channel News Asia។
បន្ទាប់ពីសេចក្តីថ្លែងការណ៍របស់រាជវាំងបានចេញដូចខាងលើនេះ នាយករដ្ឋមន្ត្រីម៉ាឡេស៊ី លោកយ៉ាស៊ីន បានថ្លែងសេចក្តីអរគុណលើសេចក្តីទុកចិត្ត និងយោបល់របស់មហាក្សត្រ ដែលជួយការពាររដ្ឋាភិបាលពីអស្ថិរភាពផ្សេងៗ។
កន្លងមក សំណើដាក់ប្រទេសក្នុងភាពអាសន្ននេះ ត្រូវបានលោក អាន់វ៉ា អ៊ីប្រាហ៊ីម ប្រធានសម្ព័ន្ធភាពបក្សប្រឆាំង Pakatan Harapan រិះគន់ថា ជាចេតនាផ្អាកនីតិវិធីរបស់សភា។ លោក អាន់វ៉ា បានអះអាងថា លោកមានសំឡេងគ្រប់គ្រាន់នៅក្នុងសភាដើម្បីអាចទម្លាក់នាយករដ្ឋមន្ត្រីសព្វថ្ងៃ។ នៅក្នុងច្បាប់ម៉ាឡេស៊ី ប្រសិនបើស្ថានភាពអាសន្នត្រូវបានអនុវត្តនៅក្នុងប្រទេស សភាមិនអាចបើកកិច្ចប្រជុំបានឡើយ។
សូមបញ្ជាក់ថា គិតមកត្រឹមថ្ងៃទី២៥ ខែតុលា ម៉ាឡេស៊ី មានករណីCOVID-19 សរុបចំនួន ២៦៥៦៥ករណី អ្នកស្លាប់មានចំនួន ២២៩នាក់ និងអ្នកជាសះស្បើយមានចំនួន ១៧១៣៤នាក់៕
© រក្សាសិទ្ធិដោយ thmeythmey.com