អន្តរជាតិ
រាជបុត្រស្តេចព្រុយណេ ចូលទិវង្គតក្នុងព្រះជន្ម៣៨វស្សា មេដឹកនាំអាស៊ានផ្ញើសាររំលែកទុក្ខ
× ព្រះអង្គម្ចាស់ Haji Abdul Azim របស់ព្រុយណេ (Prince Azim of Brunei ) បានចូលទិវង្គតកាលពី២៤ ខែតុលា ក្នុងទីក្រុងបានដាស៊េរី បេហ្កាវ៉ាន់ ក្នុងព្រះជន្ម៣៨វស្សា។ ទ្រង់ជាបុត្រាទី២របស់ព្រះចៅស៊ុលតង់ព្រុយណេ ហាស្សាណាល់ បុលគៀ។ មេដឹកនាំនៃប្រទេសជិតខាងព្រុយណេមួយចំនួន បានផ្ញើសាររំលែកទុក្ខការចូលទិវង្គតរបស់ទ្រង់ Azim ។
រដ្ឋាភិបាលព្រុយណេ បានប្រកាសកាន់ទុក្ខថ្នាក់ជាតិរយៈពេល៧ថ្ងៃចំពោះការចូលទិវង្គតរបស់ព្រះអង្គម្ចាស់ Azim ចាប់ពីចុងសប្ដាហ៍នេះមក។ មូលហេតុនៃការចូលទិវង្គតរបស់បុត្រព្រះចៅស៊ុលតង់អង្គនេះ ពុំត្រូវបានបញ្ជាក់ឡើយ តែបើតាមប្រព័ន្ធផ្សព្វផ្សាយក្នុងស្រុក ព្រះអង្គម្ចាស់ Azim ប្រឈួនធ្ងន់ធ្ងរយូរមកហើយពីជំងឺមហារីកថ្លើម។
មេដឹកនាំអាស៊ានចំនួន៣ បានផ្ញើសាររំលែកទុក្ខចំពោះការចូលទិវង្គតរបស់ព្រះអង្គម្ចាស់ Azim ក្នុងនោះមាននាយករដ្ឋមន្ត្រីម៉ាឡេស៊ី Muhyiddin Yassin, នាយករដ្ឋមន្ត្រីសិង្ហបុរី លី សៀនឡុង និងនាយករដ្ឋមន្ត្រីថៃ ប្រាយុទ្ធ ចន្ទអូចា ។
(ឆ្វេង) ព្រះអង្គម្ចាស់ Azim, ព្រះអង្គម្ចាស់ Abdul Malek (កណ្ដាល) និងព្រះអង្គម្ចាស់ Abdul Mateen នៅព្រះរាជវង្សក្នុងទីក្រុង បានដាស៊េរី បេហ្កាវ៉ាន់ កាលពីខែកញ្ញា ឆ្នាំ២០១៤ ។រូបភាព៖ AFP
តាមរយៈបណ្ដាញសង្គមហ្វេសប៊ុក នាយករដ្ឋមន្ត្រី លី សៀនឡុង បានសរសេរថា ព្រះអង្គម្ចាស់ Azim ត្រូវបានស្គាល់ថាមានព្រះទ័យទូលាយ និងចំពោះការពលីកម្មសម្រាប់បុព្វហេតុយុវជន ការអប់រំ និងសប្បុរស។ ចំណែក ទាំងលោក ប្រាយុទ្ធ និងលោក Yassin បានបង្ហាញការសោកស្ដាយពន់ពេកចំពោះការចូលទិវង្គតនេះ ហើយចូលរួមរំលែកទុក្ខចំពោះព្រះចៅស៊ុលតង់ សែរាជវង្ស និងប្រជាជនព្រុយណេទាំងអស់។
សូមបញ្ជាក់ថា ព្រះអង្គម្ចាស់ Azim ក៏ជាផលិតករភាពយន្តហូលីវូដ ដែលរាប់អានស្និទ្ធស្នាលជាមួយតារាល្បីៗផងដែរ។ ទ្រង់ ធ្លាប់ថតរូបកៀកស្មាជាមួយ Michael Jackson, Mariah Carey និង Pamela Anderson ជាដើម ហើយធ្លាប់ទាំងចាយលុយ១០លានដុល្លារឲ្យតារាចម្រៀង Michael Jackson ចូលរួមពិធីខួបកំណើត២៥វស្សារបស់ទ្រង់ទៀតផង។
ក្នុងឧស្សាហកម្មហូលីវូដ ព្រះអង្គម្ចាស់ Azim បានបោះទុនជាង៤លានដុល្លារបង្កើតផលិតកម្មភាពយន្តផ្ទាល់ខ្លួន ហើយទ្រង់បានផលិតភាពយន្ត៣រឿង រួមមាន You're Not You (២០១៤), The Time of Their Lives (២០១៧) និង The Happy Prince (២០១៨) ៕
© រក្សាសិទ្ធិដោយ thmeythmey.com