ជាតិ
វិទ្យាស្ថានប៉ាស្ទ័រកម្ពុជា តេស្ត Real Time RT-PCR រកកូវីដ-១៩ បានជាង១០ម៉ឺនដងហើយ ទីស្នាក់ការកណ្ដាលរបស់វិទ្យាស្ថានប៉ាស្ទ័រកម្ពុជា នៅរាជធានី ភ្នំពេញ។ រូបភាពពីហ្វេសប៊ុករបស់វិទ្យាស្ថានប៉ាស្ទ័រកម្ពុជា
× វិទ្យាស្ថានប៉ាស្ទ័រកម្ពុជា (IPC) បញ្ជាក់ពីការតាំងចិត្តយ៉ាងមុតមាំរបស់ខ្លួនក្នុងការបន្តសហការជាមួយក្រសួងសុខាភិបាលដើម្បីប្រយុទ្ធប្រឆាំងជំងឺរាតត្បាតសកលកូវីដ-១៩ក្នុងប្រទេសកម្ពុជា ទោះស្ថានភាពជំងឺក្នុងប្រទេសអាស៊ីអាគ្នេយ៍មានភាពល្អប្រសើរច្រើនក៏ដោយ។ គិតមកត្រឹមថ្ងៃទី ២៦ ខែតុលា កម្ពុជានៅសល់អ្នកជំងឺកូវីដ-១៩តែ៤នាក់ទៀតប៉ុណ្ណោះ។
តាមរយៈសេចក្តីប្រកាសព័ត៌មាន នៅថ្ងៃទី ២៦ ខែតុលា វិទ្យាស្ថានប៉ាស្ទ័រកម្ពុជា បានរៀបរាប់ពីការចូលរួមយ៉ាងសកម្មរបស់ខ្លួនក្នុងការចូលរួមទប់ស្កាត់ជំងឺកូវីដ-១៩ក្នុងប្រទេសកម្ពុជា ដែលសហការទាំងជាមួយរាជរដ្ឋាភិបាល និងអង្គការសុខភាពពិភពលោក (WHO)។
សេចក្តីប្រកាសព័ត៌មានដដែល សរសេរថា វិទ្យាស្ថានបានត្រៀមលក្ខណៈធ្វើតេស្តកូវីដ-១៩ នៅពាក់កណ្ដាលខែមករា ឆ្នាំ២០២០ ហើយបានរកឃើញករណីឆ្លងកូវីដ-១៩ទីមួយ កាលពីថ្ងៃទី ២៧ ខែមករា។ បន្ថែមពីលើនេះ វិទ្យាស្ថានប៉ាស្ទ័រកម្ពុជា ក៏បានចូលរួមក្នុងការឆ្លើយតប និងធ្វើតេស្តអ្នកដំណើរលើនាវាទេសចរណ៍ Westerdam ក្នុងខែកុម្ភៈផងដែរ។
បុគ្គលិកសុខាភិបាលនៃវិទ្យាស្ថានប៉ាស្ទ័រកម្ពុជា កំពុងធ្វើពិសោធន៍ ។រូបភាពពី IPC
ជាពិសេស ក្នុងខែមេសាឆ្នាំនេះ វិទ្យាស្ថានប៉ាស្ទ័រកម្ពុជា ត្រូវបានចាត់តាំងឲ្យធ្វើជា «មន្ទីរពិសោធន៍បង្អែកសកលរបស់ WHO សម្រាប់កូវីដ-១៩ (WHO Global Referral Laboratory for COVID-19) ដែលជាតួនាទីសំខាន់មួយក្នុងការដោះស្រាយហានិភ័យសុខភាពសាធារណៈ ដែលកើតចេញពីជំងឺរាតត្បាតសកលកូវីដ-១៩។
ម្យ៉ាងវិញទៀត វិទ្យាស្ថានប៉ាស្ទ័រកម្ពុជា (IPC) អះអាងថា វិទ្យាស្ថានបានធ្វើតេស្តជំងឺកូវីដ-១៩ជាង១០ម៉ឺនដងហើយដោយប្រើបច្ចេកទេស Real Time RT-PCR ក្នុងមន្ទីរពិសោធន៍វីរុសរបស់ខ្លួន។ តេស្តទាំងជាង១០ម៉ឺនដងនេះ បានរួមចំណែកក្នុងការរកឃើញអ្នកជំងឺកូវីដ-១៩ចំនួន២៨៧នាក់ក្នុងប្រទេសកម្ពុជាផងដែរ។
សូមបញ្ជាក់ថា វិទ្យាស្ថានប៉ាស្ទ័រកម្ពុជា គឺជាស្ថាប័នស្រាវជ្រាវមិនរកប្រាក់ចំណេញកម្ពុជាមួយ ដែលបានប្រសូត្រឡើងក្នុងឆ្នាំ១៩៥៣។ វិទ្យាស្ថាននេះ បានបើកប្រតិបត្តិលើកិច្ចការស្រាវជ្រាវសុខភាពលើជំងឺឆ្លង និងគាំទ្រការឃ្លាំមើលសុខភាពសាធារណៈតាមរយៈមន្ទីរពិសោធន៍លំដាប់ខ្ពស់ និងសមត្ថភាពស្រាវជ្រាវផ្នែកវីរុសរាតត្បាតជាដើម។
ក្នុងនាមជាសមាជិកនៃបណ្ដាញអន្តរជាតិរបស់វិទ្យាស្ថានប៉ាស្ទ័រ (IPIN) វិទ្យាស្ថានប៉ាស្ទ័រកម្ពុជា ក៏ធ្វើការជិតស្និទ្ធជាមួយដៃគូជាតិនិងអន្តរជាតិ ដើម្បីពង្រឹងសមត្ថភាពរបស់ខ្លួនក្នុងប្រទេសកម្ពុជា និងលើសពីនេះផងដែរ៕
Tag:
វិទ្យាស្ថានប៉ាស្ទ័រកម្ពុជា
ក្រសួងសុខាភិបាល
កូវីដ-១៩
© រក្សាសិទ្ធិដោយ thmeythmey.com