ជាតិ
សង្គមជាតិ
អាជ្ញាធរខេត្តព្រះសីហនុ សម្អាតឆ្នេរសម្រាប់ទទួលភ្ញៀវទេសចរ ក្នុងឱកាសបុណ្យអុំទូក រូបភាព៖_មន្ទីរទេសចរណ៍ខេត្តព្រះសីហនុ
×
ដោយ៖ ហុង ស្រីណា
ភ្នំពេញ៖ ទោះបីពិធីបុណ្យអុំទូក បណ្តែតប្រទីត អកអំបុក និងសំពះព្រះខែ ប្រចាំឆ្នាំ២០២០ មិនបានប្រារព្ធឡើងក៏ពិតមែន ប៉ុន្តែការឈប់សម្រាកចំនួន៣ថ្ងៃសម្រាប់ពលរដ្ឋខ្មែរនៃបុណ្យប្រពៃណីជាតិនេះ នៅតែមានដដែល។ ក្នុងឱកាសនៃការឈប់សម្រាកនេះ មន្ទីរទេសចរណ៍ខេត្តព្រះសីហនុបានរៀបចំ និង សម្អាតសំរាម សម្អាតគំនរឈើ នៅតាមឆ្នេរ និងរៀបចំបន្ទប់ទឹកសាធារណៈចល័តនៅតាមតំបន់ឆ្នេរសមុទ្រជាមួយសម្រាប់ត្រៀមភ្ញៀវទេសចរចផងដែរ។
ខេត្តព្រះសីហនុ ជាតំបន់ឆ្នេរដ៏មានសក្កានុពលខ្ពស់សម្រាប់ភ្ញៀវទេសចរមកលេងកម្សាន្តក្នុងឱកាសពិធីបុណ្យអុំទូកនេះ។ បើតាមលោក តាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុ បច្ចុប្បន្នអាជ្ញាធរខេត្ត ក្រៅពីសម្អាតឆ្នេរ សម្អាតគំនរឈើ ដាក់បន្ថែមបន្ទប់ទឹកសាធារណៈ ចំណតឡាន-ម៉ូតូ និងអនាម័យតាមរមណីយដ្ធាន ដើម្បីទទួលភ្ញៀវទេសចរហើយនោះ ក៏បានដាក់ពង្រាយកម្លាំងការពារសន្តិសុខ ដើម្បីធានានូវសន្តិសុខ និងសុវត្ថិភាពជូនភ្ញៀវទេសចរ ដែលមកលេងកំសាន្ត ផងដែរ។
លោកបានបញ្ជាក់ប្រាប់សារព័ត៌មានថ្មីៗ២៥រាជធានី-ខេត្ត(ThmeyThmey25) ថា៖ «ជាពិសេស គឺមានការចុះផ្សព្វផ្សាយដល់ភ្ញៀវទេសចរ អំពីការរក្សាអនាម័យ និងការការពារខ្លួនពីជំងឺកូវី-ដ១៩ (COVID-19)»។
ថ្ងៃឈប់សម្រាក៣ថ្ងៃ នៃពិធីបុណ្យអុំទូក បណ្តែតប្រទីត អកអំបុក និងសំពះព្រះខែ ប្រចាំឆ្នាំ២០២០ គឺពីថ្ងៃទី៣០តុលាដល់ថ្ងៃទី១វិច្ឆិកា ហើយរដ្ឋាភិបាលប្រកាសផ្អាកប្រារព្ធពិធីប្រពៃណីនេះ ដោយសារបញ្ហានៃជំងឺកូវីដ-១៩ ដែលកំពុងរីករាលដាលជាបន្តបន្ទាប់៕
Tag:
ខេត្តព្រះសីហនុ
បុណ្យអុំទូក
© រក្សាសិទ្ធិដោយ thmeythmey.com